.png){kind=logo}
ВАШИНГТОН, 2026 оны дөрөвдүгээр сарын 21 /Axios/. Ираны Дээд удирдагч Аятолла Можтаба Хаменеи тус улсын төлөөлөгчдөд АНУ-тай хэлэлцээгээ үргэлжлүүлэхийг зөвшөөрсөн тухай "Axios" цахим хуудсанд энэ талаар мэдээлэлтэй эх сурвалжийг эш татан бичжээ.
Үүнээс өмнө Ираны тал Исламын хувьсгалт гвардийн корпусаас шахалт үзүүлсний улмаас хоёр дахь үе шатны хэлэлцээнд оролцохоо хойшлуулаад байсан юм. АНУ Ормузын хоолойн бүслэлтээ зогсоох хүртэл хэлэлцээ хийхээс татгалзахыг тус корпус шаарджээ.
Пакистан, Египет, Турк зэрэг зуучлагч орнууд яриа хэлэлцээг үргэлжлүүлэхийн тулд Техраныг хэлэлцээний үйл явцаас гарахгүй байхыг уриалсан байна.
АНУ-ын Ерөнхийлөгч Дональд Трамп Техранаас дохио хүлээж байгаагаа мэдэгдээд, хоёр долоо хоногийн гал зогсоох хэлэлцээрийг сунгах магадлал бага байгааг сануулсан боловч хугацааг нэг хоногоор сунгаснаар одоо дөрөвдүгээр сарын 22-ны үдэш дуусгавар болно. "Тэд шударга хэлэлцээр байгуулж, улс орноо сэргээнэ гэдэгт найдаж байна. Бид маш сайн ажилласан, бүх зүйлийг дуусгаж, хүн бүр сэтгэл хангалуун байх болно" гэж тэрбээр хэлээд, энх тайван тогтоосны дараа Иранд "цөмийн зэвсэг байхгүй болно" гэж нэмж дурдсан байна.
Техраны байр суурь
Энэ сарын 11-12-нд болсон хэлэлцээний эхний шат үр дүнгүй дууссан юм. АНУ-ын тавьж буй "хэт өндөр шаардлага", "байр сууриа байнга өөрчилж буй явдал" болон Ираны боомтуудыг бүсэлсэн явдал саад болсон гэж мэдэгджээ. Ираны цэргийнхэн мөн Хятадаас ирж байсан худалдааны хөлөг онгоц руу халдсаны дараа АНУ гал зогсоох хэлэлцээрийг зөрчсөн гэж буруутгаж, хариу арга хэмжээ авахаа мэдэгдсэн байна.
"АНУ Ормузын хоолойн бүслэлтээ зогсоох хүртэл Иран улс Пакистан руу төлөөлөгчдөө илгээхгүй" гэж Исламын хувьсгалт гвардийн корпустай холбоотой Tasnim мэдээллийн агентлаг мэдээлж байв. Ираны парламентын дарга Мохаммад Багер Галебаф мэдэгдэхдээ, Техран аюул заналхийллийн дор хэлэлцээ хийхгүй гээд, Д.Трамп "хэлэлцээний ширээг бууж өгөх ширээ болгохыг оролдож байна" гэж буруутгасан байна. Түүнчлэн Иран "тулааны талбарт шинэ хөзөр дэлгэхэд" бэлэн байгааг анхааруулжээ.
Эх сурвалж: МОНЦАМЭ агентлаг Д. Жаргал
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!