.png){kind=logo}
Өнөөдөр “Барилгын мэдээлэлтэй загварчлал”-ыг улс орондоо нэвтрүүлсэн туршлагатай улс орны төлөөлөл болох БНСУ, Сингапур улсын зөвлөхүүдийг оролцуулан харилцан туршлага судлах, мэдээлэл солилцох зорилгоор “BIM FORUM-2023” хэлэлцүүлгийг зохион байгуулжээ.
Тус форумыг Барилга, хот байгуулалтын яамнаас зохион байгуулж, форумд Цахим хөгжил, харилцаа холбооны яам, Газар зохион байгуулалт, геодези, зураг зүйн газар, “Барилгын хөгжлийн төв” ТӨҮГ, "Билдингсмарт Монгол" ТББ, “Монголын барилгын инженерүүдийн холбоо”, “Монголын барилгын үндэсний ассоциаци” “Монголын барилгын зураг төсөл зохиогчдын холбоо” зэрэг төрийн болон төрийн бус байгууллагуудын нийт 160 гаруй төлөөлөл оролцлоо.
Форумыг Барилга, хот байгуулалтын дэд сайд Э.Золбоо нээж хэлэхдээ: "БИМ гэдэг дотоод сүлжээ салбарын хэмжээнд хөдөлж байж хэрэгжих онцлогтой. Салбарын бүх талын оролцоо жигд байж бодит байдлаар ажиллах систем юм. Зургийн компаниуд мэдээлэлээ БИМ сүлжээнд оруулдаг ч нөгөө талдаа захиалагч юмуу, гүйцэтгэгч тал хэрэглэхгүй бол үр дүн өгөхгүй гэдгийг тодотгов. Иймд цаашид яамнаас аж ахуй нэгжүүдэд “BIM” нэвтрүүлэхэд онцгойлон анхаарч, барилгын салбарын цахим засаглалд шилжих бодлого, үйл ажиллагааг үе шаттай хэрэгжүүлнэ. Ингэснээр энэ системийг нэвтрүүлж, салбар маань шинэ шатанд гарна. Бидний өдөр тутам тулгардаг янз бүрийн асуудлыг шийдвэрлэхэд гол дөхөм болно. Мөн цаг хугацаа, мөнгө хэмнэхээс гадна барилга чанартай болох давуу талууд бүрдэнэ" гэж онцолж байв.
Барилгын салбарын технологийн нэг гол дэвшил нь "BIM" буюу салбарын мэдээллийн нэгдсэн сантай болох юм байна. Тодруулбал, зураг төсөл боловсруулагчид, барилга угсралтынхан, барилгын материал үйлдвэрлэгчид, ханган нийлүүлэгчид, төсөвчид, гүйцэтгэгч нар, тусгай зөвшөөрөл олгогч ТББ-ууд гээд салбарын бүх талын оролцогчдыг нэгтгэсэн цахим бааз буюу дотоод сүлжээ байгуулж, бүгд дундаа ашиглахыг ВIM систем гэдэг.
“BIM” нэвтрүүлснээр барилгын салбар бүрэн цахимжиж, төсөвт өртөг, байгаль орчин, эрчим хүчний үр ашиг зэргийг харгалзан илүү оновчтой, зөв төлөвлөлт, угсралт, материал сонголтыг хийх нөхцөл бүрдэх юм.
Иймд Барилгын салбар 2015 оноос эхлэн “BIM” нэвтрүүлэх зорилгоор салбартаа шаардлагатай сургалт, мэдээллээр хангаж, 2017 оноос хойш шаардлагатай стандартуудыг үе шаттай батлуулж, 2022 онд 3 удаагийн хэлэлцүүлэг зохион байгуулжээ.
Энэхүү форумаар "Нийгэм, эдийн засгийн салбарын цахим шилжилтэд мэдээллийн технологи нэвтрүүлэх үйл ажиллагаа", "BIM-Барилгын Мэдээлэлтэй Загварчлалын Road map боловсруулах төсөөлөл, road map боловсруулах зөвлөх үйлчилгээний ажлын даалгавар", "BIM-ийн олон улсын хэрэглээ, нэвтрүүлсэн туршлага", "Сингапур улсын BIM-ийг нэвтрүүлсэн туршлага, хэрэглээ", "BIM-Барилгын Мэдээлэлтэй Загварчлалын танилцуулга" "BIM ба AI", "BIM нэвтрүүлсэн туршлага", "BIM програмуудын хамтран ажиллах аргачлалууд", “Үүлэн технологи дээр суурилсан Estimator Cloud төсвийн программ", "BIM интеграци” зэрэг илтгэлүүд тавигдаж, хэлэлцүүлэг өрнүүллээ гэж БХБЯ-наас мэдээллээ.
