Монгол хэл бичгийн шалгалт энэ сарын 17-19-нд болно

Улаанбаатар, 2025 оны дөрөвдүгээр сарын 4 /МОНЦАМЭ/. Боловсролын яам, Боловсролын үнэлгээний төвөөс монгол хэл бичгийн шалгалтыг энэ сарын 17-19-нд зохион байгуулна.

Энэ жил монгол хэл бичгийн шалгалтад 84969 шалгуулагч шалгалт өгөхөөр бүртгүүлсэн бөгөөд улсын хэмжээнд 52 шалгалтын төвд зохион байгуулахаар төлөвлөж байна. Мөн шалгалтын комисс, зохион байгуулах багт 3301 багш ажилчид ажиллах юм. БҮТ-өөс зарласан хугацаанд шалгуулагч бүртгэлээ баталгаажуулснаар бүртгэлийн дугаар, нууц үгийг ашиглан суудлын хуваариа www.eyesh.eec.mn цахим хуудасны шалгуулагчийн булангаас хэвлэн авах юм. Шалгалтын үргэлжлэх хугацаа нь 100 минут байна. Харин дүн, оноог ажлын 15 хоногийн дараа нийтэд ил болгоно.

Үнэлгээ дүйцүүлэх хүсэлтийг гуравдугаар сарын 1-нээс тавдугаар сарын 31-нийг дуустал хүлээн авна.Үүнд, гадаадын их, дээд сургуульд хүлээн зөвшөөрдөг Кембрижийн АS /advanced subsidiary/, A /advanced/, болон IB /international baccalaureate/ түвшний хөтөлбөр, IELTS /International English Language Testing System/, TOEFL /Test of English as a Foreign Language/, SAT /Scholastic Aptitude Test/ зэрэг шалгалтын үнэлгээг элсэлтийн шалгалтын үнэлгээтэй дүйцүүлэх боломжтой юм. Үнэлгээ дүйцүүлэх хүсэлтэй оюутан, суралцагч Олон улсын шалгалтын үнэлгээг Монгол Улсын ЭШ-ын үнэлгээнд дүйцүүлэх хүсэлт, холбогдох бичиг баримтыг БҮТ-ийн eec.mn цахим хуудасны “Элсэлтийн шалгалт” гэсэн цэс рүү орж элсэлтийн шалгалтад бүртгүүлсэн бүртгэлийн дугаар, нууц үгээ ашиглан нэвтэрч цахимаар ирүүлнэ.

ЭШ-ын холбоотой асуудлаар БҮТ-ийн www.eec.mn, facebook/eec.mn, mobile APP, myfuture.mn, help.eec.mn, stat.eec.mn мэдээллийн эх сурвалжид хандаж болох ба шалгуулагчид шалгалтын айдас, түгшүүрээ дарах зорилгоор сэтгэл зүйчтэй холбогдон зөвлөгөө мэдээлэл авах боломжтой. Бүртгэлийн дугаар, нууц үгээ мартсан бол 133233 гэсэн тусгай дугаарт регистрийн дугаарын 8 оронтой тоогоо илгээн авах боломжтой.

Эх сурвалж: МОНЦАМЭ Агентлаг Г.Цогзолмаа