.png){kind=logo}
Мэргэжлийн сүмо бөхийн 7 дугаар сарын тэмцээн буюу Нагоя башё IG аренад өнөөдөр эхэлж /2025.07.13/ байгаа бөгөөд 6 жилийн дараа 2 Ёкозүнатай болсон гэдгээрээ онцлогтой гэж болно.
Энэ цагийг эзэлсэн сүмо бөхийн 2 Их аваргыг башёгийн эхний өдөр Комүсүби цолтнууд шалгах юм байна.
Тодруулбал, Их аварга цолтой Ооносато анхны барилдаанаа манай Оошёома Комүсүби П.Дэлгэрбаяртай барилдаж түүнийг ёрикири мэхээр хаяж 1 даваатай башёг эхлүүлсэн бол П.Дэлгэрбаяр нэг унаатай болов.
Мэргэжлийн сүмо бөхийн 74 дэх Их аварга Хоошёорюү С.Бямбасүрэн, Комүсүби Такаясү-тэй эхний өдөр хүч үзэхээр таарч барилдан түүнийг сотогаке мэхээр хаяснаар Нагоя башёг даваагаар эхлүүллээ.
Харин энэ удаагийн башёд Озэки цолонд дөхөөд байсан Сэкивакэ Дайэйшёо гэмтлийн улмаас, мөн Эндо баруун өвдөгний хагалгаанд орсон тул тэд Нагояд барилдахгүй болжээ.
Эхний өдөр Озэки Котозакүра Украины сүмоч Аонишики /М-1/-тэй таарч хүчээ сорин түүнд учимусо мэхээр ойчиж 1 унаатай болсон бол Аонишики 1 даваатай башёг амжилттай эхлүүлж байна.
Сэкивакэ Киришима Б.Лхагвасүрэн энэ өдөр Вакамотохарү /М-1/-тай учраа таарч барилдан түүнийг ёрикири мэхээр хаяж 1 даваатай башёг эхлүүлээд байна.
Сэкивакэ Вакатакакагэ энэ өдөр Оохо /М-2/-той барилдан түүнийг ёрикири мэхээр хаяснаар 1 даваатай болсон бол Оохо 1 унаатай боллоо.
Нагоя башёгийн эхний өдөр Онокацү Б.Чойжилсүрэн /М-3/, Аби /М-2/-тэй таарч хүч үзэн түүнд уватэнаге мэхээр ойчиж 1 унаатай болж башёг эхлүүллээ.
Тамаваши Б.Мөнх-Оргил/М-4/, Хирадоүми /М-5/-тэй энэ өдөр таарч барилдан түүнийг цүкиотоши мэхээр хаяж башёг даваагаар эхлүүлээд байна.
Чиёошёома Г.Мөнхсайхан /М-9/, эхний өдөр Үра /М-9/-тай учраа тааран барилдаж түүнд ошидаши мэхээр унаснаар энэ башёг унаагаар эхлүүлж байна.
