.png){kind=logo}
ДУБАЙ. 2026 оны зургаадугаар сарын 15 /Reuters/. АНУ, Иран улсууд дайныг зогсоох хэлэлцээрт хүрсэн бөгөөд албан ёсоор гарын үсэг зурах ёслол ирэх баасан гарагт Швейцарт болно гэж Пакистаны Ерөнхий сайд Шахбаз Шариф өнөө өглөө олон нийтийн сүлжээгээр мэдэгдлээ.
Шариф энэ тухай зарласнаас хэдхэн минутийн дараа АНУ-ын Ерөнхийлөгч Дональд Трамп "Truth Social" нийгмийн сүлжээндээ "Исламын Бүгд Найрамдах Иран Улстай байгуулах хэлэлцээр бүрэн эцэслэгдлээ" гэж бичжээ.
Ням гарагт Израил улс Ливан руу цохилт өгсөн хэдий ч уг хэлэлцээрийг байгуулж чадсан байна. Израилын тал уг цохилтыг Ираны дэмжлэгтэй "Хезболла" бүлэглэлийн дайчдыг онилсон гэж мэдэгджээ.
Хэлэлцээрийн гол заалтууд одоогоор тодорхойгүй байна. Шарифын хэлснээр, уг гэрээнд "Ливаныг оролцуулан фронтын бүх шугамд цэргийн ажиллагааг нэн даруй, бүрмөсөн зогсоох" талаар тусгасан байна.
Өмнө нь хэд хэдэн эх сурвалж "Reuters" агентлагт мэдээлэхдээ, хэлэлцээрийн төсөлд Ормузын хоолойг дахин нээх, АНУ-аас Ираны боомтуудад тавьсан бүслэлтийг цуцлах, гал зогсоох хэлэлцээрийг сунгах зэргийг тусгасан бөгөөд Ираны цөмийн хөтөлбөрийн асуудлыг 60 хоногийн нэмэлт хэлэлцээний хугацаанд шийдвэрлэхээр үлдээсэн гэжээ.
Д.Трамп мөн нийгмийн сүлжээгээр хийсэн мэдэгдэлдээ уг хоолой "ямар ч татвар хураамжгүйгээр" нээгдэх бөгөөд АНУ-ын тэнгисийн цэргийн бүслэлт мөн дуусгавар болно гэжээ. "Дэлхийн улс орнуудынн хөлөг онгоцууд аа, хөдөлгүүрээ асаацгаа. Газрын тос урсаг!" гэж тэрбээр бичсэн байна.
Үүнээс өмнө ням гарагт Ираны талын гол хэлэлцээ хийгч Мохаммад Багер Галибаф "Х" нийгмийн сүлжээгээр мэдэгдэхдээ, Бейрутын өмнөд захын дүүрэгт өгсөн Израилын цохилт нь АНУ-ыг "хүлээсэн үүргээ биелүүлэх хүсэл зориг, чадваргүй" байгааг харууллаа хэмээн бичжээ. Ираны Гадаад хэргийн яам уг довтолгооны хариуцлагыг АНУ-д хүлээлгэсэн байна. Тус яам "хатуу хариу арга хэмжээ" авна гэж анхааруулсан бол Ираны цэргийн нэгдсэн дээд командлалаас "дайсны зүрх рүү" галлахад бэлэн, "хуруу нь гохон дээр байна" гэж мэдэгджээ.
Харин Д.Трамп ням гарагт "Truth Social" платформдоо бичихдээ "Өнөө өглөө Бейрут руу цохилт өгөх ёсгүй байлаа. Ялангуяа Ирантай энхийн хэлэлцээр байгуулахад тун ойрхон байгаа энэ онцгой өдөр өгөх ёсгүй байлаа" хэмээн мэдэгдсэн байна.
Израилын эрх баригчид АНУ-Ираны уг хэлэлцээрт оролцогч тал биш гэдгээ мэдэгджээ. Тус улсын Ерөнхий сайд Биньямин Нетаньяху АНУ-ын тал Ирантай тохиролцоонд хүрэхийн тулд Ливан дахь цэргийн ажиллагаагаа хязгаарлахыг шаардсаныг эсэргүүцэж, Д.Трамптай санал зөрөлдөөд байгаа юм.
Израил болон Ираны талыг баримтлагч, Ливан дахь "Хезболла" бүлэглэлийн хоорондох мөргөлдөөн нь өнгөрсөн хоёрдугаар сард Ираны эсрэг АНУ-Израилын цэргийн ажиллагааны дараа дахин дэгдсэн билээ.
Ираны өндөр албан тушаалтан өмнө нь "Reuters" агентлагт мэдээлэхдээ, хэлэлцээрийн төслийн нөхцөлийн дагуу АНУ нь Ираны царцаасан 25 тэрбум ам.долларын хөрөнгийг чөлөөлөхийг зөвшөөрөх бөгөөд үүний хариуд Ираны тал цөмийн зэвсэг үйлдвэрлэхгүй, эзэмшихгүй байхыг зөвшөөрсөн гэжээ. Түүнчлэн эцсийн хэлэлцээрт хүрэх хүртэл Ираны тал уран баяжуулахгүй байх, цөмийн байгууламжуудаа өргөтгөхгүй байх зэрэг үүрэг хүлээсэн гэж уг албан тушаалтан мэдэгджээ.
Эх сурвалж: МОНЦАМЭ Агентлаг Д.Жаргал
