.png){kind=logo}
Дэлхийн бөхийн нэгдсэн холбооны чөлөөт бөхийн чансааны оноо олгох цуврал тэмцээний энэ жилийн эхнийх "Загреб Опен" өнгөрсөн 7 хоногт болсон.
Тус тэмцээний дараа дэлхийн чансаа шинэчлэгдэж Хорватад 2 ялж шөвгийн наймд ялагдсан өнгөрсөн жилийн Белградын ДАШТ-ий мөнгөн медальт ОУХМ Б.Хулан 45520 оноотой болж эмэгтэйчүүдийн 53 кг жинд дэлхийн чансааг тэргүүлж эхэллээ.
Загребт энэ жинд мөнгөн медаль хүртсэн гавьяат тамирчин Б.Болортуяа 11400 оноотой 12 дугаар байр руу орж ирэв. Харин 65 кг-д түрүүлсэн ОУХМ Т.Тулга 13000 оноо цуглуулж мөн л 12 дугаар байр руу дэвшсэн. Эхний "Ranking Series"-т мөнгөн медаль хүртсэн ОУХМ Н.Наранхүү 37400 оноотой 61 кг-д гуравт, хүрэл медаль зүүсэн ОУХМ Г.Ганхуяг 20700 оноотой 92 кг-д 7 дугаар байрт тус тус бичигдэв.
Түүнчлэн 2022 оныг дэлхийн чансааг тэргүүлж үдсэн гавьяат тамирчин Д.Отгонжаргал алдарт Юи Сүсакид байраа алдаж 45200 оноотой 50 кг жинд аман хүзүүнд явж байна. Дэлхийн чансааны оноо олгох дараагийн тэмцээн энэ сарын 23-26-нд Египетийн Каир хотод болно.
