.png){kind=logo}
Улаанбаатар, 2025 оны дөрөвдүгээр сарын 4 /МОНЦАМЭ/. “Монголын Төмөр Зам” ТӨХК төрийн өмчит болон төрийн өмчийн оролцоотой аж ахуйн нэгжүүдтэй хамтран ажиллах санамж бичиг байгууллаа.
“Алсын хараа-2050” Монгол Улсын урт хугацааны хөгжлийн бодлого, Монгол Улсын Засгийн газрын 2020-2028 оны үйл ажиллагааны хөтөлбөрт дурдсан үндэсний төмөр замын тээвэр, логистикийн тогтолцоог хөгжүүлэх чиглэл, зорилтын хүрээнд Монгол Улсын Засгийн газрын 2024 оны 12 дугаар сарын 25-ны өдрийн 229 дүгээр тогтоол, мөн оны 2 дугаар сарын 12-ны өдрийн 86 дугаар тогтоолоор Багахангай-Хөшигийн хөндий чиглэлийн салбар төмөр замын төслийн бүтээн байгуулалтад шаардагдах хөрөнгийн эх үүсвэрийг богино хугацаанд, бүрэн бүрдүүлэх зорилготой.
Энэхүү шинээр баригдах салбар төмөр зам нь Багахангай өртөөнөөс салаалж Төв аймгийн Сэргэлэн сумын нутгаар дайрч Хөшигийн хөндий хүртэл нийт 102 км урт дан зам, 3 өртөө, 4 зөрлөгтэй, 2.5 км урт гүүрэн байгууламжтай байх бөгөөд барилгын ажлыг энэ сард эхлүүлэн наймдугаар сард дуусгахаар төлөвлөж байгаа аж.
Төрийн өмчит болон төрийн өмчийн оролцоотой аж ахуйн нэгжүүдийн хөрөнгө оруулалтаар хэрэгжүүлэх энэхүү төслийн захиалагч нь Зам тээврийн яам, зохион байгуулагч нь Төрийн өмчийн бодлого, зохицуулалтын газар юм. Төсөлд дотоодын 110 орчим ААН-ийн 2500 гаруй ажилтныг татан оролцуулж таван сарын хугацаанд “Монголын төмөр зам” ТӨХК компани хариуцан гүйцэтгэх юм.
Эх сурвалж: МОНЦАМЭ Агентлаг
