.png){kind=logo}
БРАЗИЛ-ПАРАГВАЙ 4:1
Эхний тоглолтод Коста Рикатай 0:0-ээр тэнцэж, фэнүүд, мэргэжилтнүүд, сэтгүүлчдэд ихээхэн шүүмжлүүлсэн Бразилийн шигшээ энэ удаа овоо " хүн шиг" тоглов.
Вини Жуниор хоёр гоол хийж тоглолтын гол баатар болсон. Гэхдээ хамгийн идэвхтэй тоглосон нь Лукас Пакета. Английн хөлбөмбөгийн холбооноос бооцоот тааварт оролцсон, нөлөөлсөн ( зориудаар шар хуудас авсан гэж үзэж шалгаж буй) гэсэн асуудлаар томоохон шийтгэл хүлээж магадгүй болоод байгаа "Вест Хэм"-ийн хагас хамгаалагч "Копа Америка"-д сэтгэл зүйн өндөр дарамттай тоглож буй нь лав.
Бразилийн багийн эхний "пенальти"-г Пакета хаалганы гадуур цохисон ч хоёр дахь " пенальти"-г Лукасаар дахин цохиулсан нь ийм учиртай. Багийнх нөхөд түүнд сэтгэл санааны дэмжлэг үзүүлж байна гэхэд болно.
Зөвхөн Лукас Пакетад бус Бразилийн шигшээд ч дэмжлэг хэрэгтэй байгаа. Энэ тоглолтод гэхэд л Зико, Неймар нар ирж, багийнхаа хувцас солих өрөөнд очиж тоглогчдод баяр хүргэсэн.
КОЛУМБИ -КОСТА РИКА 3:0
Бразилийн " балбаад балбаад" бараагүй шинэ залуу Коста Рикагийн "тоосыг" Хамес Родригес тэргүүтэй Колумби амархан гөвж, шөвгийн наймд шалгарах болзлоо биелүүллээ.
Колумби 2022 оны гуравдугаар сараас хойш 25 тоглолт хожигдол ( 20 хожил, 5 тэнцээ!!!) амсаагүй явна. Дахиад хоёр хожвол алдарт Вальдеррама, Эскобар, Игита нарын үеийн 90-ээд оны эхэнд 27 тоглолт хожигдоогүй рекордод хүрэх болно.
АРГЕНТИН-ПЕРУ 2:0
Энэ тоглолтод Аргентиний хоёр Лионель оролцсонгүй. Багийн ахлагч Месси гэмтлийн улмаас тоглолтыг өнжсөн бол дасгалжуулагч Скалони торгуулийн улмаас тоглолтод багаа удирдах эрхгүй болсон юм. Чилитэй хийсэн тоглолтод завсарлаад хоёрдугаар үеийн тоглолт эхлэхэд хоцорч талбайд багаа гаргасан тул энэ шийтгэл, мөн 15 000 долларын мөнгөн торгууль оноосон билээ. Канадтай хийсэн тоглолтод мөн Аргентинчүүд завсарлаад 20 минутын дараа талбайд гарч ирсэн. Дэлхийн аварга багт ч дүрэм журам үйлчилдэгээрээ үйлчилнээ.
Перугийн хаалганд Лаутаро Мартинес энэ тоглолтод хоёр гоол хийж "Копа"-ийн "мэргэн буучдын" жагсаалтыг 4 гоолтой тэргүүлж явна.
КАНАД -ЧИЛИ 0:0
Тоглолтын эхний хагас цагийн дотор Чилийн хамгаалагч Суасо хоёр шар хуудас авч талбайгаас хөөгдсөн нь эцсийн үр дүнд ихээхэн нөлөөллөө. Хүн дутуу 60 минут тоглосон Чиличүүд яаж ч хичээгээд " Венсеремос" болж чадсангүй.
"Агч навчны орны" хөлбөмбөгчид "Копа Америка"-д анх удаагаа оролцоод шөвгийн наймд үлдэж буй бол Андын нурууныхан 2004 оноос хойш анх удаагаа хэсгээсээ " цухуйсангүй".
Ц.Энхтүвшин Таван цагариг сонин
Мэдээллийн спонсор:
