.png){kind=logo}
Өмнөд Америкийн хөлбөмбөгийн аварга шалгаруулах 48 дахь удаагийн тэмцээн, "Копа Америка-2024" -ийн шөвгийн наймын тоглолтууд явагдаж, хагас шигшээд тоглох багууд тодорлоо. Шөвгийн наймын дөрвөн тоглолтын гурав нь үндсэн цагт тэнцэж, ялагчид 11 метрийн торгуулийн цохилтоор шийдэгдэв.
АРГЕНТИН-ЭКВАДОР 1:1 ( т.ц 4:2)
Дэлхийн аваргуудыг энэ тоглолтод хялбархан ялалт гэж хөлбөмбөг сонирхогчид бодож байсан байх. Гэвч Эквадорчууд Аргентиний эсрэг маш сайн тоглолоо. Эхний үед гэхэд л Эквадор гурван ч гоол оруулах сайхан боломжийг алдсан. Аргентин Лисандро Мартинесийн мөргөж оруулсан гоолын тэргүүллээр тоглолтын үндсэн цаг дуустал хошуучилж явсан ч 90+2 минутад Эквадорын Родригес тэнцээний гоолыг оруулж дөнгөсөн. Ингээд "Копа Америка" тэмцээний журам ёсоор цаг сунгахгүй шууд пенальти. Аргентин эхлэх болж Месси " паненка" цохилт хийсэн ч хөндлөвч оносон. Харин алдарч ахлагчийнхаа "алдааг" багийн нөхөд нь засч, үлдсэн цохилтуудыг алдсангүй. Хаалгач Эмилиано Мартинес Эквадорын хоёр ч пенальтиг хааж, багаа хагас шигшээд хөтөллөө.
ВЕНЕСУЭЛ-КАНАД 1:1 ( т.ц 3:4)
Канад эхний үед бол үнэхээр илүү тоглов. Боломжуудаа гүйцэд ашигласан бол эхний 45 минутад тоглолтын хувь заяаг шийдчих байлаа. Гэвч ганц гоол оруулсан нь хангалттай байсангүй. Хоёрдугаар үед Венесуэлийн ахлагч , гол довтлогч Рондон Канадын хамгаалагчийн алдаа, хаалгачийн хэт урагшаа гарсан байсныг мэдэрч маш холоос гоё гоол оруулж, тоог тэнцүүлсэн.
Тоглолт 1:1-ээр өндөрлөж, торгуулийн цохилтод Хойд Америкийн баг илүү оновчтой байж, хагас шигшээд шалгарлаа.
КОЛУМБ -ПАНАМА 5:0
Тоглолтын эхнээс л Колумби давамгайлж 15 минутад л тоо хэдийнэ 2:0 болов. Эхний үе 3:0 -ээр дуусч , Колумбын багийн ахлагч Хамес Родригес 1 гоол, хоёр дамжуулалт өгсөн.
32 настай Хамес энэ тэмцээнд 5 дамжуулалт+1 гоолтой яваа. "Копа Америка"-ийн сүүлийн 50 жилийн түүхэнд нэг тэмцээнд 5 дамжуулалт өгсөн тоглогч ердөө гурав л гарч ( 1997 онд Бразилийн Денилсон, 2004 онд Бразилийн Алекс, 2021 онд Месси)байжээ.
Колумбын шигшээ хожигдолгүй цувралын тоогоо 27 тоглолтод хүргэж, 1990-ээд оны " ах нарынхаа" рекордтой тэнцлээ.
УРУГВАЙ-БРАЗИЛ 0:0 (т.ц 4:2)
Бразилийн Винисиус Жуниор "шар жавтий"-ний улмаас энэ тоглолтод оролцох боломжгүй байсан тул 17 настай Эндрик анх удаагаа Бразилийн шигшээгийн гараанд ( өмнө нь 9 тоглолтод сэлгээнээс талбайд гарч 3 гоол оруулсан)гарав. Хоёрдугаар үед л ганц удаа хаалга руу цохисноос өөр онцгой зүйл ер харуулсангүй дээ.
Эртний " тооцоотой" хоёр баг тун тооцоотой хянуур тоглож, гоол хийхээс илүү гоол алдахгүй байх нь чухал гэж тоглов.
Уругвай маш их алдаа хийж байсан ч аргентин шүүгч бол " шар жавтий" өгөх нь бүү хэл алдаа ч заахгүй "нүдээ аньсан" олон удаа. 74 дэх минутад Родриго дээр Уругвайн Нандез маш аюултай алдаа хийхэд хүртэл дөнгөж шар хуудас гаргасан. Харин ВАР үзэж байж улаан хуудасны алдаа байсныг хүлээн зөвшөөрсөн. Ингээд үлдсэн 20 -оод минут Уругвай хүн дутуу тоглосон ч гоол алдалгүй тэнцэж дөнгөв.
Дахиад л " пенальти". Энэ удаа Уругвайн аз түшиж, хагас шигшээд шалгарлаа, 2011 оноос хойш анх удаагаа.
Харин Бразилийн "Селесао" маань бүтэлгүйтлийн түүхээ дахин нэгээр нэмээд нутаг буцлаа даа.
Хагас шигшээд Аргентин-Канад, Уругвай-Колумб долдугаар сарын 9,10-нд тоглоно.
Ц.Энхтүвшин Таван цагариг сонин
Мэдээллийн спонсор: OSSO Truck Driving School
