.png){kind=logo}
Токио хотноо үргэлжилж байгаа мэргэжлийн сумо бөхийн Аки башё буюу намрын тэмцээний 3 дахь өдөр Сэкивакэ Киришима Б.Лхагвасүрэн Таканошёо /М-1/-той учраа тааран барилдаж, түүнийг уватэдашинаге мэхээр давж 3 даваатай болов.
Озэки Хошёорюү С.Бямбасүрэн, Атамифүжи /М-2/-тэй таарч барилдан түүнд ёрикири мэхээр унаснаар ганц даваа, 2 унаатай башёг үргэлжлүүлж байна.
Хамгийн ахмад сумочдын нэг Тамаваши Б.Мөнх-Оргил /М-10/ энэ өдөр Кагаяаки /М-11/-тэй таарч барилдан түүнийг ошидаши мэхээр хаяж 1 даваа, 2 унаатай болоод байна.
Ташрамд дуулгахад, Тамаваши Б.Мөнх-Оргил энэ өдөр түүхэн барилдаан хийж мэргэжлийн сумо бөхөд ороод өнжилгүй 1631 барилдсан амжилтаар шинэ түүхэн амжилтын эзэн болж 1 дүгээрт бичигдлээ. Монгол эр хүний 40 нас ямар байдгийг ийнхүү нотлон харууллаа.
Харин энэ өдөр Ошома П.Дэлгэрбаяр /М-9/, Эндо /М-8/-той учраа тааран барилдаж түүнд ошитаоши мэхээр ойчиж, Аки башёг 2 унаа, 1 даваатай үргэлжлүүлж байна.
Энэ башёд Макүүчи буюу дээд зиндаанд анх удаа дэвшин барилдаж буй Онокацү Батжаргалын Чойжилсүрэн /М-14/ 3 дахь өдрийн барилдаанд Такаяасү /М-15/-тэй учраа таарч түүнийг ёрикири мэхээр давснаар эхний даваагаа авч башёг 1 даваа, 2 унаатай үргэлжлүүлж байна.
Харин энэ өдөр Озэки Котозакүра, Тобизарюү /М-1/-тэй барилдаж түүнийг ошидаши мэхээр хаяснаар 3 даваатай болоод байна.
Мөн энэ өдөр Озэки Оносато, Охо /М-2/-той барилдаж түүнийг ёрикири мэхээр хаяж 3 даваатай боллоо.
Комүсүби Дайэйшёо энэ өдөр Митакэүми /М-3/-тай таарч барилдан түүнийг ёритаоши мэхээр давснаар 1 даваа, 2 унаатай башёг үргэлжлүүлж байна.
Комүсүби Хирадоими, Сэкиваке Аби-тай барилдаж түүнийг ошидаши мэхээр давснаар Хирадоүми 2 даваатай болсон бол Аби 2 унаатай башёг үргэлжлүүлж байна
Энэ өдөр Сэкиваке Такакейшо, Вакамотохару /М-3/-тай таарч хүч үзэн барилдах байсан ч хүзүүний гэмтлийн улмаас башёг орхиж, Озэки цолоо эргүүлж авах боломжгүй боллоо.
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!