Худалдаа, эдийн засаг, шинжлэх ухаан, техникийн хамтын ажиллагааны Монгол, Лаосын Засгийн газар хоорондын комиссын 12 дугаар хуралдаан 2025 оны 01 дүгээр сарын 26-28-ны өдрүүдэд Бүгд Найрамдах Ардчилсан Лаос Ард Улсын нийслэл Вьентьян хотноо зохион байгуулагдаж байна.

Засгийн газар хоорондын комиссын хуралдааныг Монгол Улсын Зам, тээврийн сайд, Монголын хэсгийн дарга Б.Дэлгэрсайхан, Бүгд Найрамдах Ардчилсан Лаос Ард Улсын Эрүүл мэндийн сайд, Лаосын хэсгийн дарга Бүнфенг Фүммалайсит нар ахалж, хоёр улсын холбогдох яам, байгууллагын албаны хүмүүс оролцов.

Талууд хоёр улсын нийгэм, эдийн засгийн байдлын талаар харилцан мэдээлэл солилцож, Монгол, Лаос хоорондын худалдаа, эдийн засаг, зам тээвэр, эрүүл мэнд, хөдөө аж ахуй, байгаль орчин, соёл, боловсрол, аялал жуулчлалын хамтын ажиллагааны талаар хэлэлцэв.

Хуралдааны эхэнд талууд хоёр улсын харилцаа, хамтын ажиллагаа “Бие биеэ дэмжин харилцан ашигтай байх хамтын ажиллагааны зарчим”-д тулгуурлан бүхий л салбарт гүнзгийрэн хөгжиж, улс төрийн итгэлцэл бэхжиж, дээд, өндөр түвшний харилцан айлчлал, яриа хэлэлцээ тогтмолжиж байгааг сайшаан тэмдэглэв.

Сайд нар дээд түвшний харилцан айлчлалын үеэр тохирсон ажлыг эрчимжүүлж, бодит ажил хэрэг болгох, бие биеэ нөхсөн, харилцан ашигтай, иж бүрэн, цогц хамтын ажиллагааг хөгжүүлэхэд тус комисс чухал ач холбогдолтой болохыг тэмдэглэв.

Талууд хоёр улсын батлан хамгаалах салбарын харилцаа, хамтын ажиллагаа сүүлийн жилүүдэд идэвхжиж байгааг дурдаж, Батлан хамгаалах яамд хооронд 2022 онд байгуулсан санамж бичгийн хэрэгжилтийг хангаж ажиллахаар тохиров.

Талууд Монгол, Лаосын худалдааны эргэлтийг нэмэгдүүлэх хүрээнд хоёр орны давуу тал бүхий бараа, бүтээгдэхүүнийг хоёр улсын зах зээлд харилцан нийлүүлэх чиглэлд хамтран ажиллах, ялангуяа Монгол Улсаас Лаос Улсад мах, махан бүтээгдэхүүн, Лаос Улсаас Монгол Улсад цагаан будаа, жимс, жимсгэнэ, улаан модон бүтээгдэхүүн нийлүүлэх боломжийг эрэлхийлж ажиллахаар болов.

Талууд хөдөө аж ахуйн салбарын хамтын ажиллагааны хүрээнд Монгол Улсаас мал, малын гаралтай түүхий эд, малын үржүүлгийн бүтээгдэхүүнийг Лаос Улсад нийлүүлэх, мал эмнэлэг, хорио цээрийн гэрчилгээ, худалдааны нөхцөлийг харилцан тохирохоор болов.

Мөн хоёр улсын худалдаа, эдийн засгийн хамтын ажиллагаа, бараа бүтээгдэхүүний экспорт, импортыг дэмжихэд тээвэр, логистикийн асуудлыг шийдвэрлэхийн чухлыг онцлон тэмдэглэв.

Лаосын тал 2021 онд барьж, ашиглалтад оруулсан Вьентьян-Куньминь /БНХАУ/ хотыг холбосон 414 км төмөр зам нь Лаос төдийгүй бүс нутгийн тээвэр, логистикийн саад бэрхшээлийг бууруулах, иргэд хоорондын солилцоог нэмэгдүүлэхэд тодорхой хувь нэмэр оруулж байгааг тэмдэглэв.

Талууд хоёр улсын эрүүл мэндийн салбарын хамтын ажиллагаа амжилттай хөгжиж ирснийг тэмдэглээд Эрүүл мэндийн яамд хооронд байгуулсан санамж бичгийн хэрэгжилтийг хангах хүрээнд Лаосын эмч нарт зориулсан богино, дунд хугацааны сургалтыг зохион байгуулахаар тохиров.

Хоёр улсын аялал жуулчлалын компаниудын хооронд хэлхээ холбоо тогтоох, туршлага солилцох, соёлын аялал жуулчлалыг хөгжүүлэхэд хамтран ажиллахаар болов.

Мөн Боловсролын салбарт хамтран ажиллах тухай Засгийн газар хоорондын хэлэлцээрийн дагуу хоёр улсын ирээдүй болсон оюутан, залуусыг хоёр улсын Засгийн газрын тэтгэлгээр харилцан сургаж байгааг сайшаан тэмдэглэв.

Талууд хоёр улс НҮБ болон олон улсын хамтын ажиллагааны бусад байгууллагын хүрээнд идэвхтэй хамтран ажиллаж ирснийг тэмдэглээд цаашид ч уламжлалт байр сууриа хадгалж, хамтын ажиллагаагаа гүнзгийрүүлэн хөгжүүлэхийн төлөө буйгаа илэрхийлэв. Энэ хүрээнд Далайд гарцгүй хөгжиж буй орнуудын Олон улсын судалгааны төвийн үйл ажиллагааг эрчимжүүлэхэд үргэлжлүүлэн нягт хамтран ажиллахаар тохиров.

Лаосын тал Монгол Улс уур амьсгалын өөрчлөлт, цөлжилттэй тэмцэх, байгаль орчноо хамгаалахад чиглэсэн дэлхий нийтийн хүчин чармайлтад хувь нэмэр оруулж буйг дурдаж, 2026 онд Улаанбаатар хотноо зохион байгуулах НҮБ-ын Цөлжилттэй тэмцэх конвенцын оролцогч Талуудын 17 дугаар бага хурал (COP17)-д дээд түвшний төлөөлөгчийн оролцоог хангахад хамтран ажиллахаа илэрхийлэв.

Лаосын тал АСЕАН-ы яриа хэлэлцээний түнш, Зүүн Азийн дээд түвшний уулзалтад оролцогч улс болох, Ази, Номхон далайн эдийн засгийн хамтын ажиллагааны байгууллага (АПЕК)-д элсэх талаарх монголын талын эрмэлзлийг үргэлжлүүлэн дэмжиж ажиллахаа нотлов.

Энэ удаагийн Монгол, Лаосын Засгийн газар хоорондын комиссын ээлжит 12 дугаар хуралдаан ажил хэрэгч, халуун дотно уур амьсгалд болж, талууд хуралдааны дүнгээр эдийн засаг, худалдаа, зам тээвэр, хөдөө аж ахуй, эрүүл мэнд, боловсрол, аялал жуулчлал зэрэг бүхий л салбарын хамтын ажиллагааг шинэ шатанд хөгжүүлэх тухай протоколд гарын үсэг зурав.