.png){kind=logo}
Улаанбаатар театрын дуучин Батзаяагийн Мөрөн Дэлхийн хөгжмийн өв /World Music Heritage/ дуулах урлагийн олон улсын уралдаанд тэргүүн байр эзэллээ.
ОХУ-ын П.И.Чайковскийн нэрэмжит Москвагийн Консерваторийн " Метрополитан" танхимд энэ сарын 14-ны өдрөөс эхлээд буй "World Music Heritage" Олон улсын дуулах урлагийн VII уралдааны сонсголд өрсөлдсөн ОХУ, БНХАУ, Бүгд Найрамдах Беларусь, Монгол Улс, Бүгд Найрамдах Армени улсын 100 дуучдаас сонгодог дуурийн (академический вокал) төрлийн 17-25 дунд насны ангилалд Монгол Улсын Улаанбаатар театрын гоцлооч, 23 настай бас-баритон Батзаяагийн Мөрөн тэргүүн байрт шалгарлаа.
Жузеппе Вердигийн " Макбет" дуурийн Банкогийн ари, Модест Мусоргскийн 1879 онд Иоганн Вольфганг фон Гётегийн " Фауст"-ын орос орчуулгын үгэнд бичсэн "Песня о блохе" романсыг эгшиглүүлсэн дуучин Б.Мөрөн "GRAND-ТУР"-т дуулах 6 дуучны тоонд шалгарч өнөөдөр Гран при шагналын төлөө өрсөлдөх болно.
"World Music Heritage" Олон улсын дуулах урлагийн уралдаан долоо дахь жилдээ Оросын нийслэлд явагдаж байгаа бөгөөд энэ удаагийн уралдааныг Оросын нэрт хөгжмийн зохиолч Георгий Свиридовын мэндэлсний 110 жилийн ойд зориулж буй.
Ташрамд сонирхуулахад, Тус уралдааны ерөнхий шүүгчээр ОХУ-ын дуурийн урлагийн нэрт зүтгэлтэн, Метрополитен-Опера, Ла Скала, Гранд Опера, Ковент-Гардены гоцлооч бас-баритон Денис Седов ажиллаж байна.
Монголынхоо дуучныг энэхүү уралдаанд оролцоход ивээн тэтгэсэн "Монгол Улсын аварга, Шилдэг тариаланч" хамт олон болох "Буянт Төв" компанийг үүсгэн байгуулагч, ОХУ-ын Фосагро болон Кирово-Черепецкийн химийн үйлдвэрүүдийн Монгол Улс дахь түнш ноён Ж.Саруулд талархал илэрхийлж байна.
World Music Heritage Олон улсын дуулах урлагийн долоо дахь уралдааны Гран при шагналтнаас гадна энэ орой "ШИЛДЭГ СОПРАНО 2025", "ШИЛДЭГ МЕЦЦО-СОПРАНО 2025", "ШИЛДЭГ КОЛОРАТУРНОЕ СОПРАНО 2025", "ШИЛДЭГ ТЕНОР 2025", "ШИЛДЭГ БАРИТОН 2025", "ШИЛДЭГ БАС 2025" дуучныг тус тус тодруулан нэрлэх юм байна.
Эх сурвалж: ОХУ-тай Хамтран ажиллах санаачилгын Монголын төвийн захирал МУСТА, доктор( Ph.D), дэд проф. Дамдиндоржийн Цэцэгдэлгэр Москва хотоос мэдээллээ.
