.png){kind=logo}
ВАШИНГТОН, 2025 оны гуравдугаар сарын 28 /CNN/. Газар доор 50 гаруй жилийн турш булаастай байсан зоосны асар том цуглуулга 100 сая гаруй ам.долларын үнэд хүрэх төлөвтэй байгаа тухай мэргэжилтнүүд мэдээлжээ.
Дуудлага худалдаанд тавигдаж буй хамгийн үнэтэй зоосны цуглуулга хэмээн үзэж буй “Аялагчийн цуглуулга” гэдэг нэртэй цуглуулга ирэх гурван жилийн хугацаанд зарагдах бөгөөд эхний худалдаа ирэх тавдугаар сарын 20-нд болно.
Дуудлага худалдаагаар зарагдах үнийн дүн ямар ч байлаа гэсэн эдгээр зоосны түүх нь үнэхээр гайхалтай юм. Дэлхийн 100 гаруй улс орон, нутаг дэвсгэрт эрт дээр үеэс эхлээд орчин үед хэрэглэж буй зооснуудаас бүрдсэн цуглуулгыг “Numismatica Ars Classica” дуудлага худалдааны ордонд үнэ хаялцуулахаар төлөвлөж байна. Энэхүү цуглуулгыг илүү гайхалтай болгож буй өөр нэгэн шалтгаан бол зооснуудын ихэнх нь хагас зуун жилийн турш газар доор булаастай байсан явдал юм.
Дуудлага худалдааны талаар хэвлэлийн мэдээнд дурдсанаар, анхны цуглуулагч нь 1929 оны Уолл Стритийн хямралын дараа анх алтан зоос худалдаж авч эхэлсэн байна. Тэрбээр удалгүй түүхэн, гоёмсог, ховор зооснуудыг цуглуулах хоббитой болж, улмаар 15 мянга орчим ширхэг зоостой болжээ. Тэр цуглуулагч 1930-аад онд эхнэрийн хамт Америк, Европоор аялж, түүхэн ховор зооснуудыг цуглуулснаас гадна энэ талаар дэлгэрэнгүй мэдээллийг бичиж үлдээжээ. Гитлерийн нацист нам Европ тив даяар хар сүүдрээ тусгаж байсныг үл эмээн гэр бүлийн хоёр Европт суурьшжээ. Тэд зооснуудыг эхлээд тамхины хайрцагт, дараа нь хөнгөн цагаан хайрцагт хийж, газарт булсан нь удахгүй ирэх аюулыг мэдэрсэнтэй холбоотой байж магадгүй юм.
Цуглуулагчийн хийсэн нарийвчилсан бүртгэл нь зоосны гарал үүсэл, үнэ цэнийг тодорхойлоход маш их тус болсон бөгөөд зарим зоосыг XIX зууны сүүлч, XX зууны эхэн үеэр болсон дуудлага худалдаануудаас худалдан авчээ. Онцлох зооснуудаас дурдвал, Хабсбургийн хаан III Фердинанд 1629 онд Унгар, Хорват, Чехийн хаан байхдаа цутгасан 100 дукатын алтан зоос юм. Нийт 348.5 гр алтаар бүтсэн энэ зоос Европын хамгийн том алтан зооснуудын нэг ажээ.
Эх сурвалж: МОНЦАМЭ Агентлаг Э.Хулан
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!