.png){kind=logo}
Уур амьсгалын өөрчлөлтийн нөлөөг сааруулах зорилгоор Монгол Улс болон БНСУ өнөөдөр /2025.05.28/ Парисын хэлэлцээрийн 6.2 дугаар зүйлийн хүрээн дэх Хамтарсан зохицуулах хорооны анхдугаар хурлыг хийж, хамтын ажиллагааг шинэ шатанд гаргасан томоохон үйл явдал боллоо.
2013 онд Япон улстай уур амьсгалын чиглэлээр хамтарсан хороо байгуулснаас хойш, 12 жилийн дараа стратегийн түнш БНСУ-тай энэхүү хамтарсан зохицуулах хороог байгуулж, Монгол Улсын Уур амьсгалын өөрчлөлтийн тулгамдсан асуудлуудыг шийдвэрлэхэд Солонгос Улсын технологи, хөрөнгө оруулалтыг татах боломж албан ёсоор нээгдэж байгаагаар онцлог юм.
Уур амьсгалын өөрчлөлтийн тулгамдсан асуудлуудыг хамтрагч улсын хөрөнгө оруулалт, технологийн тусламжтайгаар шийдэж, хариуд нь нүүрстөрөгчийн ялгарлын бууралтаас үүсэх карбон кредитийг хамтрагч тал руу шилжүүлэх уг тогтолцоо нь Парисын хэлэлцээрийн 6.2 дугаар зүйлийн хүрээнд зохицуулагдах харилцан ашигтай хамтын ажиллагаа юм.
Хурлын үеэр Монгол Улсын талаас Парисын хэлэлцээрийн 6.2-р зүйлийг хэрэгжүүлэх тухай дотоодын бодлого, хууль эрх зүйн орчны талаар, БНСУ-ын талаас Парисын хэлэлцээрийн 6.2-р зүйлийг хэрэгжүүлэх хоёр талт хамтын ажиллагааны талаар болон Засгийн газар хоорондын хамтын ажиллагааны санаачилга, Улаанбаатар хотын Нарангийн энгэрийн хогийн цэгийн метан хийг ялгах төслийн талаар тус тус мэдээлэл солилцоо.
Монгол Улсын Засгийн газар, Бүгд Найрамдах Солонгос Улсын Засгийн газартай 2023 онд байгуулсан Уур амьсгалын өөрчлөлтийг сааруулахад хамтран ажиллах тухай Засгийн газар хоорондын суурь хэлэлцээрийн хүрээнд БНСУ-ын холбогдох байгууллагуудтай хамтран Улаанбаатар хотын агаарын бохирдлыг бууруулах тал дээр цогц төсөл арга хэмжээ хэрэгжүүлэх мастер төлөвлөгөөг 2025 ондоо багтаан дуусгаж, хэрэгжүүлэхээр талууд тохиролцлоо.
Мөн хорооны ажиллах дүрэм болон цаашдын хамтран ажиллах цар хүрээ, баримтлах зарчмыг баталлаа.
Хамтарсан зохицуулах хорооны анхдугаар хуралд Монгол Улсын талаас БОАЖЯ, АҮЭБЯ, ХББОСЯ, ЭХЯ, ЭЗХЯ, ХХААХҮЯ, ЗТЯ, ГХЯ, Эрчим хүчний зохицуулах хорооны төлөөлөл, БНСУ-ын талаас Гадаад харилцааны яам, Байгаль орчны яам, Худалдаа, аж үйлдвэр, эрчим хүчний яам, Элчин сайдын яам болон бусад холбогдох албан төлөөлөл оролцлоо.
