Монголын банкны холбоо (МБХ)-ны ээлжит ХX чуулган, МБХ-ны 25 жилийн ойн хүндэтгэлийн хүлээн авалт 2025 оны 12 дугаар сарын 05-ны өдөр боллоо.

Жил бүр болдог МБХ-ны чуулганы үеэр Монголын банк, санхүүгийн салбарын өнөөгийн нөхцөл байдал, хэтийн төлвийг хэлэлцэж, цаашид хийгдэх ажлуудын талаар банкны салбарын топ удирдлагууд санал бодлоо хуваалцдаг уламжлалтай. Мөн чуулган нь МБХ-ны эрх барих дээд бүтэц бөгөөд удирдлагын багийн бүрэн эрхийн хугацааг баталгаажуулдаг юм.

МБХ-ны Удирдлагын баг нь ерөнхийлөгч, гурван дэд ерөнхийлөгч, гүйцэтгэх захирал бөгөөд ерөнхий нарийн бичгийн дарга гэсэн бүрэлдэхүүнтэй. МБХ-ны XX чуулганаар Ерөнхийлөгч Б.Мэдрээгийн бүрэн эрхийн хугацаа дуусаж, шинэ Ерөнхийлөгчөөр Ариг банкны Гүйцэтгэх захирал О.Хүрэлбаатар сонгогдлоо.

Тэрбээр олон улсын эдийн засгийн харилцааны магистрын зэрэгтэй, банкны салбарт нийт 38 жил ажиллаж буй шилдэг, туршлагтай банкируудын нэг юм. О.Хүрэлбаатар нь Улсын банк болон Худалдаа, хөгжлийн банк, Монгол шуудан банк, Капитрон банкуудад хэлтэс, газрын захирал, гүйцэтгэх захирал, ТУЗ-ийн гишүүн, ТУЗ-ийн дарга зэрэг удирдах албан тушаалуудыг хашиж, ажилласан. МБХ-ны ерөнхийлөгчөөр ажиллах хугацаандаа, МБХ-ны 2030 он хүртэлх дунд хугацааны стратегийг боловсруулан батлуулах, санхүүгийн салбарын хөгжил, хууль эрх зүйн орчныг сайжруулах, иргэдийн санхүүгийн суурь боловсролыг сайжруулах чиглэлд анхаарч ажиллана гэдгээ мэдэгдлээ.

Тус чуулганаар Дэд ерөнхийлөгч, Голомт банкны Ерөнхийлөгч Г.Ганболдын бүрэн эрхийн хугацааг дахин нэг жилээр сунгав. Мөн Тээвэр хөгжлийн банкны Гүйцэтгэх захирал Б.Эрдэнэбаяр, Худалдаа, хөгжлийн банкны Гүйцэтгэх захирлын орлогч П.Мөнхнаст нар МБХ-ны дэд ерөнхийлөгчөөр сонгогдлоо. Харин Гүйцэтгэх захирал бөгөөд ерөнхий нарийн бичгийн даргаар Л.Амар ажиллаж байна.

Б.Эрдэнэбаяр нь 2024 оноос хойш Тээвэр хөгжлийн банкны Гүйцэтгэх захирлаар ажиллаж байна. Тэрбээр банк, санхүүгийн салбарт 17 дахь жилдээ ажиллаж байгаа туршлагатай бөгөөд 2008 онд Хасбанкнаас ажлын гараагаа санхүүгийн шинжээчээр эхлэж, 2017 он хүртэл санхүү удирдлагын хэлтсийн захирал, бизнес хөгжлийн хэлтсийн захирлаар ажилласан. 2020 оны 3 дугаар сараас Кредит банкны Гүйцэтгэх захирал, 2020 оны 12 дугаар сараас Тээвэр хөгжлийн банкны Гүйцэтгэх захирал, 2023 оноос Тээвэр хөгжлийн банкны ТУЗ-ийн даргаар ажилласан.

П.Мөнхнаст нь 2022 оноос хойш Худалдаа, хөгжлийн банкны Гүйцэтгэх захирлын орлогчоор ажиллаж байгаа бөгөөд 2007 оноос хойш Худалдаа, хөгжлийн банканд үнэлгээний шинжээч, банкны ахлах ажилтан, газрын орлогч захирал, газрын захирлаар, 2004-2007 оны хооронд Улаанбаатар хотын банканд нягтлан бодогч, мэргэжилтнээр ажилласан салбартаа мэргэжлээрээ 21 жил ажиллаж буй удирдах ажилтан юм.

Өнгөрсөн 2022-2024 оны хооронд банкны салбартаа мэргэжлийн манлайлал гарган ажилласан Ерөнхийлөгч асан Б.Мэдрээ, Капитрон банкны Гүйцэтгэх захирал Б.Үүрцайхбаатар, Богд банкны Гүйцэтгэх захирал Г.Саруул нарт талархлаа илэрхийлж, цаашдын ажил үйлсэд нь амжилт хүсье.

МБХ нь салбарын мэргэжлийн холбоо болохын хувьд 2013 оноос хойш Монгол Улсын банк, санхүүгийн салбарын даацтай хөгжил, эрх, тэгш өсөлтийг хангахад манлайлан оролцсон, банкны байгууллагыг хөгжүүлж, бэхжүүлэхэд үлэмж их хувь нэмэр оруулсан зүтгэлтэн, банк, санхүүгийн салбарын удирдах ажилтанг тодруулан МБХ-ны Дээд шагнал “Хаш эрдэнийн одон”-г гардуулж эхэлсэн билээ.

Банкны салбарын дээд шагнал болох 15 дахь удаагийн “Хаш эрдэнийн одон”-гийн эзнээр, МБХ-ны шинэ Ерөнхийлөгч, Ариг банкны Гүйцэтгэх захирал О.Хүрэлбаатар тодорсон юм. Монгол Улсын Гавьяат эдийн засагч О.Хүрэлбаатар нь Ариг банкны Гүйцэтгэх захирлаар томилогдон ажиллаж буй сүүлийн зургаан жилийн хугацаанд, банкны актив хөрөнгийг 102 тэрбумаас 770 тэрбум төгрөгт хүргэн, ашигт ажиллагааг нэмэгдүүлж, алдагдлыг түргэн хугацаанд арилгаж, салбарын хэмжээнд банкны эзлэх байр суурийг дээшлүүлэн, Ариг банк анх удаа Монгол Улсын ТОП-100 ААН-ийн нэг болсон. Түүний банкны салбарт оруулсан хувь нэмрийг үнэлж 2000 онд Санхүү банкны тэргүүний ажилтан цол тэмдэг, 2014 онд Хөдөлмөрийн гавьяаны улаан тугийн одон, 2024 онд Монгол Улсын Ерөнхийлөгчийн зарлигаар Гавъяат эдийн засагч цол тэмдгээр шагнасан.

Шагнал гардуулах ёслолын үеэр мөн банкны салбарын шилдгийн шилдгүүдийг тодруулдаг МБХ-ны 15 дахь удаагийн “Шилдэг банкир” шагналыг уламжлал ёсоор дараах банкируудад олгов;

• Ариг банкны Бизнес банкны газрын захирал Ж.Мөнх-Итгэлт,
• Богд банкны Бизнес банк хариуцсан захирал М.Алтанбагана,
• Голомт банкны Нөөцийн удирдлагын газрын захирал Б.Содболор,
• Капитрон банкны Хүний нөөцийн газрын захирал Ч.Халиун,
• М банкны Төлбөр тооцоо, үйл ажиллагааны хэлтсийн захирал Д.Нандин-Эрдэнэ,
• Хасбанкны Санхүү хариуцсан захирал Г.Тамир,
• ХААН Банкны Санхүүгийн эрсдэл хариуцсан Дэд захирал Д.Өлзийжаргал,
• Худалдаа, хөгжлийн банкны Иргэдийн бизнес хариуцсан Гүйцэтгэх захирлын орлогч П.Мөнхнаст,
• Төрийн банкны Хууль, эрх зүй хариуцсан Дэд захирал Б.Амарсанаа,
• Тээвэр хөгжлийн банкны Хөрөнгө зохицуулалт хариуцсан захирал Т.Максат,
• Монголын ипотекийн корпорацийн Төлбөр тооцооны хэлтсийн захирал Н.Эрдэнэчимэг,
• 360 файнанс ББСБ-ын Систем аналист Ч.Оюунчимэг,
• Монголын тогтвортой санхүүжилтийн хөгжлийн холбооны Ерөнхий менежер Э.Ариунаа.

Түүнчлэн, МБХ-ны үйл ажиллагаанд идэвх, санаачилгатай оролцож, банкны салбарын хөгжил, манлайлалд үнэтэй хувь нэмэр оруулан ажилласан дараах хүмүүст МБХ-ны нэрэмжит “Талархал” цомыг гардууллаа;

• МБХ-ны Хуулийн мэргэжлийн зөвлөлийн дарга, Худалдаа, хөгжлийн банкны Хууль, эрх зүйн бодлогын газрын захирал Л.Анхбаяр,
• МБХ-ны Мэдээллийн аюулгүй байдлын мэргэжлийн зөвлөлийн дарга, Тээвэр хөгжлийн банкны МАБ-ын хэлтсийн захирал Б.Болдбаяр,
• МБХ-ны Дотоод аудитын мэргэжлийн зөвлөлийн дарга, ХААН Банкны Ерөнхий аудитор Д.Дугарбаатар,
• МБХ-ны Хөрөнгө зохицуулалтын мэргэжлийн зөвлөлийн дарга, ХААН Банкны Хөрөнгийн удирдлагын газрын захирал М.Маргадмөн,
• МБХ-ны Комплаенсын мэргэжлийн зөвлөлийн дарга, ХААН Банкны Комплаенсын газрын захирал М.Чанцалмаа,
• Банк санхүүгийн академийн Гүйцэтгэх захирал Г.Бумчимэг,
• Тэрбум мод сангийн УЗ-ийн гишүүн О.Энхтуяа,
• Азийн хөгжлийн банкны Ахлах эдийн засагч З.Мөнх-Оргил.

Шагнал гардуулах ёслолын үеэр банкуудын үүсгэн байгуулсан Тэрбум мод сангийн 2025 оны “Шилдэг дэмжигч байгууллага”-ыг тодруулах ёслол болсон бөгөөд Төрийн банк шалгарсан юм.

МБХ нь 2000 оны 9 дүгээр сарын 29-ний өдөр арилжааны 16 банк, гурван ББСБ-ын гишүүнчлэлтэйгээр үүсгэн байгуулагдаж байсан бол өдгөө Монгол Улсад үйл ажиллагаа явуулж буй 12 банк болон гадаадын банкны төлөөлөгчийн газар, санхүүгийн салбарын дэд бүтцийн чиглэлийн байгууллагууд, финтек компаниуд зэрэг нийт 38 байгууллагыг эгнээндээ нэгтгэсэн, салбарын хөгжилд бодитой хувь нэмэр оруулж буй үндэсний хэмжээний мэргэжлийн холбоо болон өргөжин хөгжиж байна.

МБХ-ны нийт гишүүн байгууллагууд болон шагнал хүртсэн салбарын мэргэжилтнүүддээ талархал илэрхийлж, амжилтын дээдийг хүсэхийн ялдамд, ирж буй ондоо бидний хамтын ажиллагаа улам дэвжихийн ерөөлийг өргөе.

МОНГОЛЫН БАНКНЫ ХОЛБОО