.png){kind=logo}
СӨҮЛ. 2026 оны хоёрдугаар сарын 13 /Yonhap/. К-поп ертөнцийн хамгийн алдартай хамтлаг болох BTS дэлхийг тойрон хийх "Arirang" хэмээх шинэ аялан тоглолтынхоо нээлтийг БНСУ болон дэлхийн улс орнуудын кино театруудаар шууд дамжуулахаар болсон тухай тус хамтлагийн "BigHit Music" агентлаг мэдэгдлээ.
Сөүл хотоос баруун хойд зүгт орших Гоян хотод энэ оны дөрөвдүгээр сарын 11-нд, Японы Токио хотод дөрөвдүгээр сарын 18-нд болох тоглолтуудыг дэлхийн 75 улсын 3 500 гаруй кино театрт зэрэг үзүүлэх ажээ. Цагийн зөрүүнээс шалтгаалан зарим бүс нутагт бага зэрэг хойшлуулж дамжуулна гэж компани мэдэгджээ.
Өмнөд Солонгост шууд дамжуулалтыг кино театрын томоохон сүлжээнүүд болох CGV, Lotte Cinema, Megabox зохион байгуулах бөгөөд тасалбарын захиалгыг энэ сарын 25-ны өдрийн 10:00 цагт эхлүүлнэ.
Эдгээр тоглолт нь K-pop уран бүтээлчдийн түүхэн дэх хамгийн том аялан тоглолтыг эхлүүлнэ гэж BigHit Music онцолжээ. Тус хамтлаг нийт 34 хотод 82 тоглолт толилуулах бөгөөд Хойд Америк, Европт болох 41 тоглолтын тасалбар аль хэдийн зарагдаж дууссан, Гоян хот дахь тоглолтуудын тасалбар мөн зарагдаж дуусжээ.
Мөн Лондоны хотын Tottenham Hotspur Stadium цэнгэлдэхэд долоодугаар сарын 6, 7-нд хоёр өдөр дараалан нийт 120 мянган үзэгчийн өмнө тоглох бөгөөд энэ нь үзэгчдийн тоогоор шинэ дээд амжилт болох юм.
Энэхүү аялан тоглолт нь хамтлагийн тав дахь бүрэн хэмжээний цомог “Arirang”-ын нээлтийн дараа болох бөгөөд цомог гуравдугаар сарын 20-нд худалдаанд гарах юм. Шинэ цомгийн нээлттэй холбогдуулан “BTS The City Arirang Seoul” гэдэг нэртэй соёлын цогц үйл ажиллагаа зохион байгуулахаар төлөвлөжээ. Хөгжим, медиа арт, хотын инсталляцыг хослуулсан уг үйл ажиллагаа гуравдугаар сарын 20-ноос дөрөвдүгээр сарын 1 хүртэл Сөүл хот даяар болно.
Эх сурвалж: МОНЦАМЭ Агентлаг Г.Энх-Од
