.png){kind=logo}
Японы мэргэжлийн сумо бөхийн Токио хотноо үргэлжилж байгаа тавдугаар сарын Зуны башёгийн 6 дахь өдрийн /2023.05.19/ барилдааны тоймыг та бүхэнд танилцуулж байна.
Их аварга Тэрүнофүжи Г.Ган-Эрдэнэ, энэ өдөр Нишикиги /М-4/-тэй хүч үзэж түүнийг котонаге мэхээр хаяснаар 6 даваатай болж Мэйсей /М-6/, Асанояама /М-14/ нарын хамт башёг тэргүүлж байна.
Энэ өдөр Сэкиваке Кирибаяама Б.Лхагвасүрэн, Тобизарюү /М-3/-тай таарч барилдан түүнийг уватэнаге мэхээр хаяж 5 даваа, 1 унаатай башёг үргэлжлүүлж байна.
Харин Сэкиваке Хошёорюү С.Бямбасүрэн, Сэкиваке Дайэйшёо-той учраа таарч барилдан түүнд ошидаши мэхээр унаснаар 2 унаа, 4 даваатай явна.
Мэргэжлийн сумо бөхийн тэмцээний 6 дахь өдөр Тамаваши Б.Мөнх-Оргил /М-7/, Кинбозан /М-5/-тай барилдаж, түүнд цүкүотоши мэхээр унаснаар ганц даваа, 5 унаатай боллоо.
Миторюү М.Төрболд /М-16/ энэ өдөр Асанояама /М-14/-тай барилдаж түүнд ёрикири мэхээр ойчиж 4 даваа, 2 унаатай байгаа бол Асанояама 6 даваатай башёг тэргүүлэгчдийн эгнээнд явна.
Чиёошома Г.Мөнхсайхан /М-13/, Кагаяаки /М-17/-тай учраа таарч барилдан түүнийг хатакикоми мэхээр давснаар 3 унаа, 3 даваатай башёг үргэлжлүүлж байна.
Дээд зиндаанд /2 башё/ дэвшин барилдаж байгаа Хокүсейхо Э.Даваанинж /М-11/, өнөөдөр Котоеко /М-12/-тэй учраа таарч түүнийг ёрикири мэхээр давснаар 5 даваа, 1 унаатай болов.
