.png){kind=logo}
Олон улсын сагсанбөмбөгийн холбоо /FIBA/-ны 3х3 сагсанбөмбөгийн Дэлхийн аварга шалгаруулах тэмцээнд Монгол Улсын эрэгтэй шигшээ баг дөрөв дэх удаагаа оролцоход бэлэн болоод байна.
Австри улсын Вена хотноо өнөөдөр буюу энэ сарын 30-наас 6 дугаар сарын 4 хүртэл үргэлжилж 2023 оны FIBA 3x3 дэлхийн аварга багийг тодруулах энэ удаагийн тэмцээнд Улаанбаатар ММС Энержи багийн гол тоглогч Э.Дөлгөөн гэмтэж, Стив Сир тэмцээнд оролцохгүй байгаа тул бүрэлдэхүүнээ шинэчлэх хэрэгтэй болсон.
Улаанбаатар ММС Энержи баг Сербид төрсөн, Монтенегро иргэншилтэй Марко Дугосия хэмээх 32 настай, 198 см өндөртэй тамирчныг эгнээндээ нэгтгэж буйгаа зарлав.
Өнөөдөр /2023.05.30/ 3х3 сагсан бөмбөгийн ДАШТ эхэлнэ. Монголын эмэгтэй шигшээ баг өнөөдөр эхний тоглолтоо 17.25 цагаас Унгарын эсрэг, удаах тоглолтоо 19.25 цагаас Чехийн эсрэг тус тус хийх бол эрэгтэй шигшээ баг 31-ний өдөр 18.00 цагаас Унгарын эсрэг, 20.00 цагаас Нидерландын эсрэг тус тус хийнэ.
Хамгийн анх 2018 онд Филиппин улсын нийслэл Манила хотод зохион байгуулсан дэлхийн аварга шалгаруулах тэмцээнд гавьяат дасгалжуулагч С.Тулгын удирдлага дор Монголын шигшээ баг оролцож 8 дугаар байрт орсон билээ. Одоогоор FIBA 3X3 ДАШТ-д Монгол улсын шигшээ багийн үзүүлсэн хамгийн өндөр амжилт энэ юм. Манай эрэгтэй шигшээ баг 2019 онд 13 дугаар байрт, 2022 онд есдүгээр байрт орсон амжилтыг үзүүлээд байна.
Олон улсын сагсанбөмбөгийн холбоо /FIBA/-ны 3x3 сагсанбөмбөгийн дэлхийн аварга шалгаруулах тэмцээний түүхэнд эрэгтэй шилдэг наймд шалгарсан Азийн хоёр л улс байдаг аж.
Эхний баг нь Катарын шигшээ бол хоёр дахь нь Монгол Улсын шигшээ баг юм. Монгол Улсын шигшээ багийн хувьд 2018 онд анх удаа оролцож шилдэг наймд шалгарч байсан түүхтэй билээ.
