.png){kind=logo}
Монгол Улсыг төлөөлж Стандарт, хэмжил зүйн газар нь Ази номхон далайн хэмжил зүйн хөтөлбөр (АРМР) бүс нутгийн олон улсын байгууллагын жинхэнэ гишүүнээр 2002 онд элссэн юм.
Тэгвэл Стандарт, хэмжил зүйн газар нь Ази номхон далайн хэмжил зүйн хөтөлбөр (АРМР)-ын 2023 оны хагас жилийн уулзалт, хурлын арга хэмжээг 6 дугаар сарын 12-16-ны өдрүүдэд “Blue Sky” зочид буудалд зохион байгуулна.
Уг хуралдаанаар бүс нутгийн олон улсын байгууллагын хэтийн зорилго, стратеги төлөвлөгөө, үйл ажиллагааны тайлан, зохион байгуулалт, гишүүнчлэлийн асуудал, санхүүжилт, хэрэгжүүлж буй төсөл хөтөлбөр, хэмжил зүйн эрдэм шинжилгээ, судалгааны болон олон улсын харьцуулалтын тайлангууд, эталоны хэмжил, шалгалт тохируулгын үр дүнг олон улсад хүлээн зөвшөөрсөн талаарх мэдээлэл зэргийг хэлэлцэхээс гадна цаашид хэрэгжүүлэх арга хэмжээ, зорилтыг хэлэлцэн шийдвэрлэдэг юм.
Энэ удаагийн уулзалтаар АРМР олон улсын байгууллагын Удирдах зөвлөлийн ба Техникийн хороодын дарга нарын хурал, Хөгжиж буй орны хэмжил зүйн хүрээлэн байгууллагын хуралдаан, семинар, Стандарт, хэмжил зүйн газраас Техникийн хороодтой хамтран зохион байгуулах “BIPM - АРМР-ын Чанарын Техникийн хорооны олон улсын семинар”, Олон улсын симпозиумыг тус тус зохион байгуулна.
Уг 2023 оны хагас жилийн хурлыг Монгол Улсад зохион байгуулснаар Ази номхон далайн бусад улс орны хэмжил зүйн хүрээлэн байгууллагуудын туршлагаас суралцах, судлах, хэмжил зүйн хөгжлийн олон улсын чиг хандлага, үйл ажиллагааны талаар мэдээлэл олж авах, бүс нутгийн хэмжил зүйн олон улсын байгууллагын үйл ажиллагаанд идэвхтэй оролцох, цаашид хэмжил зүйн олон улсын байгууллагууд ба бусад улс орны хэмжил зүйн хүрээлэнгүүдтэй хамтран ажиллах талаар санал солилцон хэрэгжүүлэх, өөрийн орны хэмжил зүйн байгууллагын үйл ажиллагааг олон улсад сурталчлан танилцуулах ач холбогдолтой юм.
Энэхүү хөтөлбөрийн ерөнхий чуулганы хуралдаан жил бүрийн 11 дүгээр сард болж, хагас жилийн хуралдаан зургаадугаар сард цахим хосолсон хэлбэрээр тус тус хуралддаг уламжлалтай.
Ази номхон далайн хэмжил зүйн хөтөлбөр (АРМР) нь гишүүн байгууллагуудынхаа дунд хэмжил зүйн шинжлэх ухаан, техникийн мэдээлэл, туршлага солилцох замаар бүс нутгийн хэмжил зүйн хүрээлэн байгууллагын чадавхыг нэмэгдүүлэх үйл ажиллагаа явуулдаг бүсийн орнуудын Үндэсний хэмжил зүйн хүрээлэнгүүдийн хамтарсан байгууллага юм.
