.png){kind=logo}
Монгол Улсын нийслэл Улаанбаатар хотноо наймдугаар сарын 16-23-нд зохион байгуулж буй Зүүн Азийн залуучуудын наадмын албан ёсны нээлт 2023 оны 8 дугаар сарын 17-ны 20 цаг 23 минутад эхэллээ.
Нээлтийн ёслол улс орнуудын үндэсний олимпын хорооны тамирчдын жагсаалаар үргэлжилж, Зүүн Азийн олимпын хорооны тугийг мандуулан, наадмын сүлд дууг дуулсан юм. Наадмын нээлт өчигдөр 20.23 цагт эхлэх байсан ч цаг агаарын нөхцөл байдлын улмаас 24 цагаар хойшилсон юм.
Зүүн Азийн олимпын хороо нь есөн үндэсний олимпын хороог өөртөө нэгтгэдэг. "Улаанбаатар 2023" Зүүн Азийн залуучуудын наадамд долоон үндэсний олимпын хорооны 870 гаруй тамирчин 11 спортын 12 төрлөөр өрсөлдөж байгаа.
“Улаанбаатар Зүүн Азийн залуучуудын наадмын зохион байгуулах хороо”-ны дэд дарга, Нийслэлийн Засаг даргын орлогч З.Төмөртөмөө наадмыг нээж, “Улаанбаатар хот энэ наадмыг зохион байгуулснаар цаашдаа тив, дэлхийн наадмуудыг эх орондоо явуулах үүд хаалгаа нээж байна. Хурд хүч, авхаалж самбаагаа сорин, найм хоногийн турш өрсөлдөх Зүүн Азийн өсөх ирээдүйтэй, шилдэг залуусын тэмцээнийг Улаанбаатарчууд төдийгүй олон орны иргэд сэтгэл догдлон үзэхээр хүлээж байгаа. Энэ наадмаас ирээдүйн тив дэлхий, олимпын аваргууд тодорч, Монгол төдийгүй бүс нутгийн спортын түүхэнд алтан үсгээр тэмдэглэгдэн үлдэнэ гэдэгт итгэлтэй байна” хэмээсэн юм.
Зүүн Азийн олимпын хорооны ерөнхийлөгч Ян Шуан Монголын ард түмэн биднийг маш зочломтгой угтаж авлаа. Та бүхний хичээл зүтгэлээр наадам амжилттай болно гэдэгт итгэж байна. Зүүн Азийн олимпын хороодын нэрийн өмнөөс Монгол Улсын Засгийн газар, НЗДТГ, зохион байгуулагч нар, сайн дурынханд талархал илэрхийлээд, тамирчдадаа амжилт хүслээ.
Монголын Үндэсний олимпын хорооны ерөнхийлөгч Б.Баттүшиг хэлсэн үгэндээ, “Өнөөдөр түүхэн өдөр. Энэ наадам манай улсын хувьд шударга өрсөлдөөн, амжилт, эв нэгдлээр түүчээлсэн түүхэн үйл явдал болж байна. Залуусын наадам бол тамирчдын цугларал бус нөхөрлөл, эв нэгдлийн илэрхийлэл. Өөр хэлээр ярьдаг, өөр газраас ирсэн, өөр соёл заншилтай ч биднийг спорт, хүндлэл нэгтгэдэг” гэв.
