Улаанбаатарт:

11 дүгээр сарын 20-нд: УИХ дахь МАН, АН-ын бүлгийн ээлжит хуралдаан Төрийн ордонд болно.

11 дүгээр сарын 20-нд: НҮБ-ын Хүүхдийн сан, Соёлын яамнаас НҮБ-ын Хүүхдийн эрхийн конвенц батлагдсан өдөр буюу Дэлхийн хүүхдийн өдрийг тохиолдуулан хүүхэд багачуудад соёлын боловсрол олгох, хүүхдийн бүтээлч идэвхийг нэмэгдүүлэх зорилготой "Хүүхдийн ертөнц-Бүтээлч орон зай" өдөрлөгийг Зайсан хилл цогцолборт зохион байгуулна.

11 дүгээр сарын 20-нд: МУИС-ийн номын санд: “Монголын анхны цахимжсан номын сан”-г танилцуулна.

11 дүгээр сарын 20-22-нд: Монгол Улсын Шадар сайдын ивээл дор Эрсдэлийн үндэсний форумыг “Эрсдэл ба стандарт” сэдвээр Төрийн ордонд зохион байгуулах бөгөөд форумд төр, иргэний нийгэм, хэвлэл мэдээлэл, НҮБ-ын ХХААБ, Хүүхдийн Сан, ХАС, ДЭМБ, МУЗН зэрэг байгууллагын 1500 гаруй төлөөлөл оролцохоор төлөвлөж байна.

11 дүгээр сарын 21-нд: МУИС-ийн номын санд НҮБ-ын Хөгжлийн хөтөлбөрөөс “Ази, Номхон далайн бүс нутгийн Хүний хөгжлийн илтгэл”-ийг танилцуулна. НҮБ-ын Хөгжлийн хөтөлбөрөөс жил бүр эрхлэн гаргадаг “Хүний хөгжлийн илтгэл” нь дэлхий, бүс нутаг, улс орны хэмжээнд хүний хөгжлийн олон талт байдлыг үнэлж, дүн шинжилгээ хийдэг бөгөөд бодлого боловсруулагчид, судлаачид, хэвлэл мэдээлэл болон хүний хөгжлийн судлаач нарт чухал эх сурвалж болдог юм.

11 дүгээр сарын 21, 22-нд: УИХ-ын Байнгын хороодын хуралдаан болно.

11 дүгээр сарын 22-нд: Засгийн газрын ээлжит хуралдаан Төрийн ордонд болно.

11 дүгээр сарын 22-23-нд: Монгол Улсын Их Хурал нь Олон Улсын Парламентын Холбооноос (ОУПХ) боловсруулсан аргачлалын дагуу хүний эрх болон жендэрийн асуудлаар хоёр төрлийн үнэлгээ хийх үйл ажиллагааг Төрийн ордонд зохион байгуулна. Өөрийн үнэлгээ нь ОУПХ-ны “Парламент ба Хүний эрх”, “Парламентын жендэрийн мэдрэмжтэй байдал” өөрийн үнэлгээний аргачлалд үндэслэн тодорхойлсон асуултуудыг хамрах бөгөөд нэгдсэн болон салбар хэлэлцүүлэг хэлбэрээр явагдана.

11 дүгээр сарын 23, 24-нд: УИХ-ын чуулганы нэгдсэн хуралдаан Төрийн ордонд болно.

11 дүгээр сарын 24-нд: “Дэлхий” хамтлагийн “Онгод” хоёр дахь бие даасан тоглолт Хүн театрын тайзнаа болно.

11 дүгээр сарын 25-30-нд: Bluemon төвийн Norphei Art Gallery-д МУИС-ийн Шинжлэх ухаан, технологийн Улаанбаатар парк, Өмнөговь аймгийн ИТХ, ЗДТГ, Гурвантэс сумын ЗДТГ-ын (Гурвантэс Мэдээ) хамтран зохион байгуулж буй "Өмнийн говийн соёлын өвийн гайхамшиг: Эртний нүүдэлчид ба Эзэнт гүрний язгууртнууд" хадны зургийн үзэсгэлэн гарна. Тус үзэсгэлэнд МУИС-ийн Улаанбаатар сургуулийн Түүх, археологийн тэнхимийн багийн 2016, 2017, 2018, 2021, 2023 онуудад Өмнөговь аймгийн Булган, Сэврэй, Гурвантэс сумын нутагт гүйцэтгэсэн археологийн хайгуул судалгааны ажлын явцад бүртгэгдсэн 397 дурсгалт газрын 6259 хадны 20953 дүрслэлүүдээс хамгийн шилмэл онцгой дүрслэл, зургууд тавигдах ажээ.

11 дүгээр сарын 26-нд: Монгол Улс Анхдугаар Үндсэн хуулиа баталж, Бүгд найрамдах улсаа тунхагласан өдрийг орон даяар тэмдэглэн өнгөрүүлнэ.

11 дүгээр сарын 26-нд: "Болор цом-41" яруу найргийн наадмын сүүлийн шалгаруулалт Соёлын төв өргөөнд болно.

Орон нутагт:

11 дүгээр сарын 20-нд: Хөвсгөл аймгийн ИТХ-аас зохион байгуулж буй Олдмол хөгжлийн бэрхшээлээс сэргийлэх сарын аян эхэлнэ.

11 дүгээр сарын 20-нд: Дундговь аймагт Монгол Улсын Соёлын яамны "Соёлын бүтээлч сар" аяны хүрээнд Төрийн шагналт, Хөдөлмөрийн баатар, Ардын жүжигчин, Зууны манлай алдарт уртын дууч Н.Норовбанзадын нэрэмжит Дундговь аймгийн төв халхын дуулалт жүжгийн театр, Anir Mongolian Pop Orchestra, Монгол циркус энтертайнмэнт төв “Аниртай үдэш” тоглолтыг зохион байгуулна.

11 дүгээр сарын 20-нд: Дорноговь аймагт Монголын эртний үг зохиолын нэрт төлөөлөгч “Хуульч Сандаг”-ийн нэрэмжит яруу найргийн наадам болно.

11 дүгээр сарын 21-нд: Завхан аймгийн Хөгжимт драмын театрт “Асарын өндөр” түүхэн аялгуут жүжиг тоглоно.

11 дүгээр сарын 21-нд: Сүхбаатар аймагт “Янзаган хүрээг хайрлаарай” зүүн бүсийн эко клубуудын чуулган болно.

11 дүгээр сарын 23, 24-нд: Баян-Өлгий аймгийн Өлгий хотод “Нээлттэй Баян-Өлгий” эдийн засгийн чуулга уулзалт болно.

11 дүгээр сарын 24-нд: Монголын эмэгтэйчүүдийн холбооны Дундговь аймаг дахь салбараас “Ачлал буянтай ээжүүд” ёслол хүндэтгэлийн үйл ажиллагааг 15 дахь жилдээ зохион байгуулна.

11 дүгээр сарын 24-нд: Дорнод аймагт Улс тунхагласны 99 жилийн ой, Төрийн албаны өдрийг угтан зохион байгуулах Төрийн албан хаагчдын олон төрөлт тэмцээн болно.

11 дүгээр сарын 24-нд: Дорнод аймгийн Дашбалбар суманд “Аман билэг наадам-2023” зохион байгуулна.

11 дүгээр сарын 24, 25-нд: Дундговь аймагт "Тэнгэрийн тэмдэг" хүүхдийн театрт хүүхэлдэйн жүжгийн өдрүүд зохион байгуулна.

11 дүгээр сарын 25, 26-нд: Баян-Өлгий аймгийн Өлгий хотод казахын ард түмний ардын урлагийн нэг төрөл болох харилцаа дууны /айтыс/ олон улсын тэмцээн болно.

Хилийн чанадад:

11 дүгээр сарын 17-ноос 12 дугаар сарын 2-нд: Их Британийн Лондон хотын Вест Энд-ийн Колесиум театрт Монгол Улсын Ардын уран зохиолч Б.Лхагвасүрэнгийн бүтээл “Тамгагүй төр” жүжиг “Монгол хаан” нэртэйгээр үзэгчдэд хүрнэ.

11 дүгээр сарын 17-22-нд: Чингис хаан үндэсний музейд “Нүүдлийн ай” гэрэл зургийн үзэсгэлэн гарна.

МОНЦАМЭ агентлаг Ж.Болор