1.Төлөв байдал: 21-нд баруун аймгуудын ихэнх нутгаар, 22-нд баруун аймгуудын нутгийн зүүн, төв болон говийн аймгуудын нутгийн баруун хэсгээр цас орж, цасан шуурга шуурна. Салхи ихэнх хугацаанд секундэд 5-10 метр, 20-нд говь, талын нутгаар секундэд 12-14 метр хүрч ширүүснэ. Дархадын хотгор, Хөвсгөлийн уулархаг нутаг, Завхан голын эх, Идэр, Тэс голын хөндийгөөр шөнөдөө -44...-49 градус, өдөртөө -31...-36 градус, Увс нуурын хотгор, Хангай, Хэнтийн уулархаг нутаг, Хүрэнбэлчир орчим, Эг, Үүр, Орхон, Сэлэнгэ, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө -37...-42 градус, өдөртөө -26...-31 градус, говийн бүс нутгийн баруун өмнөд хэсгээр шөнөдөө -19...-24 градус, өдөртөө -12...-17 градус, Их нууруудын хотгор, Хангайн нурууны өвөр бэлээр шөнөдөө -23...-28 градус, өдөртөө -16...-21 градус, бусад нутгаар шөнөдөө -28...-33 градус, өдөртөө -20...-25 градус хүйтэн байна. 22-ноос ихэнх нутгаар өдөртөө хүйтний эрч бага зэрэг суларна.Цаг агаар:

Өнгөрсөн хоногт: Нийт нутгаар тогтуун байлаа.

Өнөөдөр: Нутгийн баруун хэсгээр солигдмол үүлтэй, бусад нутгаар багавтар үүлтэй. Нийт нутгаар цас орохгүй. Салхи нутгийн баруун хэсгээр баруун өмнөөс, бусад нутгаар баруун хойноос секундэд 5-10 метр. Увс нуур болон Дархадын хотгор, Завхан голын эх, Идэр, Тэс голын хөндийгөөр -34...-39 градус, Хангай, Хөвсгөл, Хэнтийн уулархаг нутаг, Хүрэнбэлчир орчим, Эг, Үүр, Орхон, Сэлэнгэ, Хараа, Ерөө, Туул, Тэрэлж, Халх голын хөндий, Дарьгангын тал нутгаар -25...-30 градус, Монгол-Алтайн уулархаг нутгаар -9...-14 градус, Хангайн нурууны өвөр бэл, говийн бүс нутгийн баруун өмнөд хэсгээр -15...-20 градус, бусад нутгаар -20...-25 градус хүйтэн байна.

Улаанбаатар хотод: Багавтар үүлтэй. Цас орохгүй. Салхи баруун хойноос секундэд 3-8 метр. -25...-27 градус хүйтэн байна.

2. Төрийн өмчид гарсан: Өмнөговь аймгийн Даланзадгад сумын Их-Уул баг автомашин шатаж байна гэсэн дуудлагыг 12.19-ний өдрийн 12:01 цагт хүлээн авсан.Тус аймгийн Онцгой байдлын газрын Гал түймэр унтраах, аврах 21 дүгээр ангийн алба хаагчдыг очиход “Hyundai Porter” загварын ачааны автомашины бүхээг хэсэг шатаж байсныг ажиллаж унтраасан.

ААН, байгууллагын өмчид гарсан: Өмнөговь аймгийн Ханбогд сумын Гавилууд багийн “Шинэ Ханбогд” хороолол утаа гарч байна гэсэн дуудлагыг 12.19-ний өдрийн 11:05 цагт хүлээн авсан. Тус аймгийн Онцгой байдлын газрын Ханбогд сум дахь Гал түймэр унтраах, аврах 66 дугаар ангийн алба хаагчдыг очиход тус байрны “Hyundai Starex” загварын автомашины моторын хэсэг шатаж байсныг 40 минут ажиллаж унтраасан.

- Хувийн өмчид гарсан: Нийслэлийн Баянзүрх дүүргийн 14 дүгээр хорооны “Түмэн наст” хотхон хогийн цэгт хог шатаж байна гэсэн дуудлагыг 12.20-ны өдрийн 01:53 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 63 дугаар ангийн алба хаагчдыг очиход тус байрны хогийн сувагт хог шатаж байсныг ажиллаж унтраасан.

Ховд аймгийн Зэрэг сумын хөндлөн багийн задгайд гэр шатаж байна гэсэн дуудлагыг 12.20-ны өдрийн 04:50 цагт хүлээн авсан. Тус аймгийн Онцгой байдлын газрын Зэрэг сум дахь Гал түймэр унтраах, аврах 70 дугаар ангийн алба хаагчдыг очиход иргэн Ж-ийн 5х14 метрийн хэмжээтэй шавар гэр шатаж байсныг ажиллаж унтраасан.

Нийслэлийн Налайх дүүргийн 6 дугаар хорооны Тэрэлжийн шугуйд байшин шатаж байна гэсэн дуудлагыг 12.20-ны өдрийн 03:26 цагт хүлээн авсан. Тус дүүргийн Онцгой байдлын хэлтсийн Гал түймэр унтраах, аврах 28 дугаар ангийн алба хаагчдыг очиход иргэн Б-ын 11х4 метрийн хэмжээтэй байшин бүрэн шатаж байсныг ажиллаж унтраасан.

3. Хүний үйл ажиллагаатай холбоотой осол

Төөрсөн, сураггүй болсон: Өмнөговь аймгийн Ханхонгор сумын Мандах багийн "Хацрын-Ар" гэдэг газар /аймгийн төвөөс зүүн хойд зүгт 45 км, сумаас хойд зүгт 20 км/-т 12.18-ны өдрийн 06:00 цагийн орчим иргэн Б нь айлаас гэртээ харихаар гараад сураггүй болсон тухай мэдээллийг 11:30 цагт хүлээн авсан. Тус аймгийн Онцгой байдлын газрын Эрэн хайх, аврах салбарын алба хаагчид иргэн Б /35 настай, эрэгтэй/-г 12.18-ны өдрийн 13:05 цагаас эхлэн эрэн хайх ажиллагааг зохион байгуулж 12.19-ний өдрийн 15:54 цагт сумын төвөөс хойд зүгт 18 км, айлаас нь баруун зүгт 9 км-т тус сумын Өгөөмөр багийн "Олон-Овоо" гэдэг газраас цогцсыг нь олж Цагдаагийн хэсэгт шилжүүлэн өгсөн.

Цас шаварт суусан: Хэнтий аймгийн Баянхутаг сумын Цантын хоолой багийн “Жоншны бамбарын уурхай” гэдэг газар /аймгийн төвөөс урд зүгт 70 км, сумын төвөөс урд зүгт 25 км/-т Улаанбаатар хотоос Хэнтий аймгийн Галшар сумын чиглэлд зорчиж явсан 7 зорчигчтой /үүнээс 3 хүүхэд/ суудлын автомашин цасанд сууж, эвдэрсэн тухай дуудлагыг 12.19-ний өдрийн 11:50 цагт хүлээн авсан. Тус аймгийн Онцгой байдлын газрын Гал түймэр унтраах, аврах 32 дугаар ангийн алба хаагчдыг очиход иргэн Т /36 настай, эрэгтэй, Улаанбаатар хотын харьяат/-ийн “Toyota Land Cruiser” загварын суудлын автомашин цасанд сууж, эвдэрсэн байсан тул автомашиныг үлдээж иргэдийг Хэрлэн суманд аюулгүй газарт авч ирсэн.

Говь-Алтай аймгийн Цогт сумын Баян-Өндөр багийн “Дөтийн даваа” гэдэг газар /аймгийн төвөөс баруун урд зүгт 165 км, сумын төвөөс зүүн зүгт 45 км/-т Цогт сумаас Есөнбулаг сумын чиглэлд зорчиж явсан 3 автомашин цасанд суусан тухай дуудлагыг 12.19-ний өдрийн 15:25 цагт хүлээн авсан. Тус аймгийн Онцгой байдлын газрын Цогт сум дахь Эрэн хайх, аврах бүлгийн алба хаагчдыг очиход иргэн М-ын “Ssangyong Istana” загварын суудлын автомашин /18 зорчигчтой/, Б-ийн “Ssangyong Istana” загварын суудлын автомашин /15 зорчигчтой/, А-ын “Ssangyong Istana” загварын суудлын автомашин /15 зорчигчтой/ цасанд суусан байсныг ажиллаж татан гаргасан.

Эх сурвалж: ОБЕГ