.png){kind=logo}
Тайландын Бангкок хотноо "Парис 2024" олимпын эрх олгох боксын сүүлчийн тэмцээн 20245 оны 5 дугаар сарын 24-нд эхэлсэн бөгөөд Монголын 7 эрэгтэй, 5 эмэгтэй тамирчин тус тэмцээнд хүч, ур чадвараа сорихоор тус улсад очоод байгаа билээ.
"Парис 2024" олимпын сүүлчийн эрх олгох тэмцээний талаар Монгол Улсын гавьяат дасгалжуулагч Ц.Нандигжавын бичсэн тойм мэдээлэл, дүгнэлтийг та бүхэндээ толилуулж байна.
БОКС: Парисын олимпын эрх олгох дэлхийн тэмцээнийхээ лхагва гараг /2024.05.29/-ийн тулааны мэдээг хүргэ байна.
Сэтгэлд жаахан тааруухан өдөр байлаа. Энэ өдөр +92, эмэгтэй 66 кг жингийн шөвгийн 16, эмэгтэй 60 кг, эрэгтэй 63,5 ба 71 кг жингүүдийн шөвгийн 8-д өрсөлдөж буй нийт 56 тулаанууд болж өнгөрлөө. Тулаануудыг дамжуулах ямарч ТВ, лайв байгаагүй учраас бичлэг үзэж чадсангүй, онооны дүнг л харж мэдээлэл хүргэж байна. Буруу, зөрүү юм байвал уучлаарай.
Манай 2 боксчин тулалдаж +92 кг-ын жинд Х.Бекнур анхны тулаанаа хийн Доминика улсын боксчныг 2-р үед DSQ2 буюу торгуулиар ялж шөвгийн 16-д шалгарлаа. Эхний үед манай тамирчин илт давуу байсан бололтой бүх шүүгч 10:8-аар монголын талд өгсөн байв. 2-р үед олон цохиулж арга нь барагдсан Доминика боксчин жижиг алдааг олон давтсан юмуу эсвэл ноцтой алдаа хийсэн бололтой торгуулиар хөөгджээ.
Харин 63,5кг-ын жинд манай гол найдвар МУГТ Э.Цэндбаатар Болгарын залуу боксчин Росенов Радославт 5:0 оноогоор ялагдал хүлээж Парис-24 олимпод оролцох эрхгүй үлдлээ. Эхний үед тулаан нилээд ойролцоо байжээ. Нэгдүгээр үед шүүгч нараас нэг л шүүгч Цэндбаатарт ялалт өгсөн байв. Өөрөөр бол шийдвэр 4:1-ээр Болгарт ялалт өгсөн. 2 ба 3-р үед бүх шүүгч 5:0-оор Болгар боксчинд ялалт өгсөн байх юм. Дээрээс нь 2-р үед манай тамирчныг торгосон байна. Бодвол толгой дор, аюултай довтолгоонд олон удаа орсон гэж үзсэн, эсвэл санамсаргүй доогуур цохисон байж магадгүй. Өөрөөр Цэндээ техникийн алдаа гаргахгүй л дээ. Тулааныг үзээгүй учраас тодорхой мэдэх, бичих юмгүй таавар таах төдий л байна.
Миний бодлоор 63,5кг жин Цэндбаатарт тохиромжгүй юм шиг. Жин ихэссэнээс хурд удааширсны дээр чац богино учраас холын зайнаас сайн мэдэрдэг, тэсрэлттэй хурдтай боксчдод хүрэхэд түүнд бэрх. Эсвэл биеийн байдал муу байсан ч байж болох. Болгарын энэ залуу бол 20 настай, 2023 оны дэлхийн аваргад оролцоогүй, сүүлчийн дэлхийн аваргын дараагаас том тэмцээнд улсаа төлөөлөх болсон, 2023 оны Европын наадамд 3 даваад хүрэл медалийн төлөө дэлхийн аваргын хошой хүрэл медальт Гүржийн Лаша Гурулид ялагдсан.
Олимпийн эрхийн 1-р тэмцээнд 3-ын даваанд буюу 1/8 финалд Сербийн боксчинтой тулалдаж 1-р раундад гэмтлээр хасагдаж байсан, 2024 оны Европын аваргын мөнгөн медальтай, энэ тэмцээнийхээ финалд 2023 оны дэлхийн аваргын хүрэл медальт Оросын Всеволод Шумковт ялагдсан, ер нь л их өсөх ирээдүйтэй залуу боксчин юм байна. Одоо яая гэхэв тун харамсалтай байна. Спортод юу ч тохиолдож болно.
Энэ тэмцээнээс харахад сүүлийн жилүүдэд нилээд уналтанд орсон, өмнө нь маш хүчтэй боксчидтой байсан европын Польш, Болгар, Румын зэрэг орнуудын болон Африкийн бокс сэргэж, хүчирхэгжиж байгаа бололтой. Өнөөдөр манайхаас 3 боксчин рингэнд гарах бөгөөд 51кг-ын жинд Г.Ган-Эрдэнэ Кирибате улсын боксчинтой шөвгийн 1/16-д 2 дахь тулаанаа, 57кг-д Х.Энх-Амар шөвгийн 1/8-д Германы боксчинтой 3 дахь тулаанаа, 80кг-д Г.Далай шөвгийн 1/8-д Ираны боксчинтой 2 дахь тулаанаа тус тус хийнэ. Тамирчиддаа амжилт хүсье!
