Улаанбаатар, 2024 оны тавдугаар сарын 31 /МОНЦАМЭ/. Олон улсын хүүхдийн эрхийг хамгаалах өдөр маргааш тохиож байна.

Энэ өдөр бяцхан багачуудаа хэрхэн баярлуулахаа ярилцаж байгаа биз. Маргааш нийслэлийн дүүрэг бүр Эх, үрсийн баярыг тодорхой хөтөлбөрийн дагуу тэмдэглэн өнгөрүүлнэ. Бид маргааш зохион байгуулагдах зарим өдөрлөг, тоглолтын мэдээллийг хүргэе.

Сүхбаатарын талбай

Олон улсын хүүхдийн эрхийг хамгаалах өдрийн баярын өдөрлөгийг энэ жил “Дэлхийн монгол хүүхэд” нэртэйгээр зохион байгуулна. Баярын өдрөөр дараах үйл ажиллагааг зохион байгуулна. Энэ үеэр Сүхбаатарын талбайд олон төрлийн тэмцээн уралдаан, үзэсгэлэн, тоглолт 08:00-20:00 цагийн хооронд болно.

Монголын хүүхдийн ордон

Монголын хүүхдийн ордон 08:00-17:00 цагийн хооронд урд талбайдаа 400 метр авто замыг хааж хүүхэд багачууддаа зориулан авто машингүй баярын гудамжийг зохион байгуулах нь ээ. Энэ хүрээнд сурагчдын урлагийн тоглолт болон алиалагч хүүхдүүд, аниме дүрүүд, хүүхэлдэйн баатруудаас бүрдсэн парад, хөгжмийн цуваа болно.

Ид шидийн орон

Хүүхдийн эрхийг хамгаалах өдрийн утга учрыг таниулах зорилготой олон сонирхолтой өртөө, хөтөлбөрийг бэлджээ. “Чихрийн үнэтэй дурсамж” нэртэй хөтөлбөрөөр зоосоо цуглуулаад, өртөөгөөр аялаад энэ өдөр хамтдаа гайхалтай дурсамжийг бүтээхийг уриаллаа. Ид шидийн оронд 12 өртөө ажиллах бөгөөд тайзны хөтөлбөр, загварын шоу, Ид шидийн орон төвүүдийн тайлан тоглолт, Open mic гээд зэрэг сонирхолтой хөтөлбөр багтсан байна.

Хүннү молл

Хүүхэд багачууд та бүхэн маргааш Палентологийн хүрээлэнгийн сонирхолтой ертөнцөөр үнэ төлбөргүй аялах боломжтой. Эндээс юрийн галаваар аялж аварга биет үлэг гүрвэлүүдийг харж болно. Мөн өнөөдөр, маргааш хүүхдийн бүжгэн жүжиг, галт тэрэг, хөгжөөнт тоглоом, азтан шалгаруулахаас гадна эргэжлийн шүдний эмчийн зөвлөгөө өгөх аж.

Монгол Улсын хүүхэлдэйн театр

Улсын Хүүхэлдэйн театр, Авилгатай тэмцэх газартай хамтран Д.Нацагдоржийн болон Монголын зохиолчдын эвлэлийн шагналт Н.Мандалын зохиол “Хаалган хадны нууц” хүүхэлдэйн жүжгийг маргааш, нөгөөдөр 11:00 цагт багачууддаа толилуулах юм байна.

Үндэсний соёл амралтын хүрээлэн

Хүүхдийн баярыг угтан паркт их тайзны долоо хоног эхэлжээ. Зургадугаар сарын 3-ныг хүртэл үргэлжлэх тус эвентийн үеэр циркийн үзүүлбэр, хүүхэлдэйн жүжиг, хамтлаг, дуучдын тоглолт, хөгжөөнт тоглоомоор тоглоно. Мөн гэнэтийн бэлгийн эзэн ч болох боломжтой аж.

Зайсан хилл

Хүүхэд бүр өөрийн гараар “Dinos Art Zone”-д комикоо будаад “Зайсан Хилл”-ийн анхны комик номыг бэлгэнд авч Диногийн ертөнцөөр аялаарай. Мөн маргааш хүүхдийн баяраар энтертаймент хөтөлбөртэй.

Түүнчлэн өмнө харж байгаагүй гайхамшигт илбийн үзүүлбэрүүдийг олон улсын шилдэг илбэчид хүүхэд багачууддаа толилуулах юм байна. Тоглолтод БНСУ, Япон, Монголын илбэчид шилдэг, шинэ илбүүдээ үзүүлэх аж.

Хүй долоон худаг

“Монгол наадам цогцолбор”-ын хамт олон “Монгол хүү 2024” хүүхдийн баярын үйл ажиллагааг Хүй долоон худагт зохион байгуулна. Энэ үеэр хүүхдийн үндэсний бөхийн барилдаан, сурын харваа, дугуйн уралдаан, гүйлтийн тэмцээн, “Аав ээж би” сагсан бөмбөгийн тэмцээн болон урлаг соёлын тоглолт болох юм. “Монгол хүү 2024” үндэсний хүүхдийн баярт ирснээр эрүүл цэвэр агаарт өөрийн майхан асартайгаа байрлан, урлагийн тоглолт үзэж, нэгэн өдрийг гэр бүл, найз нөхдөөрөө зориулалтын талбайд тэмцээн уралдаанд оролцож, хөгжилдөн өнгөрөөхөөс гадна ивээн тэтгэгч байгууллагын шагналын эзэн болох боломжтой.

Төв цэнгэлдэх хүрээлэн

Хүүхэд, багачуудад урлагийн боловсрол олгох, сэтгэн бодох, өөрийгөө илэрхийлэх чадвар, бүтээлч байдлыг дэмжин хөгжүүлэх, зорилготой “Kids Art Festival”-ийг зохион байгуулахаар болжээ. Уг фестивальд оролцсоноор та бүхэн хүүхэдтэйгээ хамт зурж, будаж, хайчилж, урлах боломжтойгоос гадна урлагийн боловсрол олгох төрөл бүрийн байгууллагуудтай танилцах боломжтой. Мөн хотын хамгийн том зургийн хичээл, дүрслэх урлагийн хэсгүүдэд оролцон, гэр бүлээрээ хөгжилдөн амрах энэхүү цогц хөтөлбөртэй урлагийн өдөрлөгт нэгдэхийг Төв цэнгэлдэх хүрээлэнгийн хамт олон урилаа.

Эх сурвалж: МОНЦАМЭ Агентлаг Б.Мөнхзул