.png){kind=logo}
Тулгар төрийн 2233, Их Монгол Улс байгуулагдсаны 818, Үндэсний эрх чөлөө, тусгаар тогтнолоо сэргээн мандуулсны 113, Ардын хувьсгалын 103 жилийн ой, Үндэсний их баяр наадмын хүчит бөхийн барилдаанд 512 бөх барилдсанаас есийн даваанд Даян аварга Н.Батсуурь, Улсын арслан Б.Орхонбаяр нар тунаж уран мэхээ уралдуулан барилдсанаас хөлийн цэцийн шийдвэрээр Даян аварга Н.Батсуурийг түрүүлсэнд тооцов.
Харин Улсын арслан Б.Орхонбаяр хөлийн цэцийн тус шийдвэрийг зөвшөөрөхгүй байсан бөгөөд наадамчин олон түмэн ч барилдааныг дахиулахыг шаардаж байлаа. Улмаар Б.Орхонбаяр арслан барилдааны бичлэгийг үзэж, мөн хөлийн цэц, шийдвэрээ дахин баталгаажуулснаар Даян аварга Н.Батсуурь энэ наадмын түрүүг хүртэн Дархан аварга боллоо. Ийнхүү Увс аймгийн Ховд сумын харьяат, Монгол Улсын даян аварга Намсрайжавын Батсуурь энэ удаагийн баяр наадамд ес даван түрүүлж Монгол Улсын 10 дахь дархан аварга цолтон болж Монгол бөхийн түүхэнд бичигдлээ.
Тэрбээр 2014, 2018, 2019 онд түрүүлж байсан бол таван жилийн дараа 4 дэх түрүүгээ авч байгаа нь энэ бөгөөд одоогоос 10 жилийн өмнө дархан аварга Г.Өсөхбаяр, А.Сүхбат нар Ерөнхийлөгчийн зарлигаар энэхүү цолд хүрч байсан юм.
Харин Сэлэнгэ аймгийн Цагааннуур сумын харьяат Монгол Улсын залуу арслан Б.Орхонбаяр төрийн наадамд хоёр дахь удаагаа үзүүрлэж, аварга цолд ойрхон байгаа гэдгээ нотлон харуулав.
Монгол Улсын Ерөнхийлөгч У.Хүрэлсүх Үндэсний их баяр наадмын хүчит бөхийн барилдаанд ес даван түрүүлсэн Даян аварга Н.Батсуурьд Дархан аварга цол олгосныг наадамчин олонд уншиж сонордууллаа.
Ийнхүү Ардын хувьсгалын 103 жилийн ой, , Үндэсний их баяр наадмаар Монгол Улсын Дархан аварга нэг, Монгол Улсын заан цолтон нэг /Төв аймгийн Өндөрширээт сумын харьяат Д.Хүдэрбулга/, Монгол Улсын харцага цолтон хоёр, Монгол Улсын начин цолтон зургаа төрлөө.
