ЭМГЭНЭЛ

Бидний дотны анд, хамтран зүтгэгч, гэрэл зургийн авьяаслаг сэтгүүлч Надмидын Батбаяр 2024 оны 11 дүгээр сарын 20-ны өдөр хүнд өвчний улмаас таалал төгсөж, бид бүхэнд хүнд гарз тохиолоо.

Н.Батбаяр нь 1968 онд Надмидын долоо дахь хүү болон Улаанбаатар хотноо мэндэлжээ. Тэрбээр 1976 онд нийслэлийн Баянзүрх дүүргийн Ерөнхий боловсролын 48 дугаар сургууль, 1988 онд Төмөр замын техникумыг барилгын техникч, даамал мэргэжлээр, 1999 онд Жамьянгаравын нэрэмжит Дорно дахины дээд сургуулийг сэтгүүлч мэргэжлээр тус тус дүүргэжээ.

1988 - 1990 онд Зэвсэгт хүчний 107-р ангид цэргийн албыг нэр төртэй хааж, 1991 онд Үндэсний мэдээллийн МОНЦАМЭ агентлагийн техникийн албанаас ажил хөдөлмөрийнхөө гарааг эхлүүлж байв. Улмаар 1998 оноос МОНЦАМЭ агентлагийн Дотоод мэдээний албанд сурвалжлагч, нийслэлийн 2 болон 175-р цэцэрлэгт тус тус ажиллаж байгаад, 2015 оноос өнөөг хүртэл Үндэсний мэдээллийн МОНЦАМЭ агентлагийн гэрэл зургийн сурвалжлагчаар ажиллаж байсан юм.

Тэрбээр “Компьютер дээр хурдан бичих сурах бичиг”-ийг 2003 онд санаачлан гаргаж байсан нь цахим техникийн хэрэглээ бүх салбарт хүч түрэн нэвтэрч байсан тухайн үеийн хүүхэд залууст онц чухал гарын авлага болж байв.

Мөн тэрбээр улс төр, соёл урлаг, шинжлэх ухаан боловсролын гээд нийгмийн бүхий л салбарын онц чухал үйл явдлуудыг сурвалжилж өргөн сэдвээр, олон төрөл жанрын бүтээл гаргаснаараа Монголын гэрэл зургийн хөгжилд өөрийн хувь нэмрийг оруулсан, авьяаслаг, хөдөлмөрч, хамт олондоо хүндлэгдсэн гэрэл зурагчин байлаа.

Тэрбээр дотоод, гадаадын жуулчдад зориулсан “Нүүдэлчин монгол” гэрэл зургийн цомгийг 2018 онд гаргалцаж, “Press Mongolia”, “Хоёр ард түмэн, нэг ялалт” “Түүхэн замнал”, “МОНЦАМЭ - 100 жил” зэрэг дотоод, гадаадын олон үзэсгэлэнд эрэл хайгуулч, торгон мэдрэмжээр буулгасан гэрэл зургууд нь дэлгэгдэж байв.

Монгол орныг сурталчлан таниулах үйлсэд үнэтэй хувь нэмэр оруулсныг нь төр засгаас үнэлэн Монголын Сэтгүүлчдийн Нэгдсэн Эвлэлийн ган үзэгтэн, Хөдөлмөрийн хүндэт медаль, МОНЦАМЭ агентлагийн 100 жилийн ойн медаль, Ардын хувьсгалын 100 жилийн ойн хүндэт медаль, 2023 онд төрийн дээд шагнал “Алтангадас” одонг тус тус хүртээжээ.

Түүний өгөөмөр нинжин сэтгэл, хөдөлмөрч, эелдэг даруу, нийтэч, хүнлэг зан чанар бидний сэтгэл зүрхэнд үүрд хадгалагдан үлдэх болно.

Талийгаачийн гэр бүл, ах дүү, төрөл төгрөгсдөд гүн эмгэнэл илэрхийлье.

Үндэсний Мэдээллийн МОНЦАМЭ агентлаг