.png){kind=logo}
ХОНКОНГ, 2024 оны арванхоёрдугаар сарын 26 /SCMP/. Хятадын цагаачид АНУ-аас албадан гаргахгүй байхыг хүссэн захидлыг тус улсын Ерөнхийлөгчөөр сонгогдсон Дональд Трампад хүргүүлэх гэж байгаа тухай South China Morning Post (SCMP) сонин мэдээлжээ.
Захидал илгээгчид "АНУ-ын хууль тогтоомжийг даган мөрдөж, тус улсын хөгжилд хувь нэмрээ оруулна" гэж амласан байна. Ерөнхийлөгчийн сонгуульд Д.Трамп ялсан нь тодорхой болсны дараахан Хятадын цагаачид уг захидлын эхийг бэлтгэжээ. Одоогоор цагаачдын гарын үсгийг цуглуулж байгаа бөгөөд тангараг өргөх өдөр Д.Трампад хүргүүлэхээр төлөвлөж байгаа аж.
SCMP сонинд бичсэнээр, хятад цагаачид АНУ-д байх хугацаа нь удахгүй дуусаж магадгүй гэж болгоомжилж байгаа талаар групп чатаар бичиж байгаа аж. Д.Трамп хууль бус цагаачдыг албадан гаргах төлөвлөгөөг үүрэгт ажилдаа орсон "эхний өдрөөс" хэрэгжүүлнэ гэж мэдэгдсэн бөгөөд эл төлөвлөгөөнд хамгийн түрүүнд Хятадаас ирсэн цагаачид өртөх магадлалтай гэж Америкийн хэвлэлүүдэд бичиж байна.
SCMP сонинд мэдээлснээр, 2021 онд Хятадаас АНУ-д 241 мянга орчим хууль бус цагаач ирсэн байжээ. Дараа нь 2023 оны нэгдүгээр сараас 2024 оны 11 дүгээр сарын хооронд АНУ-ын өмнөд хилээр 60 мянга гаруй хятад цагаач зохих бичиг баримтгүйгээр нэвтэрсэн байна.
Тангаргаа өргөснийхөө дараа цагаачдыг албадан гаргах түүхэнд үзэгдээгүй томоохон ажиллагааг явуулна гэдгээ Д.Трамп хэдэнтээ мэдэгдсэн юм. Цагаачлалын хямрал АНУ-ын сонгуулийн кампанит ажлын үеэр хөндөгдсөн гол асуудлуудын нэг байв. Тус улсын одоогийн Ерөнхийлөгч, Ардчилсан намын гишүүн Жо Байден төрийн тэргүүний бүрэн эрхээ 2025 оны нэгдүгээр сарын 20-ны өдөр Д.Трампад шилжүүлнэ.
Эх сурвалж: МОНЦАМЭ Агентлаг Д.Жаргал
