Дэлхийн болон монголын шилдэг брэндүүдийн үнэт эдлэлийн үзэсгэлэн болно

Үнэт металлын үндэсний холбооноос хоёр дахь жилдээ үнэт эдлэл, үнэт металлын “Mongolian Jewellery & Metal Expo” хамгийн том үзэсгэлэн яармаг зохион байгуулах гэж байна.

Үнэт металл, үнэт чулуу, тэдгээрээр хийсэн эдлэлийн арилжаа эрхлэгчдийн үйл ажиллагаа, бүтээгдэхүүнийг олон нийтэд сурталчлан таниулах зорилготой юм. Энэхүү арга хэмжээний үеэр уран дархчуудын нарийн ур ухаанаар урласан бүтээл болох алт, цагаан алт, шүр, сувд, чулуу, мөнгө болон өв дамжин уламжлагдах уран дархны үнэт бүтээл, олон улсын брендийн үнэт эдлэл, гоёл чимэглэлийн албан ёсны дистербьютор байгууллагын бүтээгдэхүүнийг танилцуулж, тэдгээрийн хийц, түүхий эд материалын онцлогийн талаар мэдээлэл хүргэх юм байна.

Тус арга хэмжээнд салбарын оролцогч төрийн болон төрийн бус байгууллага, үйл ажиллагаа эрхлэгчид оролцож, холбогдох асуудлаар мэдээлэл өгч, салбарт тулгамдаж буй асуудлыг сонсож, тэдгээрийг шийдвэрлэх арга замыг тодорхойлох юм.

Үзэсгэлэнд оролцох хүсэлтэй хувь хүн болон байгууллагатай хамтран ажиллах боломжтой бөгөөд бүртгэл хийгдэж байгааг дуулгахад таатай байна.

Үзэсгэлэнгийн үеэр Засгийн газрын тохируулагч агентлаг Стандарт, хэмжил зүйн газраас Эрдэнийн чулуу таних, гэрчилгээ олгох, үнэт металлаар хийсэн эдлэлийн сорьц тогтоох, сорьцын баталгааны тэмдэгийн талаар, Санхүүгийн зохицуулах хорооноос энэ төрлийн үйл ажиллагаа эрхлэх тусгай зөвшөөрөл олгохтой холбоотой болон холбогдох бусад мэдээлэл, арга зүйн зөвлөгөө тус тус өгөх юм.

Оролцогч байгууллагууд 10-35 хувийн хямдрал үзүүлж, үнэт эдлэлийн өнгөлгөө, засвар хийх үйлчилгээ, хэлбэр дүрс өөрчлөх, засах үйлчилгээ болон үнэт эдлэл дээр үг, үсэг, тоо лазераар бичих үйлчилгээ, хүссэн бүтээгдэхүүнээ урьдчилгаа 0, зээлийн хүү 0 нөхцөлөөр худалдан авах боломжийг олгож байгаа гэдгийг зохион байгуулагчдаас мэдээллээ.

Үзэсгэлэн яармаг 2023 оны 4 дүгээр сарын 13-наас 16-ны өдрүүдэд “Мишээл Экспо” Олон Улсын Үзэсгэлэнгийн танхимд 10.00 - 19.00 цагийн хооронд болно.

Энэхүү арга хэмжээ нь өнгөрсөн онд өрнөсөн үзэсгэлэнгүүдээс хэрэглэгчийн сонирхлыг хамгийн их татсан, хамгийн өндөр борлуулалттай үзэсгэлэнгээр шалгарсан байна.