.png){kind=logo}
Бахрейн Улсын Манама хотноо 2023 оны 2 дугаар сарын 1-нд АХБХ-ны 33 дугаар Их хурал амжилттай болж өндөрлөв.
Уг хуралд АХБХ-ны гишүүн 46 улс албан ёсны эрхтэй оролцож 2023-2027 оны 4 жилийн шинэ удирдлагын баг, Удирдах зөвлөлөө шинэчлэн сонгож, хийх ажлуудаа хэлэлцэж баталлаа.
Энэхүү арга хэмжээнд ОУХБХ /ФИФА/-ны Ерөнхийлөгч ноён Жианни Инфантино оролцож хүндэтгэлийн үг хэлэв. Тэрбээр Катар улсад 2022 онд зохион байгуулагдсан дэлхийн аварга шалгаруулах тэмцээн амжилттай болж, Ази тив өндөр оролцоотой оролцон дэлхий даяар хөлбөмбөгийг хөгжүүлэх үйл хэрэгт нягт холбоотой ажиллаж байгааг дурдан, Олон улсын хөлбөмбөгийн холбоо /FIFA/-ноос Ази тивд хэрэгжүүлэх төсөл хөтөлбөрийн талаарх мэдээллийг өгч, хуралд амжилт хүслээ.
Тус Их хурлаар АХБХ-ны Ерөнхийлөгчөөр Шейх Салман Бин Халифа болон 5 бүсийн Дэд Ерөнхийлөгчийн нэгээр Зүүн бүсийг төлөөлөн МХБХ-ны Ерөнхийлөгч А.Ганбаатар мөн улиран сонгогдлоо.
Энэхүү Их хурлын үеэр Монголын Хөлбөмбөгийн холбоо /МХБХ/-ны удирдлагын баг Азийн гишүүн бусад холбоодтой хийж хэрэгжүүлэх төсөл хөтбөлбөрүүдтэй уялдуулах, хамтран ажиллах, нөхөрсөг тоглолтууд, бусад улс орнуудад очиж бэлтгэл сургуулилт хийж туршлага хуваалцах олон хөтөлбөрийг хэлэлцэн тохиролцлоо.
Эхний алхам болгож Катарын Хөлбөмбөгийн холбоотой дасгалжуулагчийн боловсролын хөтөлбөрийг эхлүүллээ.
МХБХ-ны Ерөнхийлөгч А.Ганбаатар, ЕНБД Д.Тэрбаатар нар Дасгалжуулагчийн боловсролын асуудалд онцгой анхаарал хандуулж, цаашид өөрийн улсад А зэрэглэлийн дасгалжуулагч бэлдэх эрх авахыг зорьж байна. Мөн АХБХ-ны А конвенцид нэгдэхийн тулд Монголын ирээдүйтэй залуу дасгалжуулагч, сургагч баш нарыг Pro зэрэглэлийн сургалтанд хамруулах талаар 2022 оны ОУХБХ-ны Их хурлын үеэр хэд хэдэн орны холбоотой хамтран ажиллах хүсэлт тавиад байсан юм.
Эдгээрээс хамгийн түрүүнд ийнхүү Катарын Хөлбөмбөгийн холбоо нэг дасгалжуулагчийг дэмжиж сургахыг зөвшөөрсөн бөгөөд дасгалжуулагч Б.Гарьдмагнайг тус холбооноос сонгон шалгаруулж авсан.
Их хурлын үеэр Катарын ХБХ-ны Ерөнхийлөгчтэй уулзахдаа МХБХ-ны Ерөнхийлөгч А.Ганбаатар хүсэлт тавьснаар Б.Гарьдмагнайг тус улсад суралцах зардлыг Катарын ХБХ даахаар болсон юм.
Дасгалжуулагч Б.Гарьдмагнай (2023 оны 2-р сарын 2)-ноос эхлэн Катар Улсын Доха хотыг зорин нисч 4 модуль бүхий сургалтынхаа эхний хэсэгт хамрагдах юм.
Дараагийн дасгалжуулагчдын бэлдэх асуудлаар Саудын араб, Австрали, Узбекистан зэрэг орнуудтай ярилцсан бөгөөд Монгол Улсад Pro зэрэглэлтэй олон дасгалжуулагч шат дараатай бэлтгэж Хөлбөмбөгийн спортод өрсөлдөх чадвараа нэмэгдүүлэх юм байна.
