.png){kind=logo}
АНКАРА, 2026 оны дөрөвдүгээр сарын 1 /Kazinform/. Ираны хөл бөмбөгийн шигшээ баг 2026 оны хөл бөмбөгийн дэлхийн аварга шалгаруулах тэмцээнд /ДАШТ/ оролцож, хуваарийн дагуу тоглолтуудаа АНУ-д хийнэ гэж ФИФА-гийн ерөнхийлөгч Жанни Инфантино мэдэгджээ.
Өмнө нь Ираны хөл бөмбөгийн холбоо АНУ, Израилтай үүсээд буй мөргөлдөөний улмаас тоглолтуудаа Мексик рүү шилжүүлэх асуудлыг хэлэлцэж байсан юм. Мексикийн Ерөнхийлөгч Клаудия Шейнбаум тус багийг нутагтаа хүлээн авахад бэлэн байгаагаа илэрхийлээд байв.
"Тоглолтууд товлосон ёсоор явагдах ёстой газраа болно" гэж Ж.Инфантино Туркт болсон Иран-Коста Рикагийн нөхөрсөг тоглолтын үеэр мэдэгджээ. Тэрбээр мөн тус багийг “тэмцээнд оролцох бэлтгэлээ хангасан хүчтэй баг” гэж онцолсон байна.
Дэлхийн аварга шалгаруулах тэмцээн зургаадугаар сарын 11-нд АНУ, Мексик, Канад улсуудад эхэлнэ. Ираны баг зургаадугаар сарын 15-нд Лос-Анжелес хотод Шинэ Зеландын шигшээ багтай эхний тоглолтоо хийх бөгөөд дараа нь Бельги (зургаадугаар сарын 21, Лос-Анжелес), Египетийн (6 дугаар сарын 27, Сиэтл) багуудтай тоглоно.
Ираны хөлбөмбөгчид Туркт нөхөрсөг тоглолт хийх үеэрээ хоёрдугаар сарын 28-нд Минаб хотын сургууль руу хийсэн агаарын цохилтын улмаас амиа алдсан 170 гаруй хүний дурсгалыг хүндэтгэжээ.
"ФИФА геополитикийн зөрчлийг шийдвэрлэж чадахгүй хэдий ч бид хөл бөмбөгийн хүч чадлыг, мөн ДАШТ-ий хүчийг ашиглан энх тайвныг тогтооход дэмжлэг үзүүлэхийг эрмэлзэж байна. Учир нь бидний сэтгэл зүрх дайн дажны улмаас зовж шаналж буй хүмүүстэй хамт байна" гэж Ж.Инфантино нэмж хэлжээ. Тэрбээр ФИФА бүх багийг оролцуулан тэмцээнийг "товлосон хуваарийн дагуу" зохион байгуулахаар төлөвлөж байгаа гэдгийг онцлон дурдсан байна.
Өмнө нь Ираны Спортын сайд Ахмад Донямали тус улсын шигшээ баг 2026 оны ДАШТ-д оролцохгүй гэж мэдэгдэж байсан юм. Энэхүү шийдвэр нь тус улсын дотоод болон гадаад улс төрийн нөхцөл байдал хурцадсантай холбоотой бөгөөд ФИФА-гийн дүрэм журмаас хамааралгүй байв.
Мөн Ираны эмэгтэйчүүдийн шигшээ багийн ахлагч Австрали улсаас орогнол хүссэн хүсэлтээ эгүүлэн татсан тухай мэдээлжээ.
Эх сурвалж: МОНЦАМЭ Агентлаг Д.Жаргал
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!