Италийн хөлбөмбөгчид гурав дахь удаагаа дараалан ДАШТ-д оролцохгүй

САРАЕВО, 2026 оны дөрөвдүгээр сарын 1 /ТАСС/. ДАШТ-д оролцох эрхийн төлөөх нэмэлт шатны тэмцээний финалын тоглолтод Италийн шигшээ баг Босни ба Херцеговина улсын багт торгуулийн цохилтоор хожигдлоо.

Боснийн Зеница хотод болсон уг тоглолтын 79 дэх минутанд Боснийн багийн Харис Табакович, италичуудаас Мойзе Кин 15 дахь минутанд гоол оруулсан байна. Тоглолтын 41 дэх минутанд Италийн хамгаалагч Алессандро Бастони хөл тавихдаа бүдүүлэг алдаа гаргасны учир талбайгаас хөөгджээ. Үндсэн цаг 1:1 харьцаагаар дуусаж, цуврал торгуулийн цохилтоор Боснийн хөлбөмбөгчид 4:1-ээр хожсон байна.

Ингэснээр Италийн шигшээ баг гурав дахь удаагаа дараалан ДАШТ-д оролцох боломжгүй боллоо. Өмнө нь 2018, 2022 онуудад италичууд сонгон шалгаруулах шатыг давж чадаагүй юм. Гэхдээ тэд дөрвөн удаа ДАШТ-д түрүүлж, хоёр удаа мөнгөн медаль, нэг удаа хүрэл медаль хүртэж байв.

Харин Босни ба Херцеговина улс ДАШТ-д хоёр дахь удаагаа оролцох гэж байна. Өмнө нь 2014 онд оролцож байжээ.

Европ тивээс ДАШТ-д оролцох өөр нэгэн баг бол Чехийн шигшээ юм. Чехүүд Данийн шигшээ багийг цуврал торгуулийн цохилтоор /үндсэн цаг 2:2/ хожсон бөгөөд ДАШТ-д 10 дахь удаагаа оролцох гэж байна. Өмнө нь 1934, 1962 онуудад финалд шалгарч байжээ.

Европт болсон нэмэлт шатны тэмцээнээс Босни ба Херцеговина, Чех, Турк, Шведийн багууд шалгарч, Хойд Америкийг зорихоор боллоо. Одоо чехүүд А хэсэгт Мексик, ӨАБНУ, Өмнөд Солонгосын багуудтай, босничууд В хэсэгт Канад, Катар, Швейцартай, туркууд D хэсэгт АНУ, Парагвай, Австралийн багуудтай, шведүүд F хэсэгт Нидерланд, Япон, Тунисын багуудтай оноолт таарчээ.

Энэ удаагийн ДАШТ-д 48 баг оролцох бөгөөд тив хоорондын плей-оффын шатны финалын тоглолтуудын дүнгээр сүүлчийн хоёр баг тодрох бөгөөд Ямайк-БНАКонго улс, Ирак-Боливийн хожсон нь Хойд Америкийг зорих эрхээ авна.

Эх сурвалж: МОНЦАМЭ Агентлаг Б.Адъяахүү