.png){kind=logo}
ВАШИНГТОН, 2026 оны долоодугаар сарын 11 /TASS/. Испанийн шигшээ баг Бельгийн багийг 2:1-ийн харьцаагаар хожиж, хөл бөмбөгийн дэлхийн аварга шалгаруулах тэмцээний (ДАШТ) хагас шигшээд шалгарлаа. Испаничуудад дахин хожил авчирсан гоолыг сэлгээгээр талбайд гарсан Микель Мерино оруулжээ.
Луис де ла Фуэнтегийн удирдсан баг ДАШТ эхлэхээс өмнө түрүүлэх хамгийн их магадлалтай багуудын нэгээр нэрлэгдэж байсан юм. Тэд тэмцээний явцад ч аваргын цомыг авч чадахаа батлан харуулсаар байна. Бельгичүүдтэй учраа таарахын өмнө испаничууд дараалан таван тоглолтод хаалгандаа гоол алдалгүй, дөрөвт нь хожоод байв.
Хоёр баг хамгийн шилдэг бүрэлдэхүүнээрээ талбайд гарсан ч Испанийн шигшээ баг энэ тоглолтод хожих илүү магадлалтай байв. Гэвч тэдний өрсөлдөгч тоглолт эхлэхийн өмнөхөн гэнэтийн сэлгээ хийхээс өөр аргагүйд хүрчээ. Бельгийн багийн ахлагч, хагас хамгаалагч Юри Тилеманс тоглолтын өмнөх бие халаалтын үеэр гэмтэл авсан тул түүний оронд Ханс Ванакен гарааны бүрэлдэхүүнд тоглосон байна.
Тоглолтын явцад испаничууд бөмбөгийг илүүрхэн эзэмшиж, санаачилгыг гартаа авч тоглож байв. Улмаар 30 дахь минутад Фабиан Руис гоол оруулж тоглолтын салхийг хагаллаа. Бельгийн шигшээ багийн хаалгач Тибо Куртуа зургаа дахь тоглолтдоо гараанд гарснаар ДАШТ-ий хамгийн олон тоглолтод оролцсон хаалгачдын жагсаалтын хоёрдугаарт ганцаараа бичигдэх болов. Энэ нь Куртуагийн хувьд 21 дэх тоглолт нь байлаа. Тэрбээр уг үзүүлэлтээр 2014 оны дэлхийн аварга, Германы хаалгач Мануэль Нойерын (23 тоглолт) дараа бичигдэж байна.
Испанийн шигшээ баг эхний минутуудад илүүрхэн тоглосон ч эрчээ сулруулж, өрсөлдөгчдөө тоог тэнцүүлэх боломж олгов. Тоглолтын 41 дэх минутад Шарль Де Кетеларе тооны харьцааг тэнцүүлж, Испанийн хаалгач Унаи Симоны ДАШТ-д гоол алдалгүй тогтоож байсан рекордыг зогсоожээ. Унаи Симон 649 минутын турш хаалгандаа гоол алдаагүй байсан юм.
Багууд нэмэлт цаг руу шилжихэд тун ойрхон байсан боловч 88 дахь минутад Мерино гоолдож, испаничууд дахин тэргүүлж эхэлжээ. Тэрбээр Дани Ольмогийн оронд талбайд гарсан байна. Хэрэв Бельгийн баг хаалгачаа сэлгэх шаардлага гараагүй бол гоол алдахгүй байх боломжтой байсан байж магадгүй юм. Тоглолтын 71 дэх минутад бэртсэн Куртуагийн оронд Сенне Ламменс талбайд гарсан бөгөөд тэрбээр шийдвэрлэх мөчид алдаа гаргаж, гоол алдсан байна. Мериногийн хувьд дараалан хоёр удаа хожлын гоол орууллаа. Португалын багтай 1/8 шигшээд тоглохдоо (1:0) тэрбээр 85 дахь минутад талбайд гарч, зургаан минутын дараа шийдвэрлэх гоолыг оруулсан билээ.
Мерино сэлгээгээр гарсныхаа дараа хожлын гоолууд оруулснаа санамсаргүй тохиолдол гэж үзэж байгаагаа хэлжээ. "Энэ зүгээр л санамсаргүй тохиолдол юм шиг санагдаж байна. Би үнэхээр баяртай байна. Дахиад ингэж чадна гэдэгтээ эргэлзэж байгаа ч харж л байя. Дэлхийн аваргад түрүүлэхэд ердөө хоёр тоглолт үлдлээ гэдэг бол мөрөөдөл биелэхтэй л адил. Мөрөөдөл маань биелнэ гэж найдаж байна" хэмээн тэрбээр ФИФА-гийн хэвлэлийн албанд ярилцлага өгөхдөө хэлсэн байна.
Испанийн шигшээ багийн ахлах дасгалжуулагч Луис де ла Фуэнте багийнхныхаа зан чанарыг онцлон дурджээ. "Энэ бол багийн зан чанар юм. Ийм зорилготой, ямагт сайжрахыг эрмэлздэг багийг дасгалжуулж байгаа нь миний хувьд нэр төрийн хэрэг. Бид Францыг хожиж чадна гэж бодох нь зүйн хэрэг. Үүний тулд бид шаргуу ажиллах болно. Францыг хоёр удаа хожсон цорын ганц баг бол бид. Хүчирхэг баг өөр нэгэн хүчирхэг багтай учраа таарах гэж байна" гэж тэрбээр хэллээ.
Хагас шигшээд Испанийн шигшээ баг Францын багтай долоодугаар сарын 14-нд тоглоно. Испанийн шигшээ баг түүхэндээ гурав дахь удаагаа ДАШТ-ий хагас шигшээд шалгарч байгаа бөгөөд тэд 2010 онд алтан медаль хүртэж байсан бол 1950 оны тэмцээнд дөрөвдүгээр байрт шалгарч байжээ.
Эх сурвалж: МОНЦАМЭ Агентлаг Д.Жаргал
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!