Ransomware бүлэглэлүүд олширч, кибер халдлагын эрсдэл нэмэгдэж байна

Дэлхий даяар байгууллага, иргэдийн мэдээллийг барьцаалан төлбөр нэхдэг ransomware буюу барьцаалагч хорт кодын халдлага нэмэгдэж, энэ төрлийн кибер гэмт хэрэг үйлддэг бүлэглэлүүд улам олширч байна.

Кибер аюулгүй байдлын Чек Пойнт Рисөрч байгууллагын мэдээлснээр 2026 оны хоёрдугаар улиралд идэвхтэй барьцаалагч хорт кодын бүлэглэлийн тоо 71-ээс 93 болж нэмэгджээ. Мөн халдагчдын мэдээлэл задруулдаг цахим хуудсуудад энэ хугацаанд 2,139 байгууллага хохирогчоор бүртгэгдсэн нь өмнөх оны мөн үеэс 33 хувиар өссөн үзүүлэлт юм.

Эн Си Си Групп-ийн судалгаагаар 2026 оны эхний улиралд дэлхий даяар 2,165 ийм төрлийн халдлага бүртгэгдсэн бол хоёрдугаар улиралд 2,229-д хүрчээ. Зөвхөн зургаадугаар сард 665 халдлага бүртгэгдсэн байна.

Халдлагад хамгийн их өртөж буй салбаруудын тэргүүнд үйлдвэрлэл орж байна. Хоёрдугаар улиралд бүртгэгдсэн нийт халдлагын 30 орчим хувь нь үйлдвэрлэлийн салбарт чиглэсэн бол хэрэглээний бүтээгдэхүүн, үйлчилгээ болон мэдээллийн технологийн салбарууд удаалжээ.

Бүс нутгаар нь авч үзвэл нийт халдлагын 44 хувь Хойд Америкт, 26 хувь Европт бүртгэгдсэн байна.

Сүүлийн үед томоохон хэдхэн бүлэглэл давамгайлах бус, шинээр байгуулагдсан болон жижиг бүлгүүд богино хугацаанд идэвхжих хандлага нэмэгдэж байгааг судлаачид онцолжээ. Блэк Кайт байгууллагын судалгаагаар 2025 оны дөрөвдүгээр сараас 2026 оны гуравдугаар сарын хооронд 61 шинэ бүлэглэл илэрсэн байна. Энэ нь дунджаар долоо хоног бүр нэгээс олон шинэ бүлэг бий болсон гэсэн үг юм.

Халдлагын арга хэлбэр ч улам өөрчлөгдөж байна. Кибер гэмт хэрэгтнүүд байгууллагын дотоод сүлжээнд шууд нэвтрэхээс гадна программ хангамж нийлүүлэгч, алсын зайнаас холбогдох систем, интернэтэд нээлттэй төхөөрөмжийн хамгаалалтын сул талыг ашиглах болжээ. Ингэснээр нэг нийлүүлэгчид хийсэн халдлага түүнтэй холбоотой олон байгууллагад зэрэг нөлөөлөх эрсдэл нэмэгдэж байна.

Мөн программ хангамжийн шинээр илэрсэн хамгаалалтын сул талыг халдагчид маш богино хугацаанд ашиглаж эхлэх болсон нь байгууллагуудад хамгаалалтаа шинэчлэх хугацааг улам богиносгож байна. Хиймэл оюуны хэрэгслийг хорт код боловсруулах, халдлагын арга хэрэгслийг хурдан өөрчлөхөд ашиглах эрсдэл мөн нэмэгдэж байгааг кибер аюулгүй байдлын судлаачид анхааруулжээ.

Ийм нөхцөлд байгууллагууд мэдээллээ тогтмол нөөцлөх, программ хангамж болон хамгаалалтын шинэчлэлийг цаг тухайд нь хийх, алсын хандалтын системийн хамгаалалтыг сайжруулах, ажилтнуудын кибер аюулгүй байдлын мэдлэгийг нэмэгдүүлэх шаардлага улам өсөж байна.

Эх сурвалж: MNB