.png){kind=logo}
Монголын боксын ХХ зууны манлай дасгалжуулагч, Монгол Улсын Гавьяат дасгалжуулагч Вандуйн Батбаяр агсны нэрэмжит боксын 2023 оны насанд хүрэгчдийн улсын аварга шалгаруулах тэмцээн энэ өдрүүдэд Спортын төв ордонд үргэлжилж байна.
Энэхүү тэмцээний үеэр боксын ОУХМ, Их Хэнгэрэг компанийн захирал Бат-Очирын Батбаяртай уулзаж сэтгэгдлийг нь сонссон юм.
“Монголын Боксын насанд хүрэгчдийн 2023 оны улсын аварга шалгаруулах тэмцээний нээлт ёслолын зохион байгуулалт нь маш сайхан болж байна. Олон жил улсын аваргын тэмцээний арын ажилд гүйж л явлаа.
Энэ удаагийн УАШТ-ий нэг ач холбогдол нь шүүгчид маань олон улсын нэг одтой шүүгчийн семинарт суралцан төгсөх юм байна. Манай шүүгчдэд бол маш сайхан боломж шүү. Анх “Лондон-2012” зуны олимпын өмнө насанд хүргэгчдийн болон залуучуудын тэмцээн, өсвөрийн улсын аваргын тэмцээнүүдийг зохион байгуулахдаа Монголын боксын хөгжилд үнэтэй хувь нэмэр оруулсан алдартнуудаа хойч үеийнхэндээ алдаршуулан таниулах нь зөв гэдэг үүднээс Өсвөрийн УАШТ-ийг ууган гавьяат дасгалжуулагч Бумуудэнгээгийн Олзот багшийн нэрэмжит, Залуучуудын УАШТ-ийг ууган гавьяат тамирчин, Ардын багш Хайдавын Алтанхуяг багшийн нэрэмжит, Насанд хүрэгчдийн УАШТ-ийг ХХ зууны манлай дасгалжуулагч, гавьяат дасгалжуулагч Вандуйн Батбаяр багшийн нэрэмжит болгохоор болсон түүхтэй билээ.
Энэ улсын хэмжээний тэмцээнүүдийг алдартнуудынхаа нэрэмжит болгох нь зөв гэж зүтгүүлсэн эрхэм нөхөд болох холбооны Удирдах зөвлөлийн гишүүн, гавьяат тамирчин Г.Батбилэг мөн ОУХМ. Ц.Цэрэнням, Спортын мастер Г.Aриунболд нарт талархал илэрхийлж байна.
Монгол Улсын Ардын багш, гавьяат тамирчин Дамдинжавын Банди багш анх 1979 онд "Олимпын гараа" тэмцээн зохион байгуулснаас хойш 2015 оноос эхэлж холбооны Ерөнхий нарийн бичгийн дарга, ОУХМ Ц.Батнасан маань Бага насны УАШТ-ийг "Олимпын гараа" тэмцээн болгон цар хүрээг улсын хэмжээний болгон өөрчилж байсанд талархах нь зүйтэй.
Түүнчлэн мэргэжлийн боксоор Монголоос төрсөн Дэлхийн анхны аварга, гавьяат тамирчин Дугарбаатарын Лхагва өөрийн байгуулсан “LAKVA BOXING PROMOTIONS” клуб дээрээ олон хүүхдүүд бэлдэж байгааг харахад таатай байна. Олимп, ДАШТ-ий хүрэл медальт, гавьяат тамирчин У.Мөнх-Эрдэнэ маань бас л боксын клуб байгуулан олон хүүхдийг ирээдүйн аваргууд болгохоор бэлтгэж байгаад талархах ёстой.
Энэ удаагийн УАШТ-д Монголын боксын анхны олимпын медальтан, “Сөүл-1988” олимпын хүрэл медальт, Монгол Улсын Гавьяат мастер Нэргүйн Энхбат асан ах маань их үгүйлэгдэж байна даа.
Энэ жилийн УАШТ-д оролцож байгаа нийслэлийн болон хөдөө, орон нутгийн нийт баг тамирчдад өндөр амжилт гаргахыг хүсэж, талархал илэрхийлье” гэлээ.
