.png){kind=logo}
Монгол Улсын Засгийн газрын 2022 оны 11 дүгээр сарын 23-ны өдрийн 417 тоот тогтоолоор Мэргэжлийн хяналтын байгууллагын үйл ажиллагааг 2022 оны 12 дугаар сарын 31-ний өдрөөр тасалбар болгож татан буулгахаар шийдвэрлэсэн.
Улмаар хяналтын чиг үүргийг яамд болон харьяа байгууллагуудад шилжүүлснээр геологи, уул уурхай, газрын тос, хийн хяналтын асуудал Уул уурхай, хүнд үйлдвэрийн яаманд харьяалагдах болсон.
Үүнтэй холбогдуулан өнөөдөр салбарын сайд Ж.Ганбаатар хяналтын асуудал хариуцсан албан хаагчид, мэргэжилтнүүдтэй уулзаж, үүрэг чиглэл өглөө.
Тэрбээр: “Хяналтын асуудал яамны харьяанд ирснээр “бодлого тодорхойлох-хэрэгжүүлэх-хяналт тавих” цогц үйл ажиллагаа явуулах боломж бүрдэж байна. Тиймээс зөвхөн “хянана, шалгана” гэдэг байсан ойлголтоос салж, “бодлого тодорхойлоход шаардлагатай бодит мэдээ, факт цуглуулах, санал гаргах”, “тодорхойлсон бодлогыг хэрэгжүүлэх, хэрэгжилтэд зөвлөн туслах”, “үр дүнд хяналт тавих” гэсэн циклээр ажиллах шаардлагатай. Уул уурхай, хүнд үйлдвэрийн яамны зүгээс салбарын хууль эрх зүйн тогтвортой байдлыг хангах, хариуцлагатай уул уурхайг төлөвшүүлэх, хөрөнгө оруулалтын орчинг сайжруулах чиглэлийг баримтлан ажиллаж байна. Иймд хуулийн хэрэгжилтийг сайтар анхаарч, гарч байгаа хийдэл, зөрчил, ойлгомжгүй байдал бүрд дүгнэлт хийж, асуудлыг шийдвэрлэж ажиллах, хариуцлагагүй уул уурхайтай хатуу тэмцэх, хөрөнгө оруулагчдад ээлтэй нөхцөлийг бүрдүүлэхэд анхаарах хэрэгтэй” гэв.
Монгол Улсын Засгийн газрын 2022 оны 295 дугаар тогтоолоор орон нутаг дахь төлөөлөгчийн газрыг бүсчилсэн байдлаар зохион байгуулахаар бүтэц, орон тоо нэмэгдсэн. Үүний дагуу Дорнод, Өмнөговь, Дорноговь, Сэлэнгэ, Ховд аймгуудад АМГТГ-ын Төлөөлөгчийн газрыг байгуулсан бөгөөд эдгээр байгууллагууд аймгуудын улсын байцаагч нартай нягт уялдаа холбоотой ажиллах шаардлагатайг сайд Ж.Ганбаатар мөн уулзалтын үеэр онцоллоо.
