.png){kind=logo}
“Ханжоу-2022” Азийн зуны паралимпын IV наадамд оролцох Монгол Улсын баг тамирчдыг үдэн гаргах ёслол өнөөдөр /2023.10.14/ Улаанбаатар Зочид буудлын Их танхимд боллоо.
БНХАУ-ын Ханжоу хотноо 2023 оны 10 дугаар сарын 22-28-нд болох бөгөөд 4 дэх удаагийн тус наадамд Монгол Улсаас спортын 14 төрлөөр 68 тамирчин өрсөлдөнө. Мөн дасгалжуулагч, албаны хүмүүсийн хамт, Монгол Улсын баг нийтдээ 110 хүн оролцох өргөн бүрэлдэхүүнтэй гэдгээрээ онцлогтой. Пара спорт Монгол Улсад илүү өргөжин хөгжиж шинэ шинэ спортын төрлүүд нэмэгдэж байгаа. Иймд Монголын үндэсний паралимпын хороонд шинэ параспортын холбоод нэмэгдэж, улмаар Монгол Улсын Засгийн газраас шигшээ багийн бус спорт төрлийн тамирчдад 199 сая төгрөг гаргаж дэмжсэн юм байна.
Гэрэл зургийг Д.Амаржаргал
Өмнөх “Жакарта-2018” Азийн зуны паралимпын наадамд Монгол Улсаас 9 төрлөөр 40 тамирчин оролцож байсан бол ийнхүү өргөн бүрэлдэхүүнтэй оролцож байгаа бөгөөд Засгийн газар, Олимп, нийтийн биеийн тамир, спортын үндэсний хороо, БТСУХ, МҮПХ зэрэг олон байгууллага, хамт олны дэмжлэгээр манай баг тамирчид Ханжоуг зориход бэлэн болжээ.
Азийн Паралимпын хороо нь 44 орныг эгнээндээ багтаасан шар тивийн паралимпын наадамд өрсөлдөх баг тамирчдыг үдэн гаргах ёслолыг нээж Олимп, нийтийн биеийн тамир, спортын сайд Бадмаанямбуугийн Бат-Эрдэнэ үг хэллээ. Тэрбээр, “Баг тамирчдад өндөр сахилга баттай, аливаа эрсдэлээс ангид байж, Монгол Улсын Төрийн далбааг олонтаа мандуулаарай” хэмээн хүсэн ерөөлөө.
Энэхүү IV наадамд 44 орны баг тамирчид спортын 22 төрөлд 604 багц медалийн төлөө өрсөлдөх юм. Монголын баг тамирчид жүдо, таеквондо, шатар, туялзуур сэлэм, хөнгөн атлетик, ширээний теннис, усанд сэлэлт, бочи, го-даам, буудлага, байт харваа, пауэрлифтинг, волейбол, бадминтон зэрэг төрлөөр хурд, хүч, ур чадвараа сорин оролцоно.
Монголын багийн тугчаар пауэрлифтингийн “Токио-2020” паралимпын аварга, “Рио-2016” паралимпын хүрэл медальт, ДАШТ-ий алт, мөнгөн медальт, дэлхийн цомын аварга, Ази тивийн аварга, дэлхийн дээд амжилтыг эзэмшигч, Хөдөлмөрийн баатар, гавьяат тамирчин Энхбаярын Содномпилжээ, пара таеквондогийн ДАШТ-ий алт, мөнгө, хүрэл медальт, Азийн АШТ-ий 4 удаагийн аварга, “Парис-2022” Гран при тэмцээний алт, “Софи-2022” Гран при тэмцээний мөнгөн медальт, гавьяат тамирчин Хүрэлбаатарын Энхтуяа нар сонгогджээ. “Ханжоу-2022” Азийн зуны паралимпын наадамд оролцох Монголын багийн ахлагчаар Д.Нямхүү ажиллах юм байна.
Монголын тамирчид “Гуанжоу-2010” Азийн зуны паралимпын анхдугаар наадмаас 2 мөнгө, 3 хүрэл медаль хүртсэн бол “Инчеон-2014” наадмаас 2 алт, 1 мөнгө, 8 хүрэл медальтай ирсэн хамгийн дээд амжилт байв. “Жакарта-2018” Азийн паралимпын наадмаас 1 алт, 1мөнгө, 3 хүрэл медальтай ирсэн түүхтэй билээ.
