Нийслэлийн Засаг дарга бөгөөд Улаанбаатар хотын Захирагч Х.Нямбаатар холбогдох албаныхны хамт өнөөдөр Баянгол дүүргийн 24, 26 дугаар хороонд ажиллалаа.

Тодруулбал, Баянгол дүүргийн 24 дүгээр хороо “Алтай” хотхонд байгуулах сургуулийн газар чөлөөлөлт, хотхоны орц, гарцыг нэмэх асуудлаар газар дээр нь ажиллав. Мөн тус дүүргийн 26 дугаар хороо Нарны хорооллыг Нарны замтай холбох явган хүний гүүрэн байгууламж барихаар холбогдох албаныхантай хэлэлцлээ.

“Алтай” хотхонд сургууль байгуулж, орц, гарцыг нэмэгдүүлнэ

“Алтай” хотхоныг анх 12 мянган айлын иж бүрэн цогцолбор хороолол нэртэйгээр байгуулсан. Хотхон дотор улсын сургууль, цэцэрлэг, дөрвөн талдаа орц, гарц бүхий авто замтай байхаар төлөвлөсөн боловч харамсалтай нь уг төлөвлөлтийг хийж чадаагүй байна. Өдгөө тус хотхонд 18 мянга орчим иргэн оршин суудаг бөгөөд хотхоны замын урд талын түрээсийн байранд 1200 орчим хүүхэд хоёр ээлжээр хичээллэж байгаа юм.

Хотын дарга уг асуудалтай холбогдуулан НИТХ-ын төлөөлөгч Д.Ихбаяр, Г.Гангамөрөн, Баянгол дүүргийн Засаг дарга Ө.Сумъяабаатар, Нийслэлийн Замын хөгжлийн газрын дарга Г.Баярсайхан болон “Тайгам-Алтай” ХХК-ийн төлөөлөлтэй газар дээр нь ажилласан юм.

Энэ үеэр Хотын дарга Х.Нямбаатар “Алтай хотхоны баруун хойд үзүүрээс буюу хуучнаар Мод боловсруулах үйлдвэрийн ойролцоох замыг чөлөөлөн 360 метр чулуун зам тавьбал дөрвөн тал руугаа гарцтай болж, хотхон дотроо түгжирдэг асуудлыг шийдэх боломжтой. Мөн тус хотхонд сургууль байхгүй учир нэг га газрыг чөлөөлж, 960 хүүхдийн сургууль байгуулах боломжтой.

Сургууль байгуулах газарт өртөж буй дулааны шугам сүлжээ зайлуулахтай холбоотой асуудлыг шийдэн, аж ахуйн нэгжүүдтэй зөвшилцөх хэрэгтэй. Өнгөрсөн 20 гаруй жилийн хугацаанд гаргасан алдаа бол орон сууцны хороолол байгуулахдаа сургууль, цэцэрлэг төлөвлөөгүй явдал. Иймээс энэ алдааг засаж, хотхон, хороолол дунд сургууль, цэцэрлэг нэмж барихаас гадна орц, гарцыг нэмэхэд анхаарна.

Мөн 12 дугаар сарын 6-наас дүүргүүд рүү худалдан авах ажиллагааны эрхийг шилжүүлэх тул дүүргийн удирдлагууд яаралтай тендерүүдээ зарлан, нэгдүгээр сар гэхэд гэрээгээ хийж, гуравдугаар сард бүтээн байгуулалтын ажил эхэлсэн байх ёстой” гэв.

Мөн Хотын дарга “Алтай” хотхоны орц, гарцын зураг төсөлд дахин тодотгол хийж, асфальт бетон зам хийлгүй, осол аваар гарсан үед хуулж, засвар хийх боломжтой чулуун зам тавихыг холбогдох албаныханд үүрэг болголоо.

Нарны хорооллыг Нарны замтай холбох явган хүний гүүрэн гарц байгуулна

Хотын дарга үргэлжлүүлэн Баянгол дүүргийн 26 дугаар хороо, Нарны хороололд холбогдох албаныхантай ажиллав. Тодруулбал, Нарны хорооллыг Нарны замтай холбох явган хүний гүүрэн байгууламжийг ирэх жил хийхээр төлөвлөж байна. Тус гүүрийг ашиглалтад оруулснаар 5200 өрхийн 20 мянга орчим иргэн хотын төв рүү явганаар зорчих, автомашин ашиглахгүй байх боломж бүрдэх юм.

НИТХ дахь МАН-ын бүлгийн дарга, НИТХ-ын төлөөлөгч Д.Ихбаяр:

-Нарны хорооллыг Нарны замтай холбосон явган хүний гүүрэн байгууламж барихаар нийслэлийн 2024 оны төсвийн төсөлд тусгасан. 141 дүгээр сургуулийн хувьд гурван ээлжээр хичээллэх эрсдэл үүссэн. Иймээс ирэх баасан гарагт сургуулийн өргөтгөлийн газрыг шийдвэрлэхээр “Хурд” группийн удирдлагатай Хотын дарга уулзахаар боллоо. Баянгол дүүргээс сонгогдсон НИТХ-ын төлөөлөгч нар хамтран үер, усны далан шуудуу, сургууль, цэцэрлэг, тохижилттой холбоотой олон асуудлыг шийдвэрлэхээр нийслэлийн ирэх оны төсвийн төсөлд тусгуулсан гэв.

НИТХ-ын төлөөлөгч Г.Гангамөрөн: "Нарны зам дээгүүр байгуулах явган хүний гүүрэн гарцын урт 105 метр. Нарны хороолол, “Алтай” хотхоны хүүхдүүдийг сургууль, цэцэрлэгт зөөх үеэр тухайн бүсийн орц, гарцад ихээхэн ачаалал үүсдэг. Төвлөрөл, түгжрэлийг сааруулахад хотхоноос орох, гарах гарцыг тэлэхээс гадна тус явган хүний гүүр чухал ач холбогдолтой. “Алтай” хотхонд гурван аж ахуйн нэгж, хоёр иргэнтэй зөвшилцөх шаардлагатай. Харин Нарны хороололд хоёр томоохон аж ахуйн нэгжтэй зөвшилцөнө. Баянгол дүүрэг 34 хороотой бөгөөд өнөөдөр зөвхөн хоёр хорооны асуудлыг ярьж байна. Үлдсэн 32 хорооны асуудлыг ч цаашид хөндөж, газар дээр нь ажиллана" хэмээлээ.

Хотын дарга Баянгол дүүргийн хоёр томоохон хотхонтой хороодод тулгамдаад буй асуудлуудыг НИТХ-ын төлөөлөгчид, дүүргийн удирдлагууд, холбогдох аж ахуйн нэгжийн төлөөллүүдтэй ирэх долоо хоногт хамтран хэлэлцэхээр болов.

НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС