.png){kind=logo}
Тэртээ 1927 оны 12 дугаар сарын 05-ны өдөр хуралдсан Судар бичгийн хүрээлэнгийн 10 хурлын тогтоолоор Судар бичгийн хүрээлэнгийн хуучин данс бичиг эрхлэх нэгэн орон тоог баталж, түүнд Ц.Лувсанг тохоон томилон ажилуулах болсон бөгөөд үүгээр Монгол Улсад орчин цагийн архивын албаны үйл ажиллагааны эхлэл гэж үздэг билээ.
Архивын алба үүсэж хөгжсөний 96 жилийн ой “Архивчдын өдөр”-ийг тохиолдуулан Архивын ерөнхий газрын даргын 2023 оны А/94 дүгээр тушаалаар тус газрын уншлагын танхимыг архивын салбарын анхны ажилтан “Ахмад данс хараач-архивч Цэрэндоржийн Лувсангийн нэрэмжит Эрдмийн танхим” болгон алдаршуулж, түүний цээж хөшөө, хэрэглэж байсан бичгийн хэрэгсэл зэргийг байршуулан, хүндэтгэл үзүүллээ.
Судар бичгийн хүрээлэнгийн хуучин данс хараа эмхлэх эрхлэгч Ц.Лувсан нь монгол, түвэд хос бичигтэй, хуучин цагийн бичгийн өндөр боловсролтой нэгэн байжээ.
Архивын албаны ууган ажилтан Ц.Лувсан 1896 онд Түшээт хан аймгийн Жонон засаг улсад туслагч гүнгийн хошуу одоогийн Төв аймгийн Заамар сумын нутаг Заамар уулын хойд талд ард, халх эцэг Чүлтэмийн Цэрэндоржийн 18 нас, эх Жалцавын Баживын 17 насан дээр ууган хүү нь болон мэндэлжээ.
Тэрбээр 1905 оны орчим Их Хүрээнд ирээд Эрдэнэ Шанзудбагийн яамны монгол бичгийн сургуульд суралцан төгсөөд Эрдэнэ Шанзудбагийн яаманд бичээчээр ажиллан ажлын гараагаа эхэлж, Засгийн газрын төлөөний түшмэл, Намын зохион байгуулагч, Номын сангийн эрхлэгч зэрэг албан тушаалыг хашиж байжээ.
Архивын ерөнхий газар 2020 оноос Ц.Лувсангийн намтар, түүхийг судлах үр хүүхдүүдийн нь сурвалжлан олж ярилцлага авах, зорилгоор 2020.04.02, 2022.01.25-нд хоёр удаа Төв аймгийн Заамар сумын нутагт ажиллаж, гэр бүлийнх нь хүсэлтээр Ц.Лувсангийн хэрэглэж байсан ном судар, бичгийн хэрэгсэл, өөрийн болон ах дүүгийн гэрэл зургийг эх хувиар нь хүлээн авч, Үндэсний төв архивын сан хөмрөгийг баяжуулсан юм.
Мөн өдрийг тохиолдуулан төрийн албанд болон архивын салбарт үр бүтээл, идэвх санаачилгатай ажиллаж байгаа зарим албан хаагчдыг Хууль зүй, дотоод хэргийн яамны болон байгууллагын шагналаар шагнаж урамшууллаа.
Шагнал хүртсэн болон нийт архив, албан хэрэг хөтлөлтийн салбарынханд “Архивчдын өдөр”-ийн мэнд дэвшүүлж, цаашдын ажил, хөдөлмөрт нь өндөр амжилтыг хүсье!
