“KING TUG” Н.Төгсцогт Дэлхийн аваргын төлөө дахин тулалдах уу?

Мэргэжлийн боксын ертөнцөөр "нисч" буй, Монголын спорт, тэр дундаа бокс, тулааны урлаг сонирхогчдод "бал бурам" мэт сонсогдох нэгэн шуугианыг АНУ-аас спортын сэтгүүлч Ц.Энхтүвшин /Таван цагариг сонин/ дуулгаж байна.

Монгол Улсын гавьяат тамирчин, сонирхогчдын боксын олимп, дэлхийн мөнгөн медальт, мэргэжлийн боксын IBO холбооны 57,2 кг-ийн жинд дэлхийн аварга болж байсан Нямбаярын Төгсцогт маань тун удахгүй WBA ( World Boxing Association) холбооны аваргын бүсийн төлөө тулааныг хийх "чимээ" байна.

WBA холбооны 57,2 кг-ийн жинд аваргын сэнтий одоогоор эзэнгүй байгаа бөгөөд аваргын бүсийн төлөөх тулаанд оролцох саналыг манай "King Tug" Төгсцогтод мэргэжлийн боксын ертөнцөд тодорхой нэр хүндтэй, өөрийн орон зайтай промоутер, тв, киноны продюсер Лоу ДиБелла тавьжээ.

"ДиБелла энтертайнмент" -д Бернард Хопкинс, Андре Берто гэх мэт дэлхийн аваргууд харьяалагдаж байсан бөгөөд одоо Жорж Камбосо, Режи Прогрэ, Тэвин Фармер нарын олон дэлхийн аваргууд данстай.

Манай Төгсөө (31 настай) -ийн өрсөлдөгч нь мексик цустай АНУ-ын боксчин "Хятад" ( Еl Chinito, The Chinese) хочит, 29 настай Анжело Лео байх магадлал тун өндөр гэнэ. Лео 2012 оноос хойш мэргэжлийн боксын рингэнд 23 тулаан хийснээс 22 удаа ялж(10ко), ганцхан ялагдсан, WBO холбооны 55,3 кг-ийн дэлхийн аварга болж байсан, хамгийн сүүлд 2 жил шахуу тулаан хийгээгүй байж байгаад өнгөрсөн 11 дүгээр сард Доминикан улсын Никола Поланког ялж, WBA холбооны Хойд Америк тивийн аваргын бүсийг зүүжээ.

Харин манай Төгсөө мэргэжлийн рингэнд 2015 онд гарснаас хойш 15 тулаан хийж 12 ялж(9 ко) , 1 тэнцэж, 2 хожигдсон амжилттай байгаа.

Хоёр хожигдохдоо хоюуланд нь аваргын бүсийн төлөө( 2020 онд WBC -ийн аваргын төлөө Гэри Рассельд, 2021 онд WBA -ийн түр аваргын төлөө( жин өгсөж) Крис Колбертод) тулаанд.

Хамгийн сүүлд Төгсөө маань 2022 оны нэгдүгээр сард "Цөлийн шуурга" хочит Намиби улсын боксчин Сакариа Лукастай тулалдаж хайнцсанаас хойш тулаан хийгээгүй байгаа билээ.

Тулаан хаана, хэзээ болохыг нарийн зарлаагүй хэдий ч 2024 оны нэгдүгээр сарын сүүлч, эсвэл хоёрдугаар сарын эхээр Нью Йорк, Лас Вегаст зохион байгуулах байх гэсэн таамаглал байна.

Энэ тулаан болвол манай Төгсөө ялах бүрэн боломж бий. Манай хүн Леогоос нуруугаар өндөр, мөн өөрийн үндсэн жинд тулалдана, харин Лео жин өгсөнө гэх мэт. Леогийн арга барил нь "нэг номероор" буюу санаачилга авч , давшиж тоглодог, өрсөлдөгчийнхээ биед (body shot) олон удаа хийж, хөдөлгөөнийг багасгаж, ядрааж байгаад гол довтолгооноо хийдэг гэж мэргэжилтнүүд дүгнэдэг юм байна.

Ийнхүү "King Tug" маань, Төгсцогт маань мэргэжлийн боксын рингэнд дахин тулаан хийх, хийх хийхдээ шууд дэлхийн аварга цол, бүсийн төлөө тулалдах чихэнд чимэгтэй мэдээ сонсогдлоо доо.