Г.Өсөхбаяр аваргын хүү Ө.Дэмиджамц сүмод анхны ялалтаа авлаа

Хаврын тэмцээний шинэ бөхийн шалгалтад тэнцсэн 25, дахин барилдаж эхэлсэн 5, гадаад нэг бөх өнөөдрөөс маэзүмо барилдаж эхэллээ. Энэ ганц гадаад бөх нь Дархан аварга Г.Өсөхбаярын хүү Ө.Дэмиджамц байна. Энэ жил 23 настай тэрээр их аварга Хакүхогийн Миягино дэвжээнд элссэн юм.

Ө.Дэмиджамц Сэйхакүхо гэсэн маш том нэртэй барилдаж, анхны барилдаандаа эхний ялалтаа байгууллаа. Сэй гэсэн ханз нь гэгээн, нандин гэсэн утгатай. Исэгахама дэвжээний бөхийг ялсныхаа дараа сэтгүүлчдэд “Маш их анхааралтай барилдсан. Сэй гэдэг ханзийг нэрэндээ заавал оруулахыг хүссэн. Учир нь миний Дэмиджамц гэдэг нэр бол Хиргүй далай гэсэн утгатай. Хакүхо багш янз бүрээр бодож байгаад өөрийнхөө нэртэй нийлүүлсэн. Хакүхо гэсэн нэртэй барилдаж байгаа болохоор ялагдаж огт болохгүй. Хүнд ачаа ч барилдаан болгондоо анхаарч барилдах болно. Их аваргатай царай зүс адилхан гэж олон хүн хэлдэг. Их аваргынхаа удирдлага дор барилдах бол миний хамгийн том хүсэл” гэж ярьжээ.

Ө.Дэмиджамц 2000 оны наймдугаар сарын 24-нд төрсөн. 192 см өндөр, 127 кг жинтэй. 2016 онд Японы Тоттори жёохокү сургуульд элсэж, манай сонирхогчдын сүмогийн алдарт мэргэжилтэн Р.Гантөгс багш дээр хичээллэсэн. Дошишя их сургуулийн сүмо бөхийн багт байхдаа Бүх Японы аварга шалгаруулах оюутны тэмцээнд оролцож, Каназавагийн тэмцээнд түрүүлж байсан.