.png){kind=logo}
Азийн физикийн олимпиадыг зохион байгуулах үндэсний хорооны анхдугаар хурал болж 23 дахь удаагийн энэхүү олимпиадыг энэ оны 5 дугаар сард Монгол Улсын Ерөнхийлөгчийн ивээл дор Улаанбаатар хотноо хийх бэлтгэл ажлын талаар ярилцав.
Уг олимпиадыг Монгол Улсад зочлох жилийн хүрээнд зохион байгуулах бөгөөд Засгийн газар тогтоол гарган зохион байгуулах хорооны бүрэлдэхүүнийг баталсан юм.
Азийн 23 дахь удаагийн физикийн олимпиадад урьдчилсан байдлаар 30 гаруй орны 240 сурагч 60 багш оролцохоор байна. Манай улсын тухайд 2001 оноос хойш уг олимпиадад оролцож байна. Өнөөдрийг хүртэлх хугацаанд 3 хүрэл медаль, 4 тусгай байрын шагнал хүртжээ.
Монгол Улсад 1000 гаруй физикийн багш байна. Азийн физикийн олимпиадыг эх орондоо явуулснаар багш нарын мэргэжлийн ур чадвар дээшилж, сурагчдын амжилт ахина. Олимпиадад 300 иж бүрэн лаборатори ашиглах бөгөөд олимпиадын дараа лабораториудыг Еөнхий боловсролын сургуулиудад хүлээлгэж өгөх бөгөөд энэ сургалтын баазыг бэхжүүлэх боломж бүрдэх юм.
Үндэсний хороо нь Академик, зохион байгуулалтын, сургалтын гэсэн 3 дэд хороотой. Академик хороо нь олимпиадын бодлого боловсруулах үйл ажиллагааг хариуцаж байгаа бол 1 сараас хойш үндэсний хэмжээний физикийн сургалтуудыг сургалтын хороо хариуцан зохион байгуулсаар байна.
Монгол Улсын Ерөнхийлөгчийн ивээл дор зохион байгуулж байгаа Азийн Физикийн олимпиадад Нобелийн шагналт эрдэмтнийг оролцуулахаар урилга хүргүүлэн бэлтгэл хангаж байна.
Үндэсний хорооны анхдугаар хуралдаанаар зохион байгуулалтын ажлын хуваарийг баталж, шаардлагатай санхүүжилтийг шуурхай шийдвэрлэхээр боллоо.
