"Парис-2024" Зуны олимпын XXXIII наадам 7 дугаар сарын 26-нд нээлтээ хийхэд 75 хоног үлдээд энэ цаг дор Монголын чөлөөт бөхийн дахин олимпын 3 эрх авснаар Монгол Улс өнөөдрийн байдлаар спортын 6 төрөлд 17 эрх хүртээд байна.

Тодруулбал:

1. Байт сурын спорт: Олон улсын хэмжээний мастер /ОУХМ/ Б.Отгонболд (Азийн наадам алтан медаль, БНХАУ-Ханжоу)
2. Боксын спорт: ОУХМ О.Есүгэн (Азийн наадам хүрэл медаль, БНХАУ-Ханжоу, эмэгтэй 50 кг)
3. Чөлөөт бөхийн төрлөөр: ОУХМ Д.Отгонжаргал (“Белград-2023” чөлөөт бөхийн ДАШТ, мөнгөн медаль 50 кг)
4. ОУХМ Э.Дэлгэрмаа (“Белград-2023” чөлөөт бөхийн ДАШТ, мөнгөн медаль 68 кг)
5. -ОУХМ Б.Бат-Эрдэнэ (“Бишкек-2024” чөлөөт бөхийн Азийн эрхийн тэмцээн, 86 кг)
6. Монгол Улсын гавьяат тамирчин М.Лхагвагэрэл (“Бишкек-2024” чөлөөт бөхийн Азийн эрхийн тэмцээн, 125 кг)
7. Монгол Улсын гавьяат тамирчин П.Орхон (“Бишкек-2024” чөлөөт бөхийн Азийн эрхийн тэмцээн, 62 кг)
8. Дугуйн спортоор: ОУХМ С.Жамбалжамц (Азийн наадам хүрэл медаль, БНХАУ-Ханжоу, ганцаарчилсан төрөл)
9. Буудлага спортын төрлөөр: ОУХМ Э.Даваахүү (“Жакарта-2024” Ази тивийн аварга шалгаруулах тэмцээн, хүрэл медаль, 10 м хийн гар буу)
10. ОУХМ Н.Баяраа (“Жакарта-2024” Ази тивийн аварга шалгаруулах тэмцээн, 9 дүгээр байр, 50 м 3 байрлал урт буу)
11. ОУХМ О.Есүгэн (“Баку-2023” буудлагын дэлхийн аварга шалгаруулах тэмцээн, 9 дүгээр байр, 50 м 3 байрлал урт буу)
12. Хөнгөн атлетик: ОУХМ Г.Хишигсайхан (“Токио-2024” Марафон 8-р байр)
13. ОУХМ Б.Мөнхзаяа (“Сөүл-2024” Марафон 7 дугаар байр)
14. Монгол Улсын гавьяат тамирчин Б.Сэр-Од нар эрхээ өвөртлөөд буй.

15. Чөлөөт бөхийн төрлөөр: ОУХМ Б.Хулан ( эмэгтэйчүүдийн 53 кг-д олимпын эрх олгох дэлхийн эрхийн тэмцээн Станбул хот)

16. ОУХМ Э.Даваанасан (эмэгтэйчүүдийн 76 кг-д олимпын эрх олгох дэлхийн эрхийн тэмцээн Станбул хот)

17. Монгол Улсын гавьяат тамирчин Т.Тулга (эрэгтэйчүүдийн 65 кг-д олимпын эрх олгох дэлхийн эрхийн тэмцээн Станбул хот

Хамгийн эхний олимпийн эрхийг өвөртөлсөн тамирчин бол боксын эмэгтэйчүүдийн 50 кг-д хүч сорьсон О.Есүгэн. Манай тулаанч О.Есүгэн дэлхийн хошой аварга, Казахстаны Назым Кызайбайг ялж, Азийн наадмын хүрэл медалийн болзол хангаснаар "Парис 2024" олимпод оролцох эрхээ баталгаажуулсан. Ялсан нь медальд хүрэх тун хариуцлагатай даваанд манай боксчин шийдэмгий тулалдсаар өрсөлдөгчөө оноогоор ялсан. Шүүгчдийн дөрөв нь манай боксчинг ялсан гэсэн бол үлдсэн нэг нь тэнцсэн гэж үзсэн билээ. Тэрээр хагас шигшээ буюу медалийн өнгөө шийдэх тулаанд БНХАУ-ын Юү Вуд оноогоор ялагдсанаар хүрэл медаль хүртсэн билээ.

Уг тэмцээнээс дараагийн эрхийг өвөртөлсөн тамирчин бол Б.Отгонболд. Тэрээр түүх бичиж “Парис 2024” эрх өвөртөлсөн. "Ханжоу 2022" Азийн наадмын байт харвааны ганцаарчилсан төрөлд Б.Отгонболд хагас шигшээд Казахстаны харваач Илфат Абдуллиныг 6:2-оор буулган авч, Азийн наадмын мөнгөн медалийн болзол биелүүлээд зогсохгүй “Парис 2024” олимпын эрхээ авсан. Тэрээр аваргын төлөөх өрсөлдөөнд эзэн орны харваач Жи Шиан Шоуг 6:2-оор буулган авч, түүхэн медалийн эзэн болсон билээ. Мөн Азийн наадмын анхны хос медальт боксчин болсон, ДАШТ-ий мөнгөн медальт, "Алдар" спорт хорооны тамирчин, олон улсын хэмжээний мастер Б.Чинзориг уг наадмаас эрхээ өвөртөлсөн ч хориотой бодисын жагсаалтад орсон метадиеноны метаболит гэх бодис илэрч, Парисын олимпд оролцох боломжгүй болсон юм.

Белградаас эрх өвөртөлсөн чөлөөтийн хоёр

Олон улсын хэмжээний мастер Э.Дэлгэрмаа, Д.Отгонжаргал нар 2023 оны есдүгээр сарын 16-21-ний хооронд Белградад болсон ДАШТ-ээс тус тус мөнгөн медаль хүртэж олимпт оролцох тийзээ захиалсан.

Тодруулбал, 68 кг-ийн жинд ОУХМ Э.Дэлгэрмаа мөнгөн медаль хүртсэн бөгөөд тэрээр аваргын алтан медалийн төлөөх барилдаанд Туркийн бөх Бусе Тосунд ялагдсанаар мөнгөн медаль хүртсэн юм. Мөн 50кг-ын жинд ОУХМ Д.Отгонжаргал мөнгөн медаль хүртсэн. Тэрээр алтан медалийн төлөө Япон улсын тамирчин олимпийн аварга, Дэлхийн 3 удаагийн аварга Юи Сүсакид 10:0 оноогоор цэвэр ялагдаж ДАШТ-ээс хоёр жил дарааллан мөнгөн медаль хүртсэн юм.

“Бишкек”-ээс гурван эрх

“Парис 2024” чөлөөт бөхийн Олимпын эрх олгох Азийн бүсийн тэмцээн Киргиз улсын нийслэл Бишкек хотноо болсон. Тэмцээнд манай улсын эрэгтэй 6, эмэгтэй 4 тамирчин ур чадвараа сорьсноос П.Орхон, М.Лхагвагэрэл, Б.Бат-Эрдэнэ нар Олимпын эрхээ хүртлээ. П.Орхоныг дутуугаа гүйцээнэ хэмээн бөх сонирхогчид хүлээж буй. Өнгөрсөн жилийн Дэлхийн аварга шалгаруулах тэмцээнээс Д.Отгонжаргал, Э.Дэлгэрмаа нар мөнгөн медаль авснаар Олимпын эрхээ аваад байсан билээ. Ингэснээр Парисын Олимпын чөлөөт бөхийн төрөлд Монголын 5 тамирчны эрх баталгаажив.

Олимпд өрсөлдөх Монголын анхны дугуйчин

Олон улсын дугуйн холбооноос “Парис-2024” зуны олимпын наадмын эрхийн оноо олгох тэмцээнүүдийг 2022 оны аравдугаар сарын 19-нөөс 2023 оны аравдугаар сарын 17-ны хооронд зохион байгуулж, дүнгээ гаргасан. Олимпын эрхийн оноо олгох тэмцээн дуусгавар болж, манай улсын дугуйчин С.Жамбалжамц 1367 оноотойгоор 29 дүгээр байрт жагссан үзүүлэлтээр “Парис-2024” олимпын засмал замд уралдах шилдэг 95 дугуйчны нэг болов. С.Жамбалжамц Ази тивийн чансааны хоёрдугаар байрт бичигдэж байгаа бөгөөд олимпын наадамд эрх авч хурд хүчээ сойх Монголын анхны дугуйчин болж байна. Түүний эрх 2023 оны аравдугаар сарын 17-нд албажсан юм.

Буудлагынхан гурван эрх өвөртлөөд байна

Буудлагын тамирчид одоогоор гурван эрх өвөртлөөд буй. Индонезийн нийслэл Жакарта хотод 2024 оны нэгдүгээр сард олимпын эрх олгох буудлага спортын Ази тивийн аварга шалгаруулах тэмцээн болж өндөрлөсөн. Тус тэмцээнээс Монголын тамирчид хоёр мөнгөн медаль хүртэж, олимпын хоёр эрх хүртсэн. Тухайлбал, тэмцээний гар бууны 25 метрийн дасгалд Э.Даваахүү мөнгөн медаль хүртсэн бол эмэгтэйчүүдийн урт бууны 50 метрийн багийн төрөлд О.Есүгэн, Ч.Нарантуяа, О.Янжинлхам нар мөнгөн медаль хүртсэн. Ингэснээр “Парис-2024” зуны олимпын наадамд оролцох эрхийг Э.Даваахүү, Н.Баяраа нар авсан юм. О.Есүгэний хувьд “Парис-2024” зуны олимпын наадамд оролцох эрхээ 2023 онд авсан юм.

Отгон эрхийг гавьяат тамирчин Б.Сэр-Од хүртэнэ

2024 оны гуравдугаар сард болсон "Токио-2024” марафонд Монголын тамирчин, Ази тивийн аварга Г.Хишигсайхан 2:26:32 цагийн амжилтаар "Парис-2024" зуны олимпын наадамд оролцох болзол биелүүлсэн. Марафон гүйлтийн эмэгтэйчүүдийн ангилалд уралдсан Г.Хишигсайхан нь Монгол Улсын шинэ дээд амжилтыг шинэчлэн тогтоож, шагналт наймдугаар байрт шалгарсан юм. Тэрээр Токиогийн марафонд наймдугаар байрт шалгарсан анхны монгол тамирчин болсон. Мөн марафонч Б.Мөнхзаяа "Сөүл марафон 2024"-д оролцож, 2:24:44 цагийн амжилтаар долоодугаар байрт шалгаран Монгол Улсын эмэгтэй тамирчдын рекордыг дахин шинэчлэн тогтоож, олимпд оролцох эрхтэй болсон юм. Харин марафончдын сүүлийн эрхийг гавьяат тамирчин Б.Сэр-Од өвөртөлсөн гэхэд болно. Одоогоор эрэгтэй 70 тамирчны нэрс тодорсон бөгөөд удахгүй 10 тамирчныг онооны жагсаалтаар олимпд оруулна. Энэ 10 тамирны нэг нь гавьяат тамирчин Б.Сэр-Од юм. Энэ жагсаалтыг тавдугаар сарын 12-нд зарлана.

Дөрвөн төрөлд эрхийн төлөө өрсөлдөж байна

Одоогоор хүндийн өргөлтийнхөн, жүдочид олимпын эрхийн оноо олгох тэмцээнд оролцож буй. Мөн “Парис-2024” зуны олимпын наадмын боксын төрөлд эрх олгох сүүлчийн тэмцээнд оролцохоор боксчид Тайланд улсыг өнөөдөр /2024.05.08/ зорьсон. Чөлөөт бөхийн төрөлд олимпын эрх олгох тэмцээн маргааш Туркийн Истанбул хотноо эхэлнэ. Уг тэмцээнд МЧБХ-ны “Парис-2024” олимпын наадмын ерөнхий дасгалжуулагч, гавьяат тамирчин Б.Наранбаатараар удирдуулсан есөн тамирчин олимпын эрхийн төлөө өрсөлдөнө.