.png){kind=logo}
Нидерланд улсын Эндховен хотноо энэ 5 дугаар сард зохион байгуулсан "Эндховен Кап" олон улсын "А" зэрэглэлийн боксын тэмцээнд Монгол Улсын гавьяат дасгалжуулагч Ж.Энхтөрийн удирдлага дор Монголын 3 боксчин амжилттай оролцоод иржээ.
Энэ удаагийн "Эндховен Кап" уламжлалт тэмцээнд 16 улсын 250 шахам тамирчид хүч, ур чадвараа сорин өрсөлдсөнөөс эрэгтэйчүүдийн 63,5 кг жинд ОУХМ Т.Энхтөр мөнгөн медаль, эмэгтэйчүүдийн 54 кг жинд ОУХМ Э.Мичидмаа хүрэл медалийг тус тус хүртсэн байна.
Гавьяат дасгалжуулагч Ж.Энхтөр: “Манай 3 тамирчин энэ тэмцээнд амжилттай оролцлоо. Эрэгтэйчүүдийн 57 кг-д тулалдсан Г.Лундаагийн хувьд ч тун сайн тоглолоо. Монголын боксын холбооны ерөнхийлөгч В.Ганзориг шигшээ багийн тамирчид маань Тайланд улсад олимпын эрхийн тэмцээнд оролцож байгаа энэ үеэр залуу тамирчдаа Европ тивд /Нидерланд/ болсон энэ тэмцээнд оролцуулсанд ихэд талархаж байна. Тус тэмцээнд шинээр байгуулагдсан Дэлхийн боксын байгууллага /WBO/-д элссэн гишүүн орнуудын шилдэг боксчид ирж хүч, ур чадвараа сорьсон нь онцлогтой байлаа. Швейцарт ажиллаж, амьдарч байгаа Олон улсын шүүгч С.Энхтулга /Enkhee Suki Sangi/ энэ тэмцээнд шүүгчээр ажилласан юм. Тэр Монголын боксчдынхоо талаар Европод болон WBO холбооныхонд танилцуулж, холбож өгч байгааг хараад бид талархаж байлаа. Монголын боксчид өндөр ур чадвартай, хүчтэй өрсөлдөгч гэдгийг энд ирсэн улс орныхон төдийгүй европчууд тун сайн мэддэг юм билээ.
Тус тэмцээний үеэр WBO холбооны ерөнхийлөгч, ноён Борис ван дэ Ворст /Boris van der Vorst/ болон Норвегийн боксын холбооны ерөнхийлөгч Лэн Хуайд /Len Huaid/ нар Монголын баг тамирчидтай уулзаж, баяр хүргэсэн” гэдгийг ч онцлон ярьж байв.
