ЛОНДОН, 2024 оны наймдугаар сарын 8 /ВВС/. Өчигдөр буюу лхагва гарагт Олимпын тамирчид спортын 10 төрөлд 23 багц медалийн төлөө өрсөлдсөнөөс гадна багийн спорт, гүйлт, морин спорт, чөлөөт бөхийн төрлүүдэд шийдвэрлэх чухал тоглолт, үзүүлбэр, барилдаанууд боллоо.

Зээрэнцэг: Бага Алекна алт авч чадсангүй

Зээрэнцэг шидэгчдийн тэмцээнд дэлхийн дээд амжилтын эзэн Миколас Алекна Олимпын аварга болж чадаагүй нь багагүй дуулиан дэгдээлээ. Зээрэнцгийг 70 м-ийн хол зайд шидэж чадсан Ямайкийн тамирчин Рохе Стона Олимпын дээд амжилтыг тогтоосон байна.

Түүнээс гуравхан см-ийн наана зээрэнцгийг шидсэн Алекна мөнгөн медаль хүртлээ. Энэ удаагийн тэмцээнд оролцохоор Литвийн алдарт тамирчин, Олимпын хошой аварга Виргилюс Алекнагийн хоёр хүү нь Парист ирсэн бөгөөд Мартинас Алекна финалд шалгарч чадсангүй. Мөн Литвийн өөр нэгэн тамирчин Андрюс Гузюс 8 дугаар байр эзэлжээ.

Бокс: Хижняк Олимпын аварга болж, Оралбай мөнгөн медаль хүртлээ

80 хүртэлх кг-ийн жингийн финалын тулаанд 29 настай Украины боксчин Александр Хижняк дэлхийн аварга Казахстаны тамирчин Нурбек Оралбайг ялснаар Олимпын аварга цолыг хүртлээ. Хижняк бол Токиогийн Олимпын мөнгөн медальт, Европын ба дэлхийн аваргаар шалгарч байсан туршлагатай тамирчин юм.

Ингэснээр Украины тамирчид гурав дахь алтан медалиа зүүсэн бөгөөд одоогийн байдлаар нийтдээ 8 медаль буюу 3 алт, 2 мөнгө, 3 хүрэл медаль хүртээд байна.

Волейбол: Талбайн эзэд финалд шалгарлаа

Лхагва гарагт Францын тамирчид хагас шигшээд Италийн багийг гурван сетэд дараалан хожсоноор шигшээ тоглолтод шалгарлаа. Ийнхүү францчууд багийн спортоор финалд шалгарсан тоо дахин нэгээр нэмэгдэв.

Харин дэлхийн чансааг тэргүүлэгч польшууд ширүүн өрсөлдсөний эцэст 3:2 харьцаагаар АНУ-ын багийг арайхийн буулгаж авлаа. Гар бөмбөгийн тэмцээний шигшээ тоглолт 10-ны бямба гарагт, хүрлийн төлөөх тоглолт 9-нд болно.

Сагсан бөмбөг: эзэн орны бүсгүйчүүд хагас шигшээд шалгарлаа

Өчигдөр болсон хасагдах шатны ¼-ийн шигшээ тоглолтын дүнгээр мөнгө, хүрэл медалийн төлөө Франц, Бельги, Австралийн багууд өрсөлдөх нь тодорхой боллоо. Мөнгө, хүрэл гэсний учир гэвэл, эмэгтэйчүүдийн сагсан бөмбөгт ямар баг аваргалах вэ гэдгийг таахад тун амархан. Сүүлийн 20 жилийн хугацаанд болсон Олимпын наадмуудын эрэгтэйчүүдийн сагсан бөмбөгийн тэмцээнд зарим багууд Америкийн сагсан бөмбөгчидтэй ач тач өрсөлдөж байгаа бол сүүлийн 10 Олимпын наадамд АНУ-ын эмэгтэйчүүдтэй өрсөлдөж чадах баг өнөөдрийг хүртэл гарч ирээгүй л байна.

Британичууд дахиад л алтгүй хоцров

Хэдийгээр итгэл найдвар тавьж байсан боловч Британийн тамирчид хоёр өдөр дараалан алтан медаль авч чадсангүй. Дугуйн тусгай зам дахь хөөж гүйцэх уралдаанд Европ, дэлхийн аварга Их Британийн баг Австралийн дугуйчдыг "гүйцэж түрүүлж” чадалгүй мөнгөн медаль хүртсэн бөгөөд үүндээ ч сэтгэл хангалуун байлаа. Хүрэл медалийг Италийн дугуйчид хүртсэн байна.

Мэтью Хадсон-Смит 6 дугаар зам дээр

Британийн эмэгтэй дугуйчдын дөрвөл хүрэл медаль хүртсэн бол АНУ-ын баг шинэ зеландчуудыг финалд ялснаар Олимпын аварга боллоо.

400 м-ийн гүйлтэд Их Британийн Мэтью Хадсон-Смит барианд орохоос өмнөх 20 м-ийн зайд магнайлан гүйж байсан боловч Америкийн тамирчин Куинс Холл гэнэт ухасхийн тэсэрч, өрсөлдөгчөөсөө ердөө зууны дөрөвхөн секундээр урьтан барианд орсноор алтан медаль хүртлээ. Замбийн гүйгч Музала Самуконга хүрэл медалийн эзэн болжээ.

Скейтбордын "их багш"

Өчигдөр болсон скейтбордын тэмцээний явцад өвөрмөц нэгэн дээд амжилт бүртгэгдсэн нь тэмцээнд оролцогчдын насны зөрүү байлаа. Экстрим спортын домог, скейтбордын "их багш" 51 настай АНУ-ын иргэн Энди Макдональд Их Британийн далбаан дор талбайд гарч ирлээ.

Америкийн иргэн Макдональд амьдралынхаа туршид АНУ-ын далбааг барьж тэмцээн уралдаанд оролцсоор ирсэн бол энэ удаад Их Британийн нэрийн өмнөөс оролцсон юм. Учир хэмээвээс, түүний эцэг нь англи хүн ажээ.

Макдональд бол бүр 1990 оны эхний хагас үеийн скейтбордын домогт тамирчин бөгөөд түүний гүйцэтгэдэг элементүүдийг залуу өрсөлдөгчид нь дууриан хийсээр иржээ. Түүнд бүх өнгийн медалийн олон тооны цуглуулга байдаг боловч зөвхөн Олимпын медаль л дутуу. Тэрбээр Парист ирээд финалд шалгарч чадаагүй боловч сэтгэл санаагаар огтхон ч унасангүй.

Энэ удаагийн скейтбордын тэмцээнд Австралийн Киган Палмер түрүүлж, мөнгө, хүрэл медалиудыг АНУ-ын тамирчин Том Шаар, Бразилын Аугушту Акиу нар хүртлээ.

Албан ёсны бус багийн дүнгээр эхний таван байрны дараалал өөрчлөгдсөнгүй. Медалийн хүснэгтийн тэргүүнд 27 алтан медаль, нийтдээ 100 орчим медаль хүртээд буй АНУ-ын баг бичигдэж бол хоёрдугаарт 25 алтан медаль авсан Хятадын тамирчид, тэдний араас Австрали /18 алт/, Франц /13 алт/, Их Британийн /12 алт/ багууд жагсаж байна.

Эх сурвалж: МОНЦАМЭ Агентлаг тоймч Б.Адъяахүү