.png){kind=logo}
КУПЕРТИНО, 2024 оны аравдугаар сарын 31 /Forbes/. Хиймэл оюуны Apple Intelligence функцтэй, M4, M4 Pro, M4 Max процессор бүхий шинэ MacBook Pro зөөврийн компьютеруудыг Apple компани танилцууллаа.
Apple-ийн мэдээлснээр, M4 чип бүхий MacBook Pro загвар нь зураг засварлах зэрэг ажлыг гүйцэтгэхэд M1 процессортой 13 инчийн дэлгэцтэй MacBook Pro-гоос 1.8 дахин хурдан ажээ. Түүнчлэн Blender дээр ажиллах гэх мэт илүү ачаалалтай үед 3.4 дахин өндөр хурдтай болсон байна.
14 ба 16 инчийн дэлгэцтэй загварууд хар ба мөнгөлөг өнгөний сонголттой, бүгд “Liquid Retina XDR” дэлгэцтэйгээс гадна, 12 мегапикселийн Center Stage камер суурилуулжээ. M4 чиптэй 14 инчийн MacBook Pro нь 1599 ам.доллар, M4 Pro чиптэй нь 1999 ам.доллар, 16 инчийн дэлгэцтэй MacBook Pro загвар нь 2499 ам.доллароос эхлэх үнээр ирэх сарын 8-нд худалдаанд гарна. Бүх загварын урьдчилсан захиалгыг 10 дугаар сарын 30-ны өдрөөс эхлүүлжээ.
Apple компани мөн хамгийн жижиг компьютер болох Mac mini загвараа 10 дугаар сарын 29-ний өдөр танилцуулсан юм. Уг загвар нь өмнөх хувилбараасаа хоёр дахин жижиг хэмжээтэй, M4, M4 Pro чипүүд болон хиймэл оюуны функцүүдийг дэмждэг байна.
Эх сурвалж: МОНЦАМЭ Агентлаг Д.Жаргал
