.png){kind=logo}
ЛОНДОН, 2024 оны арваннэгдүгээр сарын 12 /Journal of Lightwave Technology/. Лондоны их сургуулийн коллежийн (UCL) судлаачид утасгүй сүлжээг ашиглан секундэд 938 гигабитийн хурдаар өгөгдөл дамжуулснаар шинэ дээд амжилт тогтоожээ.
Судлаачид 5-150 гигагерцийн (ГГц) давтамжийн царааг ашигласан нь 145 ГГц-ийн давтамжийн хязгаарыг ашигласан өмнөх амжилтаас тав дахин илүү байна. Энэ технологи нь Их Британид секундэд 100 мегабайтын өгөгдлийг 5G сүлжээгээр татаж авах дундаж хурдаас 9380 дахин хурднаар өгөгдлийг дамжуулдаг тул өндөр хурдаар өгөгдөл дамжуулах өсөн нэмэгдэж буй эрэлт хэрэгцээг хангаж чадна гэж судлаачид үзэж байна.
Эл амжилтад хүрэхийн тулд эрдэмтэд радио давтамж, шилэн кабелийн технологийг анх удаа нэгтгэж, уламжлалт утасгүй сүлжээний сул талыг арилгажээ. Тодруулбал, 5-50 ГГц давтамжтай ажилладаг электроник, 50-150 ГГц-ийн цараанд радио давтамж үүсгэдэг фотоникийг ашигласнаар боломжит давтамжийн царааг ихээхэн өргөжүүлж, өгөгдөл дамжуулах ерөнхий хурдыг нэмэгдүүлсэн байна.
Утасгүй сүлжээ нь ихэвчлэн нарийн давтамжийн цараанд радио долгион ашиглан мэдээлэл дамжуулдаг. Wi-Fi болон 5G хөдөлгөөнт холбоо нь 6 ГГц -ээс бага давтамжид ажилладаг бөгөөд энэ нь өндөр хурдаар өгөгдөл дамжуулах өсөн нэмэгдэж буй эрэлт хэрэгцээг хангахад учирч байгаа гол бэрхшээл юм.
“Бид эдгээр саад бэрхшээлийг даван туулахын тулд өндөр хурдны электроник болон миллиметрийн долгионы фотоник гэсэн одоо ашиглаж байгаа утасгүй хоёр технологийг анх удаа нэгтгэсэн. Энэхүү шинэ арга нь их хэмжээний өгөгдлийг урьд өмнө байгаагүй хурдаар дамжуулах боломжийг олгодог бөгөөд ирээдүйн утасгүй холбоонд чухал ач холбогдолтой” гэж судлаач Жисинь Лю ярилаа.
Эх сурвалж: МОНЦАМЭ Агентлаг Д.Жаргал
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!