.png){kind=logo}
БЭЭЖИН, 2026 оны тавдугаар сарын 14 /Xinhua/. Хятад улс дэлхийд анх удаа хүний үүдэл эсээс ургуулсан үр хөврөлийг сансарт туршиж эхэлсэн тухай "Xinhua" агентлаг мэдээлжээ.
Уг судалгааг Хятадын тойрог замын станцад явуулж байгаа бөгөөд энэ нь бичил таталцлын хүч хүний эсийн хөгжлийн эхний үе шатанд хэрхэн нөлөөлдгийг ойлгох, мөн ирээдүйд хийх урт хугацааны сансрын нислэгүүдэд бэлтгэхэд эрдэмтдэд туслах зорилготой байна.
Хятадын Шинжлэх ухааны академийн Сансрын технологийн төвийн мэдээлснээр, туршилтын дээжийг "Тянжөү-10" ачаа тээврийн сансрын хөлгөөр тойрог замд хүргэжээ. Уг хөлөг станцад залгагдсаны дараа сансрын нисэгчид материалуудыг станцын шинжлэх ухааны модульд байрлуулсан байна.
Эрдэмтдийн онцолж буйгаар, эдгээр нь хүний үр хөврөл биш, харин үүдэл эсээс ургуулсан биологийн тусгай бүтэц юм. Ийм үр хөврөл нь хөгжлийн эхэн үе шатыг дуурайдаг боловч бүрэн хэмжээний бие махбод болон хөгжих боломжгүй аж.
Төслийн удирдагч Юй Лэцянь туршилт төлөвлөгөөний дагуу хэвийн явагдаж байгааг мэдэгджээ. Станц дээрх автоматжуулсан систем нь судалгаанд шаардлагатай нөхцөлийг бүрдүүлж байгаа аж.
Эрдэмтэд умайн эс дээр байрлуулсан болон бичил шингэний чип дотор байрлуулсан туршилтын хоёр үр хөврөлийг судалж байна. Энэхүү судалгааны гол зорилго бол жингүйдлийн орчин нь эсийн эхэн үеийн хөгжлийн явцад хэрхэн нөлөөлдөгийг тогтоох явдал юм.
Уг судалгаатай зэрэгцүүлэн ижил төрлийн туршилтыг дэлхий дээр явуулж байгаа бөгөөд ингэснээр татах хүч болон жингүйдлийн орчин дахь эсийн хөгжлийн ялгааг харьцуулан тогтоох ажээ.
Туршилтыг таван өдөр явуулахаар төлөвлөсөн бөгөөд дууссаны дараа дээжүүдийг тойрог замд шууд хөлдөөж, дараа нь нарийвчилсан шинжилгээ хийлгэхээр дэлхий рүү буцаан илгээнэ.
Туршилтын явцад олж авсан мэдээлэл нь сансарт удаан хугацаагаар байх үеийн эрсдэлийг судлах, ирээдүйд сансар огторгуйн гүн рүү хийх нислэгт чухал үүрэг гүйцэтгэнэ гэж Хятадын судлаачид үзэж байна.
Эх сурвалж: МОНЦАМЭ Агентлаг Д.Жаргал
