.png){kind=logo}
Улаанбаатар /МОНЦАМЭ/. “Монголын Эдийн засгийн форум-2023” Улаанбаатар хотноо маргааш ням гарагт эхэлж, долоодугар сарын 9-10-нд хоёр өдөр чуулах гэж байна.
Энэ удаагийн чуулганд гадаад, дотоодын 1700 орчим зочин төлөөлөгч оролцохоор бүртгүүлээд байна. Үүний:
- 700 нь хувийн хэвшлийн ивээн тэтгэгч компани, ААН, байгууллагуудын төлөөлөл, мөн эрдэмтэн судлаач нар орж байна.
- 500-600 нь Монгол Улсыг зорин ирж буй гадаадын хөрөнгө оруулагч нар байна.
- Мөн Европын холбоо, Австрали, БНСУ зэрэг гадаадын орны парламентын гишүүн, зарим орны Худалдааны сайд, Эдийн засгийн яамдын удирдлага зэрэг төр, засгийн төлөөлөл, олон улсын хэвлэл мэдээллийн байгууллагууд багтаж байна.
“Welcom to Mongolia” уриан дор болох Эдийн засгийн чуулга уулзалтад “BlackRock”, “J.P.Morgan”, “Goldman Sachs” зэрэг дэлхийн томоохон хөрөнгө оруулагч банк, санхүүгийн байгууллагууд, Дэлхийн банк, АХБ зэрэг олон улсын байгууллагуудын удирдлагууд, “Рио Тинто” зэрэг мөн томоохон компаниудын ТУЗ-ийн дарга, захирал нарыг уриад байна. Энд мөн гадаадын 40 гаруй банкны төлөөлөл оржээ.
Тиймээс “Монголын Эдийн засгийн форум-2023” Монгол Улсаа сурталчилж, хөрөнгө оруулагчдыг татаж нэмэгдүүлэхэд илүүтэй чиглэж буйг зохион байгуулагч нар мэдээлж байна.
Энэ удаагийн “Монголын Эдийн засгийн чуулган” Монгол Улсад гадаадын хөрөнгө оруулалтыг татахад чухал үүрэг гүйцэтгэх үйл ажиллагаа болно гэдэг итгэж буйгаа ЭЗХ-ийн сайд Ч.Хүрэлбаатар илэрхийлж байна.
Мөн “CNN”, “Bloomberg”, “Al Jazeera”, “ABC news”, “Financial Times” зэрэг дэлхийн хэвлэл мэдээллийн томоохон байгууллага, агентлагын төлөөлөл зочдын багт багтаж байгаа нь Монгол Улсыг дэлхийд сурталчлах зорилготойг илэрхийлж байна. Тиймээс энэ удаагийн чуулган Монгол Улсад хөрөнгө оруулалтыг татахад чухал үүрэг гүйцэтгэх үйл ажиллагаа болно гэдэг итгэж буйгаа ЭЗХ-ийн сайд Ч.Хүрэлбаатар илэрхийлсэн юм.
Энэ удаагийн форум Үндэсний их баяр наадмын өмнөх өдрүүдэд болж, зочид төлөөлөгчид Монголын Үндэсний баяр наадмыг үзэж сонирхох гэж байгаагаар мөн онцлог болох юм.
“Монголын Эдийн засгийн форум-2023”-оор хэлэлцэх гол асуудал нь гэсэн дэлхийн нийлүүлэлтийн сүлжээ, бүс нутгийн худалдааны интеграцлал, Монгол Улсын эдийн засгийн тойм, бүтээн байгуулалтын төслүүд, бизнес-хөрөнгө оруулалтын орчин зэрэг 4-5 сэдэвт төвлөрч байна.
Үүнээс гадаад, дотоодын хөрөнгө оруулалтын орчин, эрх зүй онцгой анхаарал татаж буй аж. Тиймээс гадаадын хөрөнгө оруулалтын орчин, нөхцөл байдлыг хэлэлцэнэ. Энд “Монгол Улсад орох гадаадын хөрөнгө оруулалт сүүлийн жилүүдэд өсөж нэмэгдсэн үү?” гэсэн асуулт тавигдаж буй.
ЭЗХ-ийн сайд Ч.Хүрэлбаатар энэ талаар мэдээлэхдээ, Монгол Улсад нийтдээ 41.1 тэрбум ам.долларын хөрөнгө оруулалт хийгдсэн дүнтэй байгаа гэв. Гэхдээ сүүлийн жилүүдэд гадаадын хөрөнгө оруулалтын хэмжээ буурч буйг тэрбээр дуулгасан юм.
“Монголын Эдийн засгийн форум” нь:
2010 онд “Бид хамтдаа чадна”,
2011 онд “Хөгжилд хамтдаа!”,
2012 онд “Эдийн засгийн хөгжил”,
2013 онд “Монгол брэнд”,
2014 онд “Монголд үйлдвэрлэв”,
2015 онд “Итгэлцэл”,
2016 онд “Сургамж, сорилт, гийдэл”
2018 онд “Хүчээ нэгтгэе”,
2022 онд “Шинэ сэргэлт” зэрэг уриан дор болж, улс орны эдийн засаг, нийгмийн асуудлыг дотооддоо хэлэлцэж байсан бол энэ удаагийнх гадаад орчин, гадаад ертөнц, гадаадын хөрөнгө оруулалтад чиглэж, Монгол Улсаа дэлхийд сурталчлахад чиглэн төвлөрч байна.
Эх сурвалж: МОНЦАМЭ агентлаг Б.Болд
