.png){kind=logo}
Бүгд Найрамдах Өмнөд Судан Улсад явагдаж буй НҮБ-ын “UNMISS” энхийг сахиулах ажиллагаанд үүрэг гүйцэтгэж буй Монгол Улсын Зэвсэгт хүчний 12 дугаар ээлжийн цэргийн багийн удирдлагаас эмэгтэй цэргийн алба хаагчидтай 2023 оны 8 дугаар сарын 19-нөөс 20-ны өдрүүдэд хоногийн сургуулийг зохион байгуулав.
“Бентью” суурин дахь дэлхийн хүнсний хөтөлбөрийн хамгаалалтын үүрэг гүйцэтгэж байгаа тэргүүний ажиллагааны баазын харуулын хяналтын секторт дотоодын дүрвэгсдийн хуаранд түр ажиллагааны баазыг байгуулан “Цувааны хамгаалалтыг зохион байгуулж, мэдээлэл цуглуулах” сэдвийн хүрээнд зохион байгууллаа.
Хоногийн сургуулиар үндсэн болон тусгай үүрэг гүйцэтгэх үед эмэгтэй цэргийн алба хаагчдын оролцоог нэмэгдүүлэх, холын эргүүлд үүрэг гүйцэтгэх дадлага, туршлагыг нэмэгдүүлэх, цагийн байдлын ямар ч нөхцөлд бие даан үүрэг гүйцэтгэх зорилгыг дэвшүүлэн ажилласан. Энэхүү хоногийн сургууль нь дан эмэгтэй цэргийн алба хаагчдыг мотобуудлагын салааны орон тоонд томилгоожуулан үүрэг гүйцэтгүүлснээрээ секторын хэмжээнд анх удаа болж байгаагаараа онцлог байлаа. Уг салааг удирдлага, штаб, салбаруудаас нийт 31 цэргийн алба хаагчийг томилгоожуулан, үүрэг гүйцэтгүүлсэн юм.
Уг хоногийн сургуулийг зохион байгуулснаар эмэгтэй цэргийн алба хаагчид нь явган эргүүлийн үүргийг заагдсан чиглэлд гүйцэтгэх, шөнийн цагаар эргүүл хийх, орон нутгийн иргэдээс мэдээлэл цуглуулах, цувааны хамгаалалтыг зохион байгуулах, харуулын үүрэг гүйцэтгэх, болзошгүй цагийн байдал үүссэн үед бие даан шийдвэр гарган үүрэг гүйцэтгэх, дадлага, чадварыг нэмэгдүүлсэн ач холбогдолтой сургалт болсон гэж дүгнэж байна.
Мөн секторын командлагч энэхүү сургуулийн илтгэлийн хариуг ирүүлэхдээ монгол цэргийн мэргэжлийн ур чадвар, тэр дундаа эмэгтэй цэргийн алба хаагчдын идэвх, оролцоо, хүчин чармайлтыг өндрөөр үнэлж байгаагаа илэрхийлсэн юм.
Эх сурвалж: ЗХЖШ Ахлах дэслэгч Л.Түмэндэлгэр
