.png){kind=logo}
Монгол Улсын сайд, Олимп, нийтийн биеийн тамир, спортын Үндэсний хорооны дарга Б.Бат-Эрдэнэ ОХУ-ын Эрхүү хотын Олимпын залгамж тамирчин бэлтгэдэг спортын коллежийн захирал, “Байкал-Арена” спорт цогцолборын захирал Резик Илья Юрьевич болон Буриад улсын хөнгөн атлетикийн холбооны ерөнхийлөгч Наталья Николаевна Соломинская, Буриадын баруун Сибирийн их сургуулийн “Биеийн тамир, спорт” танхимийн дэд профессор Любарская Эльвира Викторовна нарыг хүлээн авч уулзлаа.
Уулзалтын эхэнд сайд Б.Бат-Эрдэнэ “Спортын салбар дахь хамтын ажиллагаа амжилттай хэрэгжиж байгааг дурдаж, спортын салбарт хамтран зохион байгуулах арга хэмжээг өргөжүүлэхэд Засгийн газрын зүгээс дэмжлэг үзүүлэхэд бэлэн” хэмээн цохон тэмдэглэв.
ОХУ-ын Спортын яам болон Монгол Улсын Биеийн тамир, спортын улсын хорооны хооронд хийсэн 2022-2024 оны гэрээний хэрэгжилтийн хүрээнд болж буйгаараа онцлог уулзалт юм. Талууд манай улсад энэ онд зохион байгуулах ОХУ-ын хоккейн “КХЛ” лигийн тоглолтын талаар хөндөж, Буриадын Эрхүү хотод цаашид зохион байгуулах хөнгөн атлетикийн тэмцээн уралдаанд Монголын өсвөрийн тамирчдыг оролцуулах, эрдэм шинжилгээний хуралд спортын салбарын эрдэмтдийг оролцуулах асуудлаар голлон ярилцлаа. Харин нөгөө талаас хамтын ажиллагааны гэрээний биелэлт, боловсролын салбарт хамтран ажиллах, багш, дасгалжуулагч, арга зүйч нарыг богино хугацааны сургалт, судалгаа шинжилгээний ажилд хамтран ажиллахад бэлэн гэдгээ илэрхийллээ.
Уулзалтад ОНБТСҮХ-ны Ажлын албаны дарга Э.Тэмүүжин, Нийслэлийн ерөнхий боловсролын спортын төв сургуулийн захирал Ч.Зоригтбаатар нар байлцлаа. Буриадын албаны хүмүүс манай улсад болж буй “Боловсрол-Спорт-Олимпизм” сэдэвт Олон улсын дугуй ширээний уулзалтад оролцохоор хүрэлцэн ирсэн юм.
